Gå til hovedindhold
187

Dette jobopslag er udløbet

Kalaallit Nunaanni Peqqinnissaqarfimmi isumannaatsumik peqqinnartumillu sullivimmi avatangiiseqarnissamik siuarsaaqataarusuppit?

Sulisut aqutsisullu peqatigalugit nunatsinni Peqqinnissaqarfimmi sullivimmi avatangiisit timimut tarnimullu pitsaasumik sunniuteqarnissaannut suliamut pissanganartumut pingaarnertut suliaqarfigisassamut, siunnersortimik fuldmægtigimik qaffasissumik ilinniagalimmik pissarsiorpugut.

Atorfiniffissaq 1. februar 2022 immikkulluunniit isumaqatigiissuteqarnikkut

 
Atorfik qullersaqarfiup allatseqarfiani inissisimanermigut, nunatsinni Peqqinnissaqarfimmi siunnersuisarfittut iliuusissatut siunniussanik ilinniagaqassutsimillu inerisaanermik ikorfartueqataavoq.

Sullivimmi avatangiisit ingerlalluarnerlu
Sullivimmi avatangiisit pillugit akiusussaaffik kiisalu Peqqinnissaqarfik tamakkerlugu ajornartorsiutinut sullivimmi avatangiisinut tunngassutilinnut kiffartuussinermi suliassat pingaarutillit ilaat, qullersaqarfiup allatseqarfianit ingerlanneqalerput.

Taamaammat qullersaqarfiup aallatseqarfiani ulluinnarni ingerlatsinermi peqataanerup saniatigut, sulianik sullivimmi avatangiisinut attuumassutilinnik pilersaarusiornermillu misilittagalik soqutigisalillu atorfissaqartipparput.

Ulluinnarni sulininni sullivimmi avatangiisit pillugit eqqarsaatinik akuutitsisinnaanissat kiisalu kinguneqarluartussamik sullivimmi avatangiisinut attuumassuteqartunik pilersaarusioqataasinnaanissat, attaveqateqarsinnaanissat suleqateqarsinnaanissallu naatsorsuutigaarput. Immikkoortuni angisuuni mikisunilu nunarput tamakkerlugu siammarsimasuni suleqatit peqatigalugit angusaqarsinnaassaatit, taamaammallu nujakkat ataatsiakkaat nunalu tamakkerlugu eqqarsaatigisinnaanissaat pingaaruteqarpoq.

Sullivimmi avatangiisinut tunngasuni suliassat ilaatigut makkuupput:

  • Qitiusumik SULISUmut allatseqarnikkut kiffartuussineq.
  • Sullivinnik Nakkutilliisoqarfimmik suleqateqarneq nakkutilliinernillu ataqatigiissaarineq.
  • Sullivimmi avatangiisit pillugit suleqatigiinnik, SULISUnik Peqqinnissaqarfiullu qullersaanik siunnersuinissaq ikorfartuinissarlu siunertaralugit paasissutissanik katersineq misissueqqissaarnerlu.
  • Sullivimmi avatangiisinik naliliinernik sullivimmilu iluarisimaarinninnermik misissuinernik ataqatigiissaarineq taakkununngalu atatillugu immikkoortuni ingerlalluarneq sullivimmilu avatangiisinut tunngasut pillugit immikkoortuni oqaloqatigiinnernik siuarsaaneq, kiisalu immikkoortuni ingerlalluarnermut tunngatillugu immikkut unammilligassalinni siunnersuineq.
  • Sullivimmi avatangiisit – isumannaallisaanerlu pillugit immikkoortuni maleruaqqusanik, ilitsersuutinik maleruagassanillu suliaqarneq
  • Sullivimmi ajoqusernerit pillugit sulianik ingerlatsineq, nalunaarutit pitsaassusissaannik qulakkeerineq malitseqartitsinerlu.
  • Sullivimmi avatangiisinut tunngasuni pikkorissaanernut naapertuuttunut ass. nikisitsisarnermut sullivimmillu aaqqisuussisinermut tunngatillugu periarfissiinissamik siunnersortinnissamillu qulakkeerineq.

Qullersanik allatseqarnikkullu kiffartuussineq

Qulaani pineqartunut tapiliullugit allatseqarfimmi suliassat nalinginnaasut ingerlanneqarnissaannut nalinginnaasumik peqataasussaassaatit. Taamaalilluni nukissatigut nalimmassaajuarnissaq tamatsinnit qulakkeerneqarsinnaaqqullugu, sulininni eqaatsumik periuseqarnissannik piumasaqaatitaqarpoq. Taamaammat qinnuteqartut qullersanik – allaffissornikkullu kiffartuussinermut tunngasunik soqutigisaqartuunissaat piginnaaneqartuunissaallu soqutigisaraarput.

Qullersanik - allatseqarnikkullu kiffartuussinermi suliassat ilaatigut makkuupput:

  • Pilersaarusiornikkut ataatsimiinnissanullu tunngasutigut Peqqinnissaqarfimmi qullersanik ikorfartuineq
  • Sulisunut ataasiakkaanut nalinginnaasumillu sulisoqarnermut tunngasut pillugit aqutsisunik sullissineq
  • Saaffiginnissutinut assigiinngitsunut akissuteqarneq sulianillu ingerlatsineq
  • Aalajangiivigisassanik siunnersuusiorneq, iliuusissatut siunniussanik suliaqarneq allakkiornerlu

Allatseqarfimmi suliassat kivissinnaajumallugit suleqatigiinnut pingasunut agguataarnikuuvugut. Atorfinittussaq attaveqatigiinnermut ingerlaluarnermullu suleqatigiinniissaaq.
               
