Gå til hovedindhold
97

Dette jobopslag er udløbet

Pitsaaliuinermut Isumaginninnermullu Aqutsisoqarfik isumaginninnermi siunnersortinik/siunnersortinik pimoorussisunik ujaasivoq

Pitsaaliuinermut Isumaginninnermullu Aqutsisoqarfik isumaginninnermik siunnersortinik/siunnersortinik pingasunik meeqqanik inuusuttunillu atugarliortunik suliassaqarfimmi misilittagalinnik isumaginninnerullu tungaatigut pitsaasumik allannguerusuttunik ujaasivoq. Oqartussat suliassaqarfianni isumaginninnermut siunnersorti ataaseq ingerlatsiviullu suliassaqarfianni isumaginninnermut siunnersortit/siunnersortit marluk pingaarnertut ujartorneqarput.
Atorfiit Qitiusumik Siunnersuisarfimmi inissisimapput, taakku ilaatigut kommunit ingerlatsiviini inatsisitigut isumaginninnermillu suliaqarnermut ikiuuttarpoq oqartussaasunullu meeqqanik inuusuttunillu atugarliortunik sullissisunut tunngatinneqarluni.
 
Qitiusumik Siunnersuisarfimmi oqartussani ingerlatsivinnilu sullissisunut siunnersortinnerit ilitsersuunneqarnerillu kiisalu meeqqanik inuusuttunillu atugarliortunik suliassaqarfimmi supervisioni neqeroorutigineqartarpoq.
 
Taamatuttaaq immikkoortortami innuttaasunut neqeroorutit, soorlu kinguaassiutitigut kannguttaatsuliornermut tunngatillugu angalaqatigiit, Oqarasuaatikkut siunnersuisarfiit Tusaannga aamma Alliaq isumagineqartarput.
 
Immikkoortumut ineriartortuartumut ataqatigiilluartumullu pissaatit.
Sulininni suliassatit ilaatigut makkuussapput:

  • Meeqqanik inuusuttunillu sumiginnagaasimasunut aamma/imaluunniit kinguaassiutitigut atornerlunneqarsimasunut sullissisunut attuumassutilinnut kommuninullu tunngatillugu suliani aalajangersimasuni ilitsersuisarneq siunnersuisarnerlu.
  • Sanileralugu ilinniartitsineq/ sulianut tunngatillugu ikiorsiisarneq
  • Suliffiup iluani avataanilu sulianut arlalinnut tunngasutigut suleqatigiinnernik isumaqatigiissuteqartarneq.
  • Ataqatigiissaarisarneq.
  • Immikkoortortaqarfik suleqatigalugu isumaginninnermi sulianut tunngasutigut ilisimasanik, periutsinik suliniutinillu ingerlaavartumik nutarterineq.
  • Ilisimasanik katersisarneq ingerlatitseqqittarnerlu
  • Supervisioni/pikkorissartitsinerit

 
Naatsorsuutigaarput illit:

  • Isumaginninnermi siunnersortitut ilinniarsimasuussasutit, imaluunniit allamik naleqquttumik ilinniagaqarsimassasutit.
  • ajornanngippat isumaginninnermi suliassaqarfinni ilinniaqqinnikuusimaneq (oqartussani aamma/imaluunniit ingerlatsivinni)
  • immikkoortut akunneranni suleqatigiittarnernik ilisimasaqarluartutit
  • ataqatigiissaareqqissuullutillu suleqatikkuminartutit
  • nammineersinnaassuseqartutit, aaqqissuisinnaassuseqartutit aamma tamakkiisumik paasinnittumik aaqqiissuteqarsinnaassuseqartutit
  • marluinnik kalaallisut danskisullu oqaaseqartuusutit.

 
Suliffik suliatigut ineriartornissamut periarfissaqarfiulluartoq, assigiinngitsunik suleqaterpassuaqarfiusoq aamma suliaqarfimmi meeqqanik inuusuttunillu sumiginnagaasimasunik sullissisarnermik pitsanngorsaallutik suliaqartunik suleqateqartarfiusoq neqeroorutigisinnaavarput.
 
Angalasarsinnaanissaq pillugu
Atorfimmut atatillugu naatsorsuutigineqassaaq piffissap ilaani angalasaqattaarsinnaanissaq.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.
 
Paasissutissat sukumiinerusut
Atorfiit pillugit paasisaqarnerorusukkuit immikkoortortaqarfimmi pisortaq Arnajaraq Poulsen oqarasuaatikkut attaviginissaanut tikilluaqqusaavutit. +299 34 60 14 imaluunniit e-mailikkut apou@nanoq.gl attavigiuk.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk