Sulisussarsiorneq: Skæven Tasiilami takornarianut paasissutissiivimmi sulisussarsiorpoq

 

Tikeraartuvut Tasiilamiinneranni Ammassallillu eqqaaniinneranni nuannerluinnartunik misigisaqarnissaannut suleqataajumavit? ’Skæven’ – Tasiilami Takornarianut paasissutissiivik – pikkorissumik suleqatissarsiorpoq tikeraanik saaffiginnittartunut sullissisumik toqqaannartumillu attaveqartartussamik. Takornarianut paasissutissiivimmi sulisussarsiorpugut tikeraartut tikinneranni pitsaasumik misigisaqartitsisinnaasumik, aammalu tikeraartunik misigisassatut periarfissanik nioqqutissallu pillugit pitsaasunik siunnersuisinnaallunilu aqqutissiuussisinnaasumik.

 

Suliassatit tamatigoortuupput ilaatigut makkununnga tunngasut:

·Tikeraartuvut pitsaasumik misigisaqartissallugit paasissutissiiffigissallugillu

·Suliassanik takkussortunik suliaqartarnerit

·Skæven-imi tikeraartunik sullissineq, mobil aamma mail atorlugit

·Skæven-imi paasissutissanik peqartuarnissaa qulakkiissallugu

·Inuit attaveqatigiittarfiini maaniittuni paasissutissat imarisaannik agguaaneq

 

Ilinnut naatsersuutigaarput:

·Takornariaqarnermik soqutigisaqartoq

·Aalajaatsumik takkuttartoq

·Ammasuullutillu saaffikkuminartuussasutit

·Tuluttut oqalussinnaasutit

·Sullissisinnaassuseqartutit

·Sumiiffimmik ilisimannittuusutit

·Namminersorlutit sulisinnaasutit akisussaaffimmillu tigumminnissinnaallutit

·18-inik ukioqalereersimasutit

 

Annertunerusumik paasisaqarusukkuit:

Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit takornariaqqarnermik sullissisoq Anna Burdenski , oqarasuaat +299 36 62 40 imaluunniit e-mail: anbu@sermersooq.gl

 

Pineqaatissinneqarsimannginnermut uppernarsaat:

Atorfik una pineqaatissinneqarsimannginnermut uppernarsaammik pissarsinissamut inatsit naapertorlugu pisussaatitaaffeqarpoq. Inatsit naapertorlugu kommune pineqaatissinneqarsimannginnermut uppernarsaammik pissarsippat atorfinitsitsineq aatsaat pisinnaavoq. Taamaammat maluginiaqqussavarput atorfininnissamut isumaqatigiissusiortoqarsinnaammat kommune pineqaatissinneqarsimannginnermut uppernarsaammik Politiinit aatsaat pissarsereerpat.

 

Akissaatinut atorfinitsitaanermullu tunngatillugu atugassarititaasut:

Akunnermusialik.

Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, imaluunniit Kalaallit Nunaannilu kattuffiup allap isumaqatiginninniarsinnaatitaasup isumaqatigiissutaat atuuttut malillugit atorfinitsitsisoqassaaq.
Atorfinititsineq qaammatini pingasuni misiliutitaqassaaq.

 

Inissaq:

Atorfininnermut atatillugu inissiamik innersuussisoqarsinnaanngilaq.

 

Qinnuteqaat:

Qinnuteqaat qulequtserlugu Atorfiup ilisarnaataa 289-23-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

 

Imatut qinnuteqaateqassaatit:

Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

 

Malugiuk: 

Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

 

 

 

 

 

 

 

 

 

 

 

 

 

 

 

 

Qinnuteqarnissamut killissarititaasoq: apriilip 30.-at, 2023

Atorfik una qinnuteqarfigiuk