Ilinniakkat akimorlugit siunersioqatigiinneq suleqatigiinnerlu

Qullarsanut allatserqarfimmi siunnersuisoqatigiinnut ilaassaatit, suleqatissatit qanimut suleqatigissallugit tamatumalu saniatigut Peqqinnissaqarfimmi qullersat Peqqinnissaqarfimmilu sullivimmi avatangiisit pillugit aqutsisut sullivimmilu avatangiisit pillugit sullissinermi sinniisuutitat qanimut suleqatigissallugit.

Suleqatikkuminartuussaatit sullivimmilu angisuumi paasilertoruminaatsumilu sulineq qanoq ittuusoq malugisinnaassallugu. Peqqinnissamut tunngasunik ilisimaarinnittut salliunneqassapput. Suliarpassuit ataatsikkut ingerlattarpavut tamannalu iliuuseqarfigisinnaassavat. Sullivimmi ingerlalluarnissap ilorrisimaarnissallu qulakkeernissaat suliniutigaarput ilinniakkallu akimorlugit sullivimmi pitsaasunik avatangiiseqarluta.

Ilisarnaatitit

Nammineersinnaassuseqarputit, aaqqisuussamik nammineerlutit suleqatinillu allanik pikkorissunik tunniusimasunillu peqateqarlutit, iluatsilluartumik suleriaaseqarlutit suliniutit naamassisinnaallugit.  Ataatsimut isiginnissinnaaneq attassinnaavat suliassatillu immikkuualuttortaat ilanngullugit pingaarnersiorlugit tulleriiaarsinnaallugit.
Akuuffigisani suleqatigiiaanilu assigiinngitsuni ajornartorsiutinik aporaaffiusinnaasunillu avaqqutaarisinnaassaatit, siunnersuineq, pilersaarusiorneq sulianillu aallartitsineq sungiusimassallugit.

Kiffartuussiumatuujunissaq suleqatikkuminartuussarlu pingaaruteqarput, taamaammallu misigittassuseqarlutit, tatiginassuseqarlutit, siunnerfilimmik paasiniaasinnaallutit, attaveqateqarsinnaallutit aallarnisaasinnaassaatit.

Makku piginnaaneqarfiginissaat kissaataavoq:

  • Naapertuuttumik qaffasissumik ilinniagaqarneq aamma / imal. peqqinnissamut tunngasumik ilinniagaqarneq, ajornanngippat sullivimmi avatangiisinut tunngatillugu qaffasinnerusumik ilinniaqqinnertalik imal. sullivimmi avatangiisit pillugit sulinermik misilittagaqarnermik ilalik.
  • Sullivinnik Nakkutilliisoqarfiup nakkutilliinermi periusaanik sullivimmilu avatangiisit pillugit inatsimmik ilisimaarinninneq, imal. taama piginnaasaqalernissamik soqutiginninneq.
  • Illugiinnik oqaaseqartuuneq (kal./qall.) iluaqutaassaaq piumasaqaataananili.

Suliffiit

Qullersaqarfiup allatseqarfia/Pitsaassuserlu aaqqisuussaanikkut Kalaallit Nunaanni Peqqinnissaqarfiup ataani qullersanut siunnersuisoqarfiuvoq. Maanna sulisut quliuvugut suleqatigiiaanut pingasunut nunatsinni Peqqinnissaqarfimmi qullersat allaffiisa inissisimaffiannissaaq tamarmik immikkut allaffimmi ataatsimoortunut agguataarsimasut. Illit aaqqisuussaanikkut allatseqarfimmi pisortap ataani inissisimassaatit.
 
Persuarsiortuunnginneq – inuttut ilinnigaqassutsikkullu suleqatikkuminartuusinnaaneq pingaartippagut. Angusaqarusussusilimmik, qiimasumik nukissaqarluartumillu suleqatitaarusukkatta suliffik pissanganartoq assigiinngitsunik suliassaqarfiusoq, ilinniagaqassutsikkut inuttullu ineriartornissamut pitsaasunik periarfissalik neqeroorutigaarput.
 
Sulinngiffeqarneq
Danmarkimi kommunini naalagaaffimmilu atorfillit Namminersorlutik Oqartussani atorfininnissamut atatillugu killiligaanngitsumik sulinngiffeqartitaasinnaanermut pisinnaatitaaffeqarput.
 
Paasissutissat allat
Atorfik pillugu paasisaqarnerorusukkuit allaffimmi aqutsisoq Else-Marie Brødsgaard oqarasuaat +299 34 47 00 imalt. e-mailikkut embr@peqqik.gl attavigisinnaavat.
 
Kalaallit Nunaanni Peqqinnissaqarfik pillugu uani annertunerusunik paasisassarsiorsinnaavutit: www.peqqik.gl aaqqisuussaanermullu tunngasoq: https://peqqik.gl/Footerpages/Til-fagpersoner
 
Qinnuteqarneq
Qinnuteqarfissatut killiliussaq 15. decemberi 2021.
Qinnuteqartunik oqaloqateqarnerit sap. ak. 50-imi 51-imilu ingerlanneqarnissaat naatsorsuutigineqarpoq.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk