Skip to main content
138

Dette jobopslag er udløbet

SIK-p aningaasaateqarfiinut siunnersorti

SIK siunnersortissarsiorpoq kattuffiup Nuummi allattoqarfiani suliassat pissanganartut pingaaruteqartullu ilaannik isumaginnittussamik, ulloq 1. aggusti 2021 imaluunniit ullormi allami isumaqatigiissutigineqartumi atorfinittussamik.

 

Atorfiup imarisai:

Siunnersortitaassatta suliassaqarfii ukuussapput:

  1. SIK-p isumaginninnermut aningaasaateqarfiisa ingerlanneqarnerat. Tamatumani suliassanut ilaapput aningaasaateqarfiit pillugit paasissutissiisarneq, qinnuteqaatinik takkuttartunik suliarinninneq kiisalu inuit aningaasaateqarfimmit ikiorserneqartut bilitsissaannik unnuiffissaannillu inniminniisarneq.
  2. SIK-p Sulinngiffeqarluni Angalanermut Aningaasaateqarfiata ingerlanneqarnera. Tamatumani suliassanut ilaapput aningaasaateqarfiit pillugit paasissutissiisarneq, qinnuteqaatinik takkuttartunik suliarinninneq, aningaasaateqarfiup siulersuisuinik sullissineq kiisalu sulinngiffeqarlutik angalasussanngortut bilitsissaannik unnuiffissaannillu inniminniisarneq.

Suliassat assigiinngisitaartorujussuusinnaapput, ullullu tamaasa inunnik qinnuteqartunik oqaloqatissarpaaloqartassaaq isumaginninnermut aningaasaateqarfimmit ikiorserneqarusuttunik imaluunniit feriefondimit angalanissamut aningaasaliiffigineqarsimasunik.

 

Siunnersortitaassamit naatsorsuutigisavut:

  • Naleqquttumik ilinniagaqarsimaneq, ajornanngippat allaffimmi niuernermilu ingerlaqqiffiusumik ilinniagaqarsimaneq.
  • Allaffissornermi misilittagaqarneq.
  • Arlariinnik oqaaseqarneq, kalaallisut-qallunaatut.
  • Nunatsinni inuiaqatigiinnik ilisimasaqarneq.
  • Suliassanut arlariiaanut ataatsikkut malinnaasinnaaneq.
  • Suleqatiginnissinnaalluarneq.
  • Sullissiumatuneq.
  • IT-mik ilisimasaqarluarneq.

 

Neqeroorutigaavut:

  • Suliassat pissanganartut.
  • Suleqatitsialaat.
  • Suliassatigut inuttullu ineriartornissamut periarfissatsialaat.
  • Akissarsiat kajuminnartut.

 

SIK, isumaginninnermut aningaasaateqarfiit aamma sulinnigiffeqarluni angalanermut aningaasaateqarfik pillugit paasissutissat erseqqinnerusut SIK-p nittartagaani www.sik.gl-imi pineqarsinnaapput.

 

Aamma saaffigeriaannaavat allattoqarfimmi pisortaq Bjarne Petersen (bj@sik.gl, tlf. 34 93 15) imaluunniit siunnersorti Inge-Marie Rosing (inro@sik.gl, tlf. 34 93 11).

Qinnuteqaat ilinniarsimanermik suliatigullu misilittakkanik paasissutissanik ilalik kingusinnerpaamik 7. juuni 2021 SIK-mit tiguneqareersimassaaq. Qinnuteqaat allakkatigut uunga nassiunneqarsinnaavoq: Issortarfimmut 11, 3900 Nuuk, imaluunniit e-mailikkut sik@sik.gl-imut, imaluunniit bj@sik.gl-imut.

Qinnuteqarnissat qilanaarivarput!