Meeqqanut, Inuusuttunut, Ilaqutariinnullu Naalakkersuisoqarfik aaqqissuussaanermut nukittuumut pisortassamik pilersaarusiullaqqissumik, aqutsisoqarfiullu sulisui suleqatigisartakkallu allat qanimut attaveqarfigalugit Kalaallit Nunaanni innuttaasunut iluaqutaasussamik isumaginninnikkut pinaveersaartitsinikkullu suliniuteqarnermi siuttussamik, ineriartortitsisussamik toqqammavissiissussamillu pissarsiorpoq.    
Aqutsisuussaatit misissueqqissaarillaqqissoq pilersaarusiullaqqissorlu. Suleqatigisartakkanut, soqutigisaqartunut suliassaqarfimmullu suleqatigiinnikkut attaveqarnernik pitsaasunik pilersitsisinnaallutillu attassisinnaassaatit, aamma aaqqissuussaanermi naalakkersuinikkut aqunneqartumi sulineq paasisimasaqarfigilluarsimassavat.

Akisussaaffeqarfiit

• Aqutsisoqarfimmi pisortap – pisortaqatigiit suleqatigalugit – Isumaginninnermut Aqutsisoqarfiup aaqqissuussaanertut aqunneqarnera akisussaaffigaa, aammalu Isumaginninnermut Aqutsisoqarfiup atuuffiata isumaginninnermut, peqqissutsimik siuarsaanermut pinaveersaartitsinermullu suliassaqarfimmi pisariaqartitanut nukissanullu oqimaaqatigiissinnissaata timitalernissaa qulakkeernissaalu. Taamaattumillu suliassat pingaarnerit tassaassapput isumaginninnermut pinaveersaartitsinermullu suliassaqarfiup iluani kommuninik suleqateqarnerup inerisarneqarnissaa nukittorsarneqarnissaalu. Aqutsisoqarfimmi pisortaq aamma kommunit qanittumik attaveqarfiginissaannik qulakkeerinnittuussaaq, taamaaliornikkut suliaat sapinngisamik pitsaanerpaamik ikorfartorneqarlutillu oqimaaqatigiissinneqarniassammata.
• Aqutsisoqarfimmi pisortap naalakkersuinermik suliaqarnerup ingerlatsinerullu akornanni attaveqartitsinissaq akisussaaffigaa. Aqutsisoqarfimmilu pisortaq pisortaqatigiit suleqatigalugit inatsisiliornikkut naalakkersuinikkullu anguniakkat atulersinneqarnissaat innuttaasumullu inuiaqatigiinnullu angusaqarfiunissaat - anguniakkallu angusallu aalajangersarneqartut aningaasatigut killiliussat iluanni naammassineqarnissaat akisussaaffigaa.
• Ingerlatanut, sullissinermut pitsaassutsimullu anguniakkanik suliaqarneq malitseqartitsinerlu kiisalu nuna tamakkerlugu katsorsaanikkut neqeroorutaasut, ulloq unnuarlu angerlarsimaffiit, ulloq unnuarlu paaqqinnittarfiit, Pissassarfiup qimarnguiillu iluanni iliuusissatut pilersaarutit kiisalu Meeqqanik inuusuttunillu sullissinerup nukittorsarneqarnissaa pillugu Kalaallit Nunaata-Danmarkip 2019-2023-mut suleqatigiinnerat.
• Isumaginninnermut aqutsisoqarfiup periaatsinik suleriaatsinillu ineriartortitsinissaa, saqqummiussaqartarnissaa nakkutilliisarnissaa nalilersuisarnissaalu aqutsisoqarfiup pisortaata qulakkiissavaa, inuiaqatigiinni pisariaqartitanut malinnaasinnaajuaannaqqullugit. Tassungalu atatillugu aqutsisoqarfiup pisortaa attaveqaqatigiinnissamut piginnaasaqassaaq. 

