Pinngortitamik attassinermut piujuartitsisumillu ineriartortitsinermut tunngatillugu aqutsinissamut suliniuteqarnermillu ineriartortitsinissamut kajumissuseqaruit aamma Kalaallit Nunaanni pinngortitaq kulturilu uummateqarfigigukkit, taava immaqa illit sulisorerusuppatsigit.

 

WWF Pinngortitaq pillugu nunarsuaq tamakkerlugu suliniaqatigiiffik ukiuni kingullerni Kalaallit Nunaanni ingerlatatsinnik annertusaangaatsiarpoq aamma Kalaallit Nunaanni suliniuteqarnerup nukittuumik nammineernerusumillu ingerlanneqarnissaanik pilersitsinissaq anguniarneqarpoq. Taamaammmat suliniummik aqutsisussamik, Nuuk angerlarsimaffigalugu WWF-ip Kalaallit Nunaanni ingerlataanik aqutsisussamik, ineriartortitsisussamik annertusaasussamillu pissarsiorpugut.

 

Nuummi qitiusumik allaffeqarpugut suliniutillu nutaat aallartinneqarnissaminnut piareersimapput, suliniutit suleqateqarnerillu aqqutigalugit nukittunerusumik najukkami tunngaveqarnissaq kiisalu Kalaallit Nunaanni pinngortitamik attassinermut piujuartitsisumillu ineriartortitsinermut tunngatillugu sulinitta annertusarnerunissaanut nutaanik aningaasalersuisoqarnissaata qulakkeernissaa anguniarneqarput.

 

Kalaallit Nunaanni suliniuteqarneq Nuummit aqunneqassaaq. Suliniummik aqutsisutut sammiliviissaatit, nutaanik suleqatissanik inerisaassaatit nunalu tamakkerlugu suliniutinik piviusunngortitsinissamik qulakkeerinnissaatit. Pinngortitaq pillugu nunarsuaq tamakkerlugu suliniaqatigiiffiup WWF-ip allaffia Københanvimiittoq WWF-illu issittumi nunani allani allaffiini sulisut ulluinnarni qanittumik attaveqarfigineqassapput. Pinngortitaq pillugu nunarsuaq tamakkerlugu suliniaqatigiiffiup aqutsisoqatigiivisa ataanni atorfeqassaatit nunanilu tamalaani WWF-imi suleqatinit siunnersorneqarlutit. Maanna sulisumut ataatsimut, piffissalli ingerlanerani sulisunut marlunnut amerlinissaannut naatsorsuuteqarfiusumut suliniuteqarnermi sulisunut akisussaassaatit.

 

Suliniummut aqutsisumik makkuninnga piginnaasalimmik misilittagalimmillu suleqatissarsiorpugut:

• Kalaallit Nunaanni pinngortitamik inuiaqatigiinnillu ilisimasaqarluartoq. Pinngortitaq pillugu aqutsinermik suliaqareerputit imaluunniit Kalaallit Nunaanni suliniaqatigiiffiit ilaanni misilittagaqareerlutit.
• Kalaallit Nunaanni inuiaqatigiit akornanni suliniaqatigiiffinnik, sullissivinnik suliffeqarfinnillu nutaanik suleqateqalernissamut suleqatiginnillaqqissoq.
• Sulisunik misilittagaqarluartunik sulisoqarnikkut aqutsinissamut annertuumik misilittagalik.
• Suliniuteqarnermik ineriartortitsineq aningaasaliisussarsiornerlu qitiutillugit suleqatit suleqatiginerisigut isumassarsianik suliniutinut tigussaasunut piviusunngortitsisinnaasoq
• Suliniutinik ingerlatsinermi suliassatigut misilittagalik, suliniutinillu aqutsinermik ilinniagaqarnermut ataqatigiissinneqarsinnaappat iluassaaq.
• Ungasianiit aamma suliniaqatigiiffiit assigiinngitsut akornanni suleqateqarnissamik nuannarisaqartoq
• Sulisoqarnikkut suliniuteqarnikkullu aqutsinermut atatillugu allaffissornikkut suliassanik isumaginnissinnaalluartoq (missingersuusiorneq, malittarinninneq nalunaarusiornerlu, sulisunik oqaloqateqarnerit (MUS) ulluinnarnilu aqutsineq).
• Tuluit qallunaallu oqaasiinik oqaluttariarsornikkut allattariarsornikkullu atuilluarsinnaanissat naatsorsuutigineqarpoq, qinnuteqartullu kalaallisut oqalussinnaasut salliutinneqassapput

 

Inuttut akisussaassuseqartuuvutit angusaqarnissamillu pingaartitsillutit, tamatumunngalu peqatigitillugu suliat amerlasuut ataatsikkoortillugit ingerlannissaannut piginnaasaqarlutit. Suliniuteqallaqqissuuvutit namminersorlutillu sulisinnaallutit, aamma nunani tamalaani NGO-mi sulinerup eqaatsumik suleriaaseqarnissamik suleqatiginnillaqqinnissamillu pisariaqartitsinera ilisimavat. Kiisalu suliatigut immikkut ilisimasalittut, suliniuteqarnermi aqutsisutut Nuummilu allaffimmi ulluinnarni aqutsisutut suliaqarninni suliassat assigiinngissitaartuuneri kajuminnartippatit.

 

Neqeroorutigaavut:

• Nunani tamalaani suliniaqatigiiffimmi eqeersimaartumi suliffik unammilligassaqarfiusoq allanngorarfiullunilu aalajangeeqataasinnaatitaaffiulluartorlu
• Suliniuteqarnermik aaqqissuussaanermillu ineriartortitseqqinnissamut periarfissaq imaannaanngitsoq
• Sulinermi avatangiisit isumassarsiorfiulluarsinnaasut, suliat akimorlugit suliaqarfiusoq pikkorissunillu tunniusimalluartunillu suleqateqarfiusoq
• Issittumi naalagaaffiit akimorlugit suleqatigiit suliatigut nukittuut attaveqarfigineri
• Kalaallit Nunaanni innuttaasunut, pinngortitamut kulturimullu tunngatillugu allannguinissamut periarfissatsialak

Atorfik Kalaallit Nunaanni Nuummi aalajangersimasumik inissisimalluni atorfiuvoq piaarnerpaamillu inuttalerneqarusulluni. Sulinermut atatillugu Danmarkimut ilaatigullu nunanut issittumiittunut allanut angalasarnissaq (ukiumut marluk-pingasut) naatsorsuutigineqassaaq.

Soqutiginnippit? CV aamma qinnuteqaallu kajumissuseqarpaluttoq naatsunnguaq kingusinnerpaamik 6. februar 2023 nassiutikkit. Uunga qinnuteqarsinnaavutit:

https://wwf.recruitio.dk/selection/wwf_verdensnaturfonden_soger_erfaren_leder_til_gronlandskontoret-3896/?lang=da&from=career_page

 

 Ingerlaavartumik oqaloqatiginnikkumaarpugut.

Atorfimmut tunngatillugu apeqqutit nutaaliornermi pisortamut Jacob Fjallandimut (j.fjalland@wwf.dk) apeqqutigineqarsinnaapput.

World Wide Fund for nature (WWF) nunarsuarmi avatangiisit pillugit suliniaqatigiiffiit annersaraat sunniuteqarnersaallunilu, tassani inuup pinngortitamik paarinnilluni inuunissaa sulissutigaarput. Ilisimasat toqqammavigalugit suliniaqatigiiffiuvugut, aaqqiissutissarsinissaq angusaqarluarnissarlu siunertaralugit inuiaqatigiinni immikkoortuni tamani suleqateqarluta. WWF Pinngortitaq pillugu nunarsuaq tamakkerlugu suliniaqatigiiffik WWF-ip Danmarkimi immikkoortortaqarfigivaa nunarsuarmilu attaveqaqatigiinnut nunani 100-nit amerlanerusuni sinniisoqartunut ilaalluni. Københavnimi allaffimmi sulisut 75-it missaanniipput