Skip to main content
115

Danmarkshavnimut igasussarsiorneq

TELE Greenland A/S isumaqatigiissuteqarneq naapertorlugu atorfinittussamik Danmarkshavnimut igasussarsiorpoq.

 

Suliassaqarfiit

Suliassat pingaarnertut tassaapput ullormut pilersaarusiorneq, stationeqarfimmi aalajangersimasumik sulisunut tikeraanullu nerisassiorneq sassaalliinerlu.

Igasup suliassaanut ilaavoq igaffimmik nerisarfimmillu ullormut eqqiaanissaq.

Igasup aammattaaq nerisassaatit suliarineqarnerat isumagisaraa, soorlu nerisassaatit nakkutiginerat naatsorsortarnerilu, kiisalu stationimi aqutsisoq peqatigalugu tapiliussatut inniminniinerit suliarinissaat.

Stationeqarfiup tikeraanut ineeraatai/najugaqarfiutai igasup akisussaaffeqarfiinut aammattaaq ilaapput, soorlumi aamma igasoq ajornanngikkaangat stationeqarfiup ingerlanneqarnerani suliassanut allanut suleqataasassasoq.

 

Piginnaasanut piumasaqaatit

Qinnuteqartussat igasutut ilinniarsimasuussapput, taamatullu suliaqarnermi ikinnerpaamik ukiuni marlunni-pingasuni misilittagaqassallutik.

Stationeqarfimmiinnermi timikkut tarnikkullu nukkittuujusariaqarpoq, eqaatsumik suleriaaseqartariaqarluni suleqatiginnissinnaassuseqassallunilu kiisalu nalinginnaasumik peqqissuseqartariaqarluni.

Sulisut ikiueqqaarnermik assigisaanilluunniit ilinniarsimanermik uppernarsaammik peqarnissaat anguniagaavoq. TELE Greenland A/S-ip pisariaqassusia naapertorlugu qinnuteqartoq taamatut pikkorissarnissaanik qinnuigissavaa, pikkorissarnerlu TELE Greenland A/S-imit akilerneqassaaq.

 

 

 

Atugassarititat immikkut ittut

Sapaatit akunnerinik qulingiluanik sivisussusilikkaartunik stationeqarfimmiittarlunilu/angerlarsimasarnissamut suleqatigiit marluiit sulisassapput, ukiuuneranili sapaatit akunneri 16-iniusassapput stationeqarfik kaperlannera pissutigalugu timmisartumik tikinneqarsinnaasanngimmat.

Angerlarsimanerup nalaani ukiumut ulluni 25-ni feriartoqartassaaq, soorlumi aamma pikkorissarnernut ataatsimiinnernullu kiisalu suliassanik annikinnerusunik suliaqarnernut piffissap 25%-ia angullugu suliaqartoqartassasoq.

Stationeqarfimmi sapaatip akunnerani ulluni arfinilinni sulisoqartarpoq, ullullu arfernat angerlarsimanerup nalaani afspadseriutigineqartarpoq.

 

Stationeqarfimmiinnerup nalaani pisuni immikkut illuinnartuni taamaallaat suliffik qimanneqarsinnaavoq, stationeqarfimmut stationeqarfimmiillu ukiumut nalinginnaasumik tallimariarluni taamaallaat timmisoqartarnera pissutigalugu.

 

 

Akissarsiat atorfinitsinneqarnermilu atugassarititaasut

Immikkut isumaqatigiissuteqarfigineqarluni akissaateqartitsisoqassaaq.

 

TELE-POST-ip stationeqarfimmut aammalu stationeqarfimmiit angallanneqarnermut atatillugu aningaasartuutit tamaasa akilissagai atorfinnut atuuppoq.

Nerisaqarneq najugaqarnerlu stationimiinnerup nalaani akeqanngilaq, malittarisassallu malillugit akileraarutaasussaapput.

 

Stationeqarfimmi atorfinitsinneqarnermut tassaniinnermullu piumasaqaataavoq peqqissutsimut uppernarsaat UK Oil and Gas-imeersumik atuuttumik peqarnissaq. Atorfininnermi aammattaaq piumasaqaataavoq nammineq kigutilerisumiit kigutit ajoquteqannginnerannik uppernarsaammik peqarnissaq. Tamatumunnga aningaasartuutaasimasut uppernarsaatitallit TELE Greenland A/S-imit utertinneqassapput.

Qulaani allassimasut soqutigigukkit stationeqarfimmik aqutsisoq Lars Bo Jensen attavigisinnaavat telefon +299 199161-imut, e-mail labj@telepost.gl.

 

 

Qinnuteqaat:

Atorfik soqutigigukku inussiarnersumik qinnuigaatsigit qinnuteqaatit, CV-t pappialaatitillu allat attuumassuteqartut qupperneq una aqqutigalugu nassiuteqqullugit; https://mkjobtelepost.azurewebsites.net/kl-GL/Details.aspx?VID=2019-07-02  kingusinnerpaamik 25. august 2019.