Skip to main content
127

Dette jobopslag er udløbet

Nuummi imaluunniit Aalborgimi systemadministratorissarsiorpugut

Systemadministratoriuit, ilusilersuillaqqissuullutit nutaanillu pissanganartunik suliaqarnissat pilerinartillugu? Suliaqarfimmi siammasissumi IT-kkut aqutsinermik suliaqarnissaq kajungernartippiuk, soorlu assersuutigalugu Internettikkut isumannaallisaaneq, atortulersuutit, attaveqaatit, Citrix, Office365? Taava immaqa illerpiaq Royal Arctic Linemi System Engineerinik suleqatigiinni angusaqarluarniartuni suleqatissatut pisariaqartippatsigit.

 

Suleqatitaarigutsigit atortulersuutinik IT-kkullu systeminik aserfallatsaaliuineq, pitsanngorsaaneq ineriartortitsinerlu suleqataaffigissavatit. Internettikkut isumannaallisaaneq aallutarilluarparput, suleqatigiillu peqatigalugit IT-kkut atortulersuutinik isumannaarinissaq ineriartortitsinissarlu akissussaaqataaffigissavat, ilaatigut makkuninnga: Hyperconverged infrastructure, CISCO, Veeam, Mellanox, Microsoft aamma Linux Cluster allallu, aamma teknologiit soorlu Microsoft, VMware aamma Citrix.

 

Suliassat tassaanerussapput:

·      Serverinik, netværkinik attaveqaatinillu aserfallatsaaliuineq

·      Internettikkut isumannaallisaaneq, ingerlatsineq pitsanngorsaanerlu

·      Suleqatit ikiuisartullu suliffeqarfiup avataaneersut suleqatigalugit atulersitsineq, ikkussuineq, nakkutiginninneq ajoqutaasunillu misissuineq

·      Ulluinnarni ingerlatsinikkut suliassat pillugit IT-kkut ikiuisartut suleqatigineri, soorlu incidents, problems aamma changes, allaffeqarfivut akimorlugit, Nuummi Aalborgimilu allaffeqarfiit saniatigut Nunatsinni umiarsualiviit aamma pineqarput

·      Tunuliaqutigisatit tunngavigalugit suliffiup imarisassaa sunniuteqarfigisinnaassavat

 

Qinnuteqartumut naatsorsuutigisagut:

IT-kkut aqutsineq misilittagaqarfigissavat, assingusumillu ilinniagaqaruit iluassaaq, serverinut, netværkinut IT-kkullu attaveqaatinik ingerlatsinermut ineriartortitsinermullu tunngasunik suliaqareersimallutit.

 

Suliassaqarfimmut ataatsimut, soorlu netværkinut, IT-kkut isumannaallisaanermut, Citriximut assingusunulluunniit immikkut ilisimasaqartuuguit iluaqutaassaaq, aamma minnerpaamik ataani allassimasut arlaat ataaseq arlallilluunniit misilittagaqarfigissavatit:

 

·      VMwaremik ingerlatsineq

·      MS Serverimik / Backofficemik ingerlatsineq (Windows 2012R nutaajunerusorluunniit)

·      Veeam backup softwaremik ingerlatsineq

·      Microsoft Azure

·      Microsoft Office 365 / Teams

·      Exchange 2013 nutaajunerusorluunniit

·      Cisco Netværk - Switch, Routing, Firewall, WLC - (min. CCNA-mut allagartaqarlutit)

·      Microsoft SQL

·      MDM software

 

Naatsorsuutigaarput:

  • Suliamut tunniusimasoq, ilusilersuillaqqissoq pitsaassutsimik pingaartitsisoq suliaminullu tulluusimaarutiginnilluartoq
  • Suleqateqallaqqissoq, ilisimasanillu avitseqatigiinnissamik suleqatigiinnermillu pingaartitsisoq
  • Alapernaatsoq pikkorinnerulernissaminillu soqutigisaqartoq
  • Aalajaatsoq IT-kkullu isumannaatsumik pitsaasumillu ingerlatsinissamik pingaartitsisoq

 

Atorfik Nuummi inissisimaffeqarpoq, suliffimmullu atatillugu inissamik innersuussisoqarsinnaalluni.

Danmarkip Nunattalu akornanni angalasoqartarsinnaavoq – assersuutigalugu suliniutinik atulersitsinermut, pikkorissarnernut allanullu tunngatillugu.

 

Namminersorsinnaaneq, ineriartorneq akisussaaffeqarnerlu

Royal Arctic Line suliffeqarfiuvoq ineriartorfiujuartoq, tamannalu IT-mi aamma malugisinnaavarput. Attaveqaatitsinnik tamarmiusunik nutarsaaneq pissanganartoq ingerlatileruttorparput. Suliassamullu tassunga suleqatissatsinnik pitsaassutsimik eqqummaarinnittumik pisariaqartitsivugut, unammilligassanut isornartorsiortumik isumassarsiortumillu suleriaasilimmik.

 

Neqeroorutigaavut

Aaqqissuussaanermi nukittuumi atorfeqarneq, ulluinnarni suliassat sunniuteqarfigisinnaallugit, aamma sulinermi atukkat, ineriartortitsinissaq sulisunillu pikkorissaaneq pingaartitaraarput.

Suliffeqarfik eqaatsumik atugassaqartitsisoq pissanganartunillu unammilligassaqarfiusoq tunniusimasunillu suleqateqarfiusoq (IT-mi sulisut 20-upput suleqatigiinnut arlalinnut agguataarsimasunik).

Suliffeqarfik niuernermi pissutsit malillugit akissarsiaqartitsisarpoq bonuseqartitsisarlunilu, atorfeqartitaanermilu atugassarititaasut allat atorfimmut piginnaasannullu tunngatillugu pitsaasumik inissisimallutik.

 

Paasissutissat sukumiinerusut
Paasissutissat sukumiinerusut pissarsiarineqarsinnaapput General IT Manager, Niels Hansen, +299 22 00 80-imut saaffigineratigut.

 

E-mailikkut qinnuteqaatinik tigusineq ajorpugut, nittartakkatsinniit qinnuteqassaatit.

 

Atorfininneq: Sukkanerpaamik, qinnuteqartorli uagutsinnut tulluarneq utaqqisinnaavarput.

Qinnuteqarfissaq kingulleq: juulip 10-at 2021

Qinnuteqaatit: ingerlaavartumik suliarineqassapput

Oqaloqatiginninnerit: Nuummi ingerlaavartumik ingerlanneqassapput

 

Atorfik ugguuna qinnuteqarfigiuk