Meeqqanut, Inuusuttunut, Ilaqutariinnullu Naalakkersuisoqarfik marsip aallaqqaataani 2023-mi tamatumaluunniit kingorna piaarnerpaamik atorfinittussamik aqutsisoqarfimmi pisortamik nutaamik pissarsiorpoq. Aqutsisoqarfimmi pisortatut Isumaginninnermut Aqutsisoqarfik, aaqqissuussaanikkut Meeqqanut, Inuusuttunut, Ilaqutariinnullu Naalakkersuisoqarfiup ataani immikkoortortaasoq, qullersatut aqutsisuuffigissavat.

Illit pillutit
 

• Kalaallit Nunaanni isumaginninnikkut pissutsit ilisimasaqarfigilluarpatit peqqissutsimillu siuarsaanerup pinaveersaartitsinerullu iluanni peqqissutsikkut unammilligassat aamma ilisimasaqarfigilluarlugit. Ilinniarnertuutut ilinniakkatigut naleqquttumik tunuliaqutaqarputit. Aqutsinermik aalajangiisarnermillu misilittagaqarputit.
  Suleqatiginnillaqqissuuvutit tusarnaallaqqissuullutillu. Nuna akimorlugu kommuninik suleqateqarneq misilittagaqarfigivat. Oqaatsitigut attaveqaqatigiinnikkullu piginnaasaqarluarputit. Sunniuteqarluarsinnaassuseqarputit aalajangiiniallaqqissuullutillu, taamaalillutit qularnaatsumik suleriaatsinik aqutsisinnaallutillu suliassanik pingaarnersiuisinnaallutit.
  Kalaallit oqaasii, kultuuriat inuiaqatigiinnilu pissutsit ilisimasaqarfigilluarpatit.

Uatsinnut pingaaruteqarpoq
 

• Pisortaqatigiinnik kajumilersitsisinnaanissat isumassarsiortitsisinnaanissallu, aammalu qiimasumik iluarusunnartumillu misigititsisinnaanissat anguniagarineqartullu naammassiniarnissaannut allanik kajumilersitsisinnaanissat. Pissutsit taamaaginnarnerinut unammillersinnaanissat taamaaliornikkullu kultuurimik pitsannguutissanut ataavartunut aamma "best pratice"-mut piareersimasimasumik qulakkeerinnissinnaanissat. Sulinermi eqeersimaartuuvutit suliassallu naammassineqarnissaat pingaartillugu, tamatumunngalu peqatigitillugu suliassat assigiinngisitaartut aamma isumagisinnaassavatit. Kingullertullu minnerunngitsumillu, naalakkersuinikkut aqutsinerup aamma Isumaginninnermut Aqutsisoqarfimmi pisortaqatitit aamma Meeqqanut, Inuusuttunut Ilaqutariinnullu Naalakkersuisoqarfimmi pisortaqatigiit akornanni suleqatigiinnermi tatiginassusermik tutsuiginassusermillu annertuumik pigisaqassaatit.

Isumaginninnermut Aqutsisoqarfik
Isumaginninnermut Aqutsisoqarfiup ataani immikkoortortaqarfiit arfineq pingasuupput: Inunnut innarluutilinnut immikkoortortaqarfik, Pinaveersaartitsinermut immikkoortortaqarfik Paarisa, Meeqqat ineriartornerinut immikkoortortaqarfik, Aningaasaqarnermut immikkoortortaqarfik, Ulloq Unnuarlu Inissitsiterinermullu immikkoortortaqarfik, Sullissisunik Siunnersuisarfik, Innuttaasunut immikkoortortaqarfik aamma Allattoqarfik.

Isumaginninnermut Aqutsisoqarfiup pingaarnertut suliassaraa
Isumaginninnermut Aqutsisoqarfik suliffeqarfiuvoq pissanganartoq soqutiginartorlu ulluinnarnilu ulapaarfiusoq angusaqarussusermillu annertuumik pigisaqarfiusoq. Peqqissutsimik siuarsaanissamut pinaveersaartitsinermullu tunngatillugu periusissiat naalakkersuinikkut aalajangersarneqartut atulersinneqarnissaat Isumaginninnermut Aqutsisoqarfiup suleqataaffigisarpaa. Periusissiatigut anguniakkat ulluinnarni ingerlatsinermi aqutsinikkut suliniutitut tigussaasunngortinneqarnissaat isumagisarparput. Suliat piffissaq eqqorlugu naammassineqarnissaat naalakkersuinikkullu anguniakkanik innuttaasunut apuussinissaq pingaartitaraarput.
Aqutsisoqarfiup pingaarnertut suliaqarfiisa qitiusut ilagaat kommuninik suleqateqarneq. Isumaginninnermut Aqutsisoqarfiup peqqissutsimik siuarsaanermi pinaveersaartitsinerup, ineriartortitsinerup isumaginninnikkullu siunnersuisarnerup isumagineqarnera pillugu kommuninik suleqateqarneq nukittorsarusuppaa. Aqutsisoqarfiup pingaarnertut suliaqarfiisa qitiusut aamma ilagaat ulloq unnuarlu paaqqinnittarfeqarnerup inunnullu innarluutilinnut ulloq unnuarlu neqeroorutit ineriartortinneqarnerisa nukittorsarneqarnissaat.
Tamakku saniatigut Isumaginninnermut Aqutsisoqarfiup tapiissuteqartarnermut aaqqissuussinerit aamma isumagisarai.
Aqutsisoqarfimmi pisortaq Meeqqanut, Inuusuttunut Ilaqutariinnullu Naalakkersuisoqarfiup pisortaanut toqqaannartumik attaveqarpoq.
 

Akissarsiat atorfeqarnermilu atugassarititaasut
Akissarsiat aalajangersimasumik tapit ilanngullugit, kiisalu ukiunut pingasunut atorfininnermi tapeq ilanngullugu LR 39-mi akissarsiat 1. april 2022 aallaavigalugu imak annertussuseqarput kr. 81.153 qaammammut, ukiumullu kr. 973.833 soraarnerussutisiassanut nammineq akiliutaasussaq ilanngunnagu.
 
Ukiunut pingasunut atuuttussamik atorfinitsitsisoqassaaq, isumaqatigiissuteqarneq tunngavigalugu. Atorfinittussaq tjenestemand-itut atorfeqareersimappat Kalaallit Nunaanni pisortat suliffeqarfiutaanni tjenestemand-eqarneq pillugu inatsisit tunngavigalugit aamma atorfinitsitsisoqarsinnaavoq.

Aallaaviusumik sapaatip akunnerani suliffiuvoq akunnerit 40-t, taamaattorli atorfimmi qanoq sivisutigisumik sulisinnaaneq pillugu aalajangersagaqanngilaq, qaangiuttoornermusiaqartitsisoqarnerlu atuulluni, soorlu aamma ullunut sulinngiffeqarnissaanut annaasaqaatisiaqartitsisoqartarani.

Akissarsianut atorfeqartitaanermullu piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput. Ukiunut killissaleriikkamik isumaqatigiissusiornikkut atorfinitsitsisoqarsinnaavoq.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

   
Soqutiginnippit?

Atorfik pillugu apeqqutissaqaruit, Flies HR-imeersup Partner Dorthe Fliesip saaffiginissaanut tikilluaqqusaavutit mobilikkut +299 583117 imaluunniit dorthe@flieshr.dk.

Flies HR atorfinitsitsiniarnermik isumaginnittuuvoq, taamaattumillu saaffiginnissutit tamaasa tassunga ingerlateqquneqarput. Qinnuteqarfissaq kingulleq tassaavoq januaarip aappaani 2023. Atorfinitsitsiniarnermi oqaloqatiginninnerit tamatuma kingorna sapaatit akunnerini ingerlanneqartussatut naatsorsuutigineqarput.

Atorfik pillugu annertunerusumik paasisaqarusukkuit Naalakkersuisoqarfimmi pisortap Heidi Lindholmip saaffiginissaanut tikilluaqqusaavutit heli@nanoq.gl-ikkut.

Tusarfiginissat qilanaaralugu.

Naalakkersuisut
Naalakkersuisut pillugit annertunerusumik uani paasisaqarsinnaavutit: https://naalakkersuisut.gl/.

Qinnuteqaat nassiuguk