Gå til hovedindhold
174

Dette jobopslag er udløbet

Nuna tamakkerlugu Ilitsersuisarfimmi inerisaanermi siunnersortit marluk

Nunatsinni ilitsersuisarnermut atatillugu inerisaanermi siuarsaarusuppit? Ilitsersuisut/aqqutissiuisut, inuusuttut siunissaminnut eqqortunik toqqaanissaannut ikiuussinnaanngorlugit, ilitsersuinermi sakkussanik inerisaanermi siuttoorusuppit?


Nuna tamakkerlugu Ilitsersuisarfik inerisaanermi siunnersortitut atorfinnik marlunnik, Nuummi aallaaveqartussanik sulisussarsiorpoq. Atorfiit aqqutissiuussinermi immikkoortortaqarfimmi inissisimapput, suliaralugit aqqutissiuussinermik inerisaaneq.. Suliniutinik aqutsinninermik inerisaanermi siunnersortit suleqatigiit  sisamaassapput. Ilitsersuisarfiup pisortaa qullersarissavaat.

Ilitsersuisarfik 19-inik sulisoqartussiaavoq tamattalu assigiinngitsunik tunuliaqutaqarpugut, ass. inerisaanermi siunnersorteqarpugut, tarnip pissusaanik immikkut ilisimasallit, tarnikkut katsorsaasut, allaffimmiut assigiinngitsunik tunuliaqutallit assigisaallu. Ilitsersuisarfik aaqqissuussaanikkut Ilinniartitaanermut, kultureqarnermut, Ilageeqarnermullu Naalakkersuisoqarfiup ataani inissisimavoq. Ilitsersuineq/aqqutissiuussineq naliliiviginiarlugu inerisarniarlugulu, kiisalu ilinniarfinni assigiinngitsuni ilitsersuisut ilinniartitaaneranni pikkorissaanernillu neqeroornissaq siunertaralugu Ilitsersuisarfik pilersitaavoq. Tamatuma saniatigut Nuna Tamakkerlugu Ilitsersuisarfik, inuttut atukkatigut tarnillu pissisaanut tunngatillugu, ilinniartunik siunnersuisarpoq.

Ilitsersuisarfik inerisaanermi siunnersortinik tamatigoortunik, siumut isigisumik iliuuseqarsinnaassusilimmillu, ilinniarfinni ilitsersuinermik/aqqutissiuussinermik suliniutinillu assigiinngitsunik, kiisalu ilinniartitaanerit immikkoortuini assigiinngitsunik inerisaanermik ataqatigiinnermillu pilersitseqataanissamik qulakkerisussamik pissarsiorpoq. Nunanik Avannarlernik suleqateqarneq Ilitsersuisarfimmit pissarsiviusinnaanngorlugu, inerisaanermi siunnersortip Nunani Avannarlini suleqatigiinnermi akuusinnaanissaa naatsorsuutigineqarportaaq. Taamaammat nunatsinni nunanullu allanut angalasarnissaq naatsorsuutigineqarpoq.

Kikkut tamat periarfissanut nutaanut allannguutinullu tunngatillugu ilisimasatigut nutarteriviginiarlugit, nunatsinni ilinniarfinni assigiinngitsuni ilitsersuisunik ilitsersuinerup ilaa, inerisaanermi siunnersortip isumagisassaraa.

Naalakkersuisoqarfinnik ilinniartitaanermut inuussutissarsiutinullu tunngassuteqartunik qanimut suleqateqarnikkut, suliaq ingerlanneqassaaq.  

Suliassat makkuupput:

  • Ilitsersuinermut atatillugu inerisaanermi suliniutinik aqutsineq
  • Majoriami ilinniarfinnilu ilitersuisut/aqqutissiuussisut, nunatsinni Danmarkimilu ilinniartitaanerni maleruagassanik atuuttunik ilisimasaqarnissaannik qulakkeerineq
  • Ilitsersuisut qaffasinnerusumik ilinniagaqarniarlutik qinnuteqartunik sukumiisumik ilitsersuisarnissaannik qulakkeerineq
  • Meeqqat atuarfiisa Majoriallu akornanni suleqatigiinnermik qulakkeerineq inerisaanerlu
  • Majoriap ilinniarfiillu qarasaasiarsornermi nalunaarsuinermi sullississummik atuinerannik qulakkereqataaneq (IT-reg)
  • Pikkorissaanissat suleqatigiissuteqarnerillu /workshops pilersaarusiornerini ingerlatsinermilu peqataaneq
  • Attaveqatigiinni ataatsimiinnernik ingerlatsineq pingaarnersiuillunilu tulleriiaarineq 
  • Ajornartorsiutinik ujartuineq qulaajaanerlu
  • Atuartunut, ilinniartunut ilitsersuisunullu ilitsersuinermi atortussanik inerisaanermi peqataaneq
  • Ilitsersuinernut atatillugu siunertanut aalajangersimasunut tunngatillugu suliassanik isumaginninneq
  • Pisariaqarpat ilitsersuisutut tunngaviusumik ilinniartitaanermi taassumunngalu atatillugu modulini ingerlaqqiffinni pikkorissaanernilu ilinniartitseqataaneq

Nalinginnaasumik naatsorsuutigineqarpoq:
  • Ajornanngippat qaffasissumik ilinniagaqarsimaneq, ilitsersuisutut tunngaviusumik ilinniagaqarnermik ilaqartoq, piumasaqaataanngilarli
  • Qarasaasiakkut inerisaaneq/qarasaasiarsorsinnaaneq, pilersuisunillu avataaneersunik isumaqatiginninniarsinnaaneq 
  • Nunanik Avannarlernik suleqateqarnermik misilittagaqarneq, piumasaqaataanngilarli
  • Ilinniartitaanernik ilisimaarinnilluarneq ilitsersuinermillu soqutigisaqarneq
  • Ataatsimut isiginnissinnaassuseqarneq piffissamillu ilungersortitaalluni sulisinnaaneq
  • Naalakkersuisoqarfiit arlallit qanimut suleqatigalugit kiisalu ingerlatami paasilertoruminaassinnaasumi eqikkaasinnaaneq
  • Namminersorluni sulinermik, suliniutip suunera apeqqutaatillugu assigiinngitsunik suleqateqarnermik suleqatigiinnilu ilaanermik nikerartitsinermik nuannarisaqarneq
  • Ammasuuneq inussiarnersuunerlu kiisalu nammineq iliuuseqarsinnaaneq
  • Kalaallisut, danskisut tuluttullu oqaatsitigut allattariarsornikkullu piginnaaneqarluarneq

Qinnuteqarfissaq kingulleq:
Qulaani paasissutissat soqutiginnilersissimappatsit imal. atorfik pillugu paasissutissanik annertunerusunik pissarserusukkuit, Ilitsersuisarfiup pisortaa Christine Tønnesen oqarasuaatikkut: +299 346880, imal. e-mailikkut: chto@aqqut.gl attavigeriaannaavat.

Qinnuteqaat Nuna Tamakkerlugu Ilitsersuisarfimmit kingusinnerpaamik majip ulluisa 8-ni 2019 tiguneqareersimassaaq. Qinnuteqarfissap kingulliup kinguninngua qinnuteqartunik oqaloqateqarnissat ingerlanneqarnissaat naatsorsuutigineqarpoq.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk