Skip to main content
77

Dette jobopslag er udløbet

Sermitsiaq.AG-mut nittartagalerisut pisortassaannik

- Kalaallit Nunaanni nutaarsiassanik nittartakkat atuarneqarnerpaartaat suli nuannarineqarnerulersinniarlugu immikkut ittumik suliniuteqarnissamut piareersimavit?

 

- Tusagassiortutut ussassaarutinik klikkerinissamut taarsiullugu nutaarsiassanik sammi­saqarluarneq allaaserisallu pitsaasut aqqutigalugit tamatuma suliarinissaanut anguniagaqarpit?

 

- Nittartakkami aaqqissuisoqarfimmi sulinermik misilittagaqarpit internettimilu tusagassiornermi sammivinnik sakkunillu nutaanik ilisimasaqarpit – imaluunniit nutaarsiassalerinermik suliaqarnermi ittanneruinnarpit unammilligassanik nutaanik misileerusussuseqarluartoq?


- Aaqqissuisoqarfeeqqamilu pigaartutut sulinissamut ilaaffigisassanni nammineerlutit arpaqattaalaartarnissamut piareersimavit?
 

Taava tusagassiorfimmi Sermitsiaq AG-mit ilinnut pissanganartumik atorfiuteqarpugut, nutaarsiassanik nittartagalerisut aqutsisuattut.


Ulluinnarni sammisassaqarfiit soqutiginarnerpaartaasa nalinginnaannginnerpaartaasalu kissaatigineqarsinnaasut ilaannik sammisaqassaatit. Ulluinnaat nunat tamalaat akornanni politikkip najukkamilu sammisat alutornartumik akuleriissinneqarnerannik ilisarnaateqartut. Urani, puisinniarneq nunarsuarmi politikki, pissaanermik atornerluineq, katersortarfinni tusarnaartitsinerit, nunarsuup kiatsikkiartornera, assammik arsarneq, meeqqat sumiginnagaasimasut namminiilivinnissamillu anguniakkaat marlunngornermi ualikkut nutaarsiassatut saqqummersinnaasut ilaminiinnannguaraat.

Naatsorsuutigaarput tamakkuninnga ajornartorsiuterpassuarnillu pisariusunik allanik nakimanak annilaajuillutillu saassunissamut, tamakkualu nutaarsiassalerineq ullormut oqaluuserisassanik pilersitsisuusoq iluaqutigalugu atuartartut paasisinnaasaannik ingerlateqqinnissaannut piginnaaneqartutit. Tamatuma peqatigisaanik innuttaasut akornanni suut soqutigineqarnerannik sammisaqarsinnaanissaq piginnaaneqarfigissavat, assersuutigalugu nittartakkani inuit naapeqatigiittarfiini, Kalaallit Nunaanni innuttaasut tamarluinnangajammik peqataaffigisaanni.

 

Nuummi nutaarsiassanut nittartakkami aaqqissuisoqarfimmi sulissaatit, tassanilu aamma soorunami najugaqartariaqassallutit. Tusagassiorfik piukkunnartumut eqqortumut aningaasarsianik pilerinartunik neqerooruteqarnissamut piareersimavoq. Danmarkimit sinerissamilluunniit aggersuuguit tusagassiorfiup nuunnerit akilissavaa inissannillu naleqquttumik nassaarniarnissannut ikiuutissalluni.

 

Atorfik pillugu apeqqutissaqaruit aaqqissuisuuneq tusagassiorfimmilu pisortaaneq, Christian Schultz-Lorentzen (christian@ag.gl) saaffigisinnaavat.

 

Qinnuteqarnissamut killigititaasoq tassaavoq pingasunngorneq 18. december 1. apriilimilu sulilerneq pissalluni. 1. septemberip tungaanut ullumikkut nittartakkami aaqqissuisuusoq  suleqatigissavat. Piffissami tassani aatsaat aaqqissuisutut pisortatigoortumik atorfeqalissaatit. Taamanikkussamut tusagassiortutut sulissaatit, ikaarsaariarneq pitsaanerpaaq qulakkeerneqarsinnaaqqullugu.

 

Tusarfiginnissat qilanaaraarput.



Tusagassiorfik Sermitsiaq.AG Nuummi illoqarfiup qeqqani inissisimaffeqarpoq, nutaarsiassanillu nittartakkap Sermitsiaq.AG-p saniatigut suliarisarlugit  aviisi tamatigoortoq AG, inuussutissarsiutiut aviisi Sermitsiaq aamma Nuuk Ugeavis. Nutaarsiassanut nittartagaq aaqqissuisoq ilanngullugu tusagassiortunit sisamanit suliarineqartarpoq, tamatumalu saniatigut aviisineersunik tusagassiortunillu namminersortuneersunik saqqummiussaqartarluni.

Nuuk Kalaallit Nunaanni illoqarfiit annersaraat allaffissornikkullu illoqarfiit pingaarnersaralugu 17.000-it missaannik tamaneersunik inuttaqartoq. Tamaani ilorrisimaarutissat nutaaliaasut tamalaat nassaassaapput, aamma ilaqutariinnut, ilaatigut filmertarik, atuagaateqarfik, naluttarfik, paaqqinniffiit atuarfiilllu namminersortut kiisalu pisiniarfissuit, immikkut ittumik pisiniarfiit kalaaliminneerniarfillu, neqinik aalisakkanillu nutaanik Kalaallit Nunaanni pinngortitamit mingutsinneqarsimanngitsuneersunik tuniniaaffiusartoq. Tamatuma saniatigut Kalaallit Nunaanni pinngortitami misigisassarsiornikkut periarfissarpassuupput ilaatigut pisummik angalanerit, qaqqasiornerit, aalisariarnerit, nunarsuarmi kangerloqarfiit annerpaartaasa ilaanni umiatsiamik angalaarnerit, allaallu ukiuunerani sangusaarissanik sisorartarfiit. Københavnip aamma Nuup akornanni angalaneq akunnerit arfinillit sinnilaarlugit sivisussuseqarpoq, akunninneq ilanngullugu, tamannalu ukiualuit ingerlaneranni mittarfik takinerusoq aqqutigalugu toqqaannartumik timmisoqarsinnaalerneratigut sivikinnerulissalluni.