Gå til hovedindhold
106

Dette jobopslag er udløbet

Illit suleqatissarput nutaaq Naalakkersuisut Siulittaasuata Naalakkersuisoqarfiani?

Siulersuisunititaqarnermut Allattoqarfik
Kalaallit Nunaanni Namminersorlutik Oqartussat aktiaateqarluni ingerlatseqatigiiffinnik 14-inik tamakkiisumik ilaannakuusumilluunniit piginnittuupput, taakkunani siunertarineqarlutik aalisarnermiit pisiniarfinniit niuernermut, attaveqaqatigiinneq, inissianik allaffissornikkut aqutsineq, nioqqutissanik pilersuineq, ilaasunik angallassineq, takornariaqarneq aamma inuussutissarsiutinik ineriartortitsineq. Ingerlatseqatigiiffiit ukiumut 10 mia. koruunit sinnerlugit katillugit kaaviiaartittarpaat
Naalakkersuisut (Kalaallit Nunaata naalakkersuisui) piginnittuunertik Siulersuisuniititaqarnermut Allattoqarfikkut piginnittuunertik ingerlataraat. Siulersuisuniititaqarnermut Allattoqarfik aaqqissugaanikkut Naalakkersuisut Siulittaasuata Naalakkersuisoqarfiata ataanni inissisimavoq.
Siulersuisuniititaqarnermut Allattoqarfiup aktiaateqarluni ingerlatseqatigiiffinnut Namminersorlutik Oqartussanit tamakkiisumik ilaannakortumilluunniit pigineqartunut tunngatillugu Naalakkersuisut ilitsersuinerisigut piginnittuuneq ingerlataraa. Suliassat ilaatigut makkuupput:

  • Immikkoortukkaanut politikki naapertorlugu ingerlatseqatigiiffinnut ataasiakkaanut ataatsimut isigalugu piginnittup politikkimut tunngatillugu killiliussassaanik aamma piginnittup ilioriusissaliussassaanik suliaqartarneq.
  • Ingerlaavartumik paasissutissanik katersisarneq aammalu ingerlatseqatigiiffiit aqutsisuinik oqaloqateqartarnerit kiisalu ingerlatseqatigiiffiit naatsorsuutaannik, ilioriusissaannik, ingerlatsinermut pilersaarutaannik assigisaannillu misissueqqissaarnerit.
  • Immikkut ittumik nassuiaasersorsimasunik suliniutinut tunngatillugu ataqatigiissaarisuuneq aamma suliniutinut aqutsisuusarneq, tamakkunani suleqatigiissitaliaasimasunut innersuussisoqarsimatillugu aamma suliniutini nammineerluni arlaatigut aalajangiisinnaassuseqartitsisoqartillugu.
  • Ingerlatseqatigiiffiit tamakkiisumik ilaannakuusumilluunniit pigineqartut 14-it ataatsimeersuarnissaannik piareersaasarnerit aamma ingerlatseqatigiiffiit naatsorsuutaannik, ilioriusissaannik, ingerlatsinissamut pilersaarutaannik il.il. naliliisarluni misissuinerit oqaaseqarfiginnittarnerillu taamatuttaaq tamakku pillugit Naalakkersuisunut nalunaarusiortarnerit. Tamakkununnga atatillugu ingerlatseqatigiiffiit siulersuisuisa/pisortaqarfiisa, Namminersorlutik Oqartussani atorfillit aamma Naalakkersuisut Siulittaasuata akornanni annertuunik ataqatigiissaarisoqartassaaq.
  • Siulersuisuniititaqarnermut Allattoqarfiup suliassaanut tunngatillugu inatsisilerinikkut siunnersuisarnermut akisussaaneq.
  • Oqalugiaatissanik, saqqummiussissutissanik, ilisimatitsissutinik taamatullu aalajangiinissamut tunngavissianik suliaqartarneq.
  • Naalakkersuisoqarfimmi qullersatut aqutsisunik taamatullu inatsisileriffimmi pisortamik inatsisilerinermut tunngatillugu pingaartumik ingerlatseqatigiiffinnut inuussutissarsiornermullu tunngatillugu inatsisilerinermut tunngasunik siunnersuisarneq isummersueqataasarnerlu.
  • Immikkoortukkaanut politikki naapertorlugu ingerlatseqatigiiffinnut ataasiakkaanut ataatsimut isigalugu piginnittup politikkimut tunngatillugu killiliussassaanik aamma piginnittup ilioriusissaliussassaanik suliaqartarneq. Namminersorlutik Oqartussani Naalakkersuisoqarfiit akornanni aktiaateqarluni ingerlatseqatigiiffiit Namminersorlutik Oqartussanit tamakkiisumik ilaannakuusumilluunniit pigineqartut pillugit nassuiaatit suliarineqarnerinut peqataasarneq ataqatigiissaarisarnerlu.

Piginnaasassat
Naleqquttumik ilinniagaqarsimassaatit soorlu assersuutigalugu imatut cand.jur., cand. oecon. imaluunniit cand. merc. naleqquttumik inuussutissarsiutilerinermik misilittagaqarlutit. Kalaallit Nunaanni pissutsinik ilisimasaqarluaruit iluaqutaasaaq.

Makkuninnga piginnaaneqassasutit naatsorsuutigaarput:

  • Inuussutissarsiutilerinermik misilittagaqarneq taamatullu inuussutissarsiornermut inatsisilerinermullu tunngatillugu suleriaatsinik paasisimasaqarneq.
  • Suliassanik assigiinngiiaartumik amerlasuunik nammineerlutit suliaqartarsinnaassasutit.
  • Suliniutinik aqutsinermut misilittagaqarneq.
  • Naalakkersuinermut tunngatillugu aaqqissuussaanermi tusagassiorfinnit sammineqakkajoqisumi sulerusussuseqartutit.
  • Allattariarsornermi pitsaasunik piginnaaneqartutit taamatullu naatsunik erseqqissunillu oqaasertalersuisinnaassuseqartutit.
  • Nalilersuilluni misissuisarnermut misikkarissuusutit paasisimannittuullutillu.
  • Allaffissornikkut aqutsinermi taamatullu aktiaateqarluni ingerlatseqatigiiffinni Namminersorlutik Oqartussanit pigineqartuni sutigut tamatigut sulisunik pisortallu sinniisaannik pitsaasumik suleqatiginnissinnaasutit.
  • Immikkoortoqarfiup ineriartortinneqartuarnissaanut suliumassuseqartutit ikiuukkusullutillu.

Neqeroorutigisinnaavagut:
Sulisunut pimoorussillutik suleqatigiinnut ilanngutissaatit, ulluinnarni suleqatigiillutik suliatigut pitsaasumik naammassisaqarnissaminnut akuersaarnissamut piumassuseqartunut. Neqeroorutigaavut:

  • Inatsisilerinermi assigiinngitsorpassuartigut, inuussutissarsiornermi aningaasaqarnikkut naalakkersueqatigiinnikkullu suliassat.
  • Nammineq sulianut suliniutinullu akisussaassuseqarneq.
  • Suliamut namminermullu tunngatillugu ineriartornissamut periarfissat pitsaasut.
  • Pisariaqartitsineq namminerlu kissaatigisat malillugit ilinniaqqinneq.


Qinnuteqaat
Atorfik pillugu apeqqutissaqaruit immikkoortortaqarfiup pisortaa Lars Balslev mail laba@nanoq.glimaluunniit oqarasuaat + 299 34 51 27 /+299 52 27 77 atorlugit attaveqarfigiinnassavat.

Qinnuteqaatit tigoreersimassavarput kingusinnerpaamik ulloq 24. april 2019.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk