Qamuuna kissaateqaruit nunarput naggorlukkaluartoq sikkiatikkumallugu Nunatta Isiginnaartitsisarfialu siuttuuffigalugu kulturikkut anersaakkullu pikialaartitsineq ingerlakkumallugu, taava immaqa tassaavutit isiginnaartitsisarfimmi pisortassarput.

 

Ukiut qulit sinnerlugit Nunatta Isiginnaartitsisarfia tassaasimavoq Inuit anersaavannik, oqaasiinik inooriaasiinillu allanngorartuartunik isiginnaartitsinikkut pinngorartitsinikkullu siammarteriviusoq. Nunatta Isiginnaartitsisarfiata takutitsineri puisit alluinut assersuunneqarsinnaapput, qamani anersaatta isumaliutigilluarnissaanut oqallisigisarnissaanullu ammaassisuusartut. Nunatta Isiginnaartitsisarfia eqqumiitsuliornikkut kulturikkullu pisut katersuuffigaat suleqatigiiffigalugulu – maani nunatsinneersut aamma nunarsuