Suleqatitaaritigut: Ineqarnermut immikkoortortami AC-fuldmægtigi

AC-fuldmægtigi ineqarnermut suliassaqarfimmi , Ineqarnermut Attaveqaasersuutinullu Naalakkersuisoqarfimmi

Ineqarnermut suliassaqarfimmi tunngasunik suliaqarusuppit? Ineqarnermut atugassarititaasuni pitsanngorsaaqataarusuppit? Inuunermi atugassarititani qitiunerpaami pitsanngorsaaqataasinnaavutit, tassa ineqarneq.

Tamanna takorloorsinnaagukku Ineqarnermut Attaveqaasersuutinullu Naalakkersuisoqarfimmi, ineqarnermut immikkoortortamut AC-fuldmægtigitut qinnuteqarnissat innersuutissavarput.

Ineqarnermut Attaveqaasersuutinullu Naalakkersuisoqarfiup suliassaqarfinni tullinnguuttuni pingaarnertut allaffissorneq, pilersaarusiorneq aqutsinerlu isumagisarpai: Ineqarneq, qitiusumik sanaartortitsinermut inissisimaneq, illuutinut oqartussaaneq, attaveqaatillu, tullinnguuttut takukkit.

Sanaartornermut immikkoortortaqarfik siammasissumik suliaqarfiulluni ulluinnarni ulapaarfiummat, piumassusilimmik AC-fuldmægtigissarsiorpugut. Inunnit, politikkikkullu eqqumaffigineqartunik Immikkoortortaqarfimmi arlalinnik akissussaaffeqartumi atorfik pineqarpoq.

Sanaartornermut immikkoortortaqarfiup ataani Ineqarnermut Illuuteqarnermullu allaffeqarfiup suliassaqarfiit inissisimaffiillu assigiinngitsut isumagisarai, ilanngullugit illuutinik pisisarnermut tuniniaasarnermullu tunngatillugu Namminersorlutik Oqartussat piginnittutut inissisimanera, kiisalu Namminersorlutik Oqartussat inissiaatai taakkualu attartortinneqartarnerat. Tassunga ilanngullugu inissianik aningaasalersuinerup iluani aaqqissuussinerit assigiinngitsut iluanni inatsisit kiisalu taarsigassarsiarititat Namminersorlutik Oqartussat taarsigassarsiarititaasa allaffissornikkut aqunneqarnerat, allaffimmi isumagineqarput. Allaffimmi tassunga ilanngullugu ineqarnermut suliassaqarfimmi inatsisit nakkutilliinerlu ingerlatsivigineqarput.

Immikkoortortaqarfik assigiinngitsorpassuarnik akisussaaffeqarfeqarpoq, taamaalillunilu suliassaqarfiit assigiinngitsuullutik, amerlanersai inatsimmut tunngassuteqarlutik. Aaqqiissutissat tapersiivigisartakkagut inuiaqatigiinnut innuttaasunullu, aammalu suliniuterpassuit ineriartortitsiviusut aamma nunatta ataatsimoortumik ineriartortinnissaanut suliniutit piviusunngortinneqarnissaannut, pingaaruteqarput.

Ineqarnermut Illuuteqarnermullu allaffeqarfiup ataani ineqarnermut suliassaqarfimmi naliginnaasumik sulianik suliaqartarneq AC-fuldmægtigitut siuttuuffigissavat. Taassumap kingunerisaanik nalinginnaasumik sulianik suliarinnittassaatit allaffissorlutillu, saaffiginnissutinik akissuteqartassaatit, politikerinut saqqummiussassanut atortussanik tunulequtaasussanik suliaqartassaatit, inatsisinik sukuiaasassaatit, soorluttaaq inatsisiliornernut, inatsisinillu malinnaatitsinernut suleqataasassasutit.

Sanaartornermut immikkoortortaqarfiup ataani Ineqarnermut Illuuteqarnermullu allaffeqarfimmi massakkut atorfiliusut allaffimmi pisortaq, suleqataasullu marluk suleqatigissavatit.

