Gå til hovedindhold
137

Dette jobopslag er udløbet

Saqqummersitanik ilusilersuisussamik

Nunatta Katersugaasivianut saqqummersitanik ilusilersuisussamik pissarsiorpugut
Nunatta Katersugaasivia Allagaateqarfialu saqqummersitanik titartaalluni ilusilersuisussamik ullup affaani sulisartussamik 1. februar 2019 aallarnerfigalugu sulilersinnaasumik pissarsiorpugut.

Saqqummersitanik ilusilersuisup titartaasartullu suliassaasa pingaarnerit ilagaat saqqummersitsineq aallartisannginnerani saqqummersitassaq 3D-nngorlugu ilusilerlugu titartarnissaa isumagissallugu. Suliassaq tamanna katersugaasivilerisut allagaaserisullu qanimut suleqatigalugit ingerlanneqartassaaq. Saqqummersitanik ilusilersuisup saqqummersitassat toqqorsivinniittut assilillugit titartarlugit piareersaasassaaq. Saqqummersitanik ilusilersuisoq tamatigoortuussaaq saqqummersitassallu assilillugit ilusilersuisinnaassaaq allanillu suleqateqarluni saqqummersitassaq ilusissaa eqqorlugu napparsinnaassallugu. Taamatuttaaq saqqummersitat qullilersornerini saqqummersitassat aserfallannginnissaat qulakkeerlugu qulliit innarliinaveerlugit qanoq qaamatiginissaat akisussaaffigissavaa. Atorfinittussaq titartaasartutut ilinniarsimasuunissaa kissaatigaarput, taamatuttaarlu kissaatigalugu saqqummersitsinerni allani ilusilersuinermik titartaanermillu misilittagaqarsimanissaanik.

Qinnuteqartussaq teknikkikkut atortunik pikkoriffeqassaaq, 3D-nik titartaavinnik
pisinnaasaqassalluni, ilusilersuinermik allatigullu saqqummiisinnaanermut periarfissanik
tikkuussisinnaallunilu sulisinnaassalluni. Saqqummersitsinermi ilusilersuisussaq titartaasartussarlu ullup affaani sulisartussanngorlugu isumaqatigiissusiorfigineqassaaq Nunatsinni inatsisit atorfinitsitsisarnermut tunngasut malillugit.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.