Ineqarnermut Attaveqaasersuutinullu Naalakkersuisoqarfik Sanaartornermut immikkoortortaqarfimmut immikkoortortaqarfimmi aqutsisussamik sulisussarsiorpoq

Sanaartornermut immikkoortortaqarfik assigiinngitsunik suliassaqarfeqarluni ulluinnarni ulapaarfiuvoq, ilanngullugit ineqarnerup illuutillu iluanni allaffissorneq aningaaqarnermilu aqutsineq, tassungalu aningaasaqarnermut immikkoortortaqarfimmi aqutsisumik sulisussarsiorpugut.

Sanaartornermut immikkoortortaqarfiup suliassaqarfiit inissisimaffiillu assigiinngitsut isumagisarai, ilanngullugit illuutinik pisisarnermut tuniniaasarnermullu tunngatillugu Namminersorlutik Oqartussat piginnittutut inissisimanera, kiisalu Namminersorlutik Oqartussat inissiaatai taakkualu attartortinneqartarnerat. Tassunga ilanngullugu inissianik aningaasalersuinerup iluani aaqqissuussinerit assigiinngitsut iluanni inatsisit kiisalu taarsigassarsiarititat Namminersorlutik Oqartussat taarsigassarsiarititaasa allaffissornikkut aqunneqarnerat, allaffimmi isumagineqarput. Allaffimmi tassunga ilanngullugu ineqarnermut suliassaqarfimmi inatsisit nakkutilliinerlu ingerlatsivigineqarput.

Immikkoortortaqarfik assigiinngitsorpassuarnik akisussaaffeqarfeqarpoq, taamaalillunilu suliassaqarfiit assigiinngitsuullutik, amerlanersai aningaasaqarnermut tunngassuteqarlutik. Aaqqiissutissat tapersiivigisartakkagut inuiaqatigiinnut innuttaasunullu, aammalu suliniuterpassuit ineriartortitsiviusut aamma nunatta ataatsimoortumik ineriartortinnissaanut suliniutit piviusunngortinneqarnissaannut, pingaaruteqarput.

Immikkoortortaqarfimmi aqutsisutut Ineqarnermut Illuutinullu suliassaqarfimmi aningaasaqarnermut siuttuussaatit. Tamatuma kingunerisaanik suliassaqarfimmi naatsorsuuserineq ingerlatsinermilu aningaasaqarneq kiisalu suliffiup iluani missingersuutinik malinnaaneq, nalunaarusiorneq aammalu suliassaqarfimmi sulisunik allanik siunnersuineq, suliarissavatit. Tamatuma saniatigut suliassaqarfimmi aningaasaqarnikkut  ataatsimoortumik paasisimaarinnitsitsinissaq suliarissavat kiisalu ukiumoortumik aningaasanut inatsisip suliarineqarneranut aammalu suliassaqarfimmi Nunap karsiata naatsorsuutaannik ukiumoortumik naammassinninnissamut ikiuutissallutit.
Tamatumunnga atatillugu suliassaqarfimmi aningaasaqarnikkut ingerlatsinermut suleriaasissat nakkutiginninnerullu ineriartortinneqarnerat isumagisarissavat.
Naalakkersuisoqarfimmi Aningaasaqarnermut aamma HR-imut atorfilittani ilaalissaatit, maannakkorpiaq tassaniipput allaffimmi pisortaq aammalu sulisut marluk. Allaffimmut pisortaq Sanaartornermut immikkoortortaqarfimmi immikkoortortaqarfimmut pisortap ataaniippoq.

Qinnuteqartoq eqqortoq
Qinnuteqartoq eqqortut allaffissornerup/aningaasaqarnerup iluanni ilinniarsimasuuvoq. Pisortat aamma /imaluunniit politikkikkut allaffissornikkut aqutsinerup iluanni misilittagaqarneq iluaqutaassaaq, kisianni piumasaqaataanngilluinnarluni.
 

• Prisme imaluunniit aningaasaqarnermi periaatsit taamaaqatai misilittagaqarfigaatit imaluunniit ilisimasaqarfigalugu
• Excel-imi sulisinnaavutit
• cBrain F2 misilittagaqarfigigukku imaluunniit ilisimasaqarfigigukku iluaqutaassaaq
• tulleriissaartumik periaaseqarlutit sulisarputit aammalu ilisimasassat ilikkarsinnaallugit paasiuminartumillu najoqqutassat paasissutissiissutigisinnaallugit
• Anguniagaqallaqqipputit – akisussaaffimmik tiguserusullutit tigusisinnaallutillu aammalu suliniuteqarsinnaallutit.
• Namminersorlutit sulisarputit, kisianni immikkoortortaqarfimmi suleqativit qaqugukkut isumasioqatiginissaa aamma nalunagu.

Suliatigut qaffasissumik ilisimasaqarnerup saniatigut, arlalinnik inuttut piginnaasaqarfeqartutut naatsorsuutigaarput, ilanngullugu sukumiisut atituumik paasisimaarinerisa paasinniffiginerisalu akornanni oqimaaqatigiissitsisinnaasutit, namminersorneq ataatsimooqateqarnerlu akuleriisinneqarnerat iluaqutaasutut takusinnaagit kiisalu oqaasissarnik oqimaalutaallaqqissutit, persuarsiortuunngitsutit aammalu ullup suliffiusup ingerlanerani illaqataalluarsinnaasutit.

Neqeroorutigaagut
Sanaartornermut immikkoortortaqarfimmi sulineq avatangiisini pissanganartuni suliatigullu unammillernartuni ingerlanneqarpoq, tassani sulinermik nuannarisaqarneq akisussaaffillu angusaqarluarfiusumik ingerlaqatigiillutik, aammalu ineriartornermut akisussaaffeqarnermut suliatigullu ineriartoqqinnissamut periarfissaqarluarluni.
 

• Suliffik nutaaliornermik nutaanillu eqqarsarnermik ukkatarinniffiusoq
• Naalakkersuisoqarfimmi politikkikkut aalajangiinernik suliaqarnerit ingerlanerannut qanittumi sulineq
• Suleqatit tunniusimallutik persuarsiorfiunngitsumik ammasumillu sullivimmi avatangiiseqarneq
• Unammilligassat inuttut suliatigullu pissanganartut

Imminnut oqaluuteriaaseq persuarsiorfiunngitsumik ingerlasarpoq, aammalu ulluinnarni ulapaarfiusuni qiimanartumik isumagissaarneq malunnartarpoq, kisianni aamma sulinerup ilaqutariittullu inuunerup ataqatigiittussaanerat ataqqineqarluni.

Atorfininnissap ullua
Ulloq 1. juli imaluunniit isumaqatigiissuteqarneq malillugu.

Soqutiginnippit?
Apeqqutissaqaruit Immikkoortortaqarfimmi pisortaq Embla Kristjánsdóttir, emki@nanoq.gl, attaveqarfigisinnaavat.
 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik.  Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

Qinnuteqaat nassiuguk