Pingaarnertut suliassarissavatit:

• Ineqarnermut suliassaqarfimmi inatsisinik sukuiaaneq, inatsisitigullu siunnersuineq
• Ineqarnermut suliassaqarfimmi inatsisiliornernut, inatsisinillu malinnaatitsinernut suleqataaneq
• Politikikkut aalajangiinissami tunngavissanik il.il. suliaqarneq
• Suliassaqarfimmi Naalakkersuisumut ataavartumik sullissineq, matumani innuttaasunit saaffiginnissutinik akissuteqaasiornerit, ataatsimiitsitalianut sullissinerit, inatsisissanillu piareersaasiornerit ilanngullugit
• Immikkoortortaqarfiup suliassaasa iluini tusarniutinik akissuteqaasiornerit
• Ineqarnermut suliassaqarfiup iluani inatsisinik nakkutilliineq
• Ataatsimiinnissanik, ataatsimiiffissanillu piareersaanerit, imaqarniliornerit, suliassanullu assigiinngitsorpassuarnut atortussatut tunulequtaasussap ilusissaata qulakkeerneqarnissaa
• Allaffeqarfiup akisussaaffiisa iluini suliassat takkussuuttut pisariaqarfiini suliarineqarnissaat

Taassumap saniatigut pitsanngorsarneqarsinnaasut, eqaallisarneqarsinnaasullu tappiffigissavatit, misissuilluareernikkullu nalileereernikkullu aaqqiissutaasinnaasunik nammineq siunnersuuteqarlutit.


Piukkunnaatilik


Bacheloritut imaluunniit kandidatitut attuumassutilimmik ilinniarsimassaatit, imaluunniit ilinniakkannik naammassiliivissaatit. Pisortani aamma/imaluunniit politikikkut aqutami sulinermik misilittagaqaruit iluaqutaassaaq, tamannali piumasaqaataanngilluinnarpoq.

• Marlunnik oqaaseqartuussaatit, kalaallisut qallunaatullu
• Kalaallit Nunaata inuiaqatigiivinut, kulturiannillu ilisimasaqarluarlutit
• cBrain F2-mik misilittagaqarneq pitsaasuussaaq.
• Ataqatigiissaakkamik sulisinnaavutit, ilisimatusarsinnaavutit, ajornartorsiutaasullu paasiuminartunngorlugit paasisitsiniutigisinnaallugit. Attaveqarsinnaanermi piginnaasatit annertuumik pingaartinneqarput.
• Suleqateqarsinnaavutit, misissueqqissaarsinnaavutit, siunnerfilimmillu suleriaaseqarlutit.
• Akisussaaffimmik tiguserusussuseqarlutillu tigusisinnaassuseqarlutit, iliuuseqarsinnaallutit angusaqarluarniartuuvutit.
• Suleqateqarsinnaavutit, namminersorlutilli suliat pitsaassusissaat, siuariartornissaallu qulakkeersinnaassavat.
• Namminersorlutit sulisinnaavutit, aammali immikkoortortaqarfimmi suleqatit qaqugukkut siunersiueqatigissanerlugit ilisimaaralugu.
• Pisortat allaffeqarfianni sulinermik misilittagaqarputit, aammali ilinniakkannik naammassinnerlaajusinnaavutit imaluunniit naammassingajalersinnaallutit.

Atorfimmi ilinnut, piginnaasannullu annertuumik piumasaqarfigineqarsinnaassaatit. Suliatigut qaffasissumik piginnaasaqarnivit saniatigut inuttut arlalitsigut piginnaasaqassasutit naatsorsuutigaarput, matumani siammasissumik tamat isiginnissuseqarsinnaanerup, annikitsortaanillu paasinnissinnaanerup akornanni oqimaaqatigiissitsisinnaanissat, nammineersinnaanerup ikioqatigiillunilu pilersitsinerup iluaqutissartaannik takunnissinnaanerit ilanngullugit, soorluttaaq oqaasissannik oqimaalutaallaqqissuusutit, persuarsiortuunngitsutit, sulinerullu nalaani illaqataasinnaasutit.

Neqeroorutigaarput

Suliffimmi nuannaarneq, akisussaassuteqarnerlu ingiaqatigiillutik angusarissaarfiusarluni, ineriartornissamullu akisussaaffeqarnissamut, suliatigullu ineriartoqqinnissamut periarfissagissaarluni Sanaartornermut immikkoortortaqarfimmi sulineq soqutiginarlunilu suliatigut unammillernarpoq.

• Nutaaliornissamik, nutaamillu eqqarsartaaseqarnissamik ukkatarinniffiulluni suliffeqarfik
• Politikkikkut aalajangigassat qanillugit Naalakkersuisoqarfimmi sulineq
• Piumassuseqartunik suleqateqarluni persuarsiunngitsumik, ammasumillu suliffik
• Inuttut, suliatigullu unammillernartut soqutiginartut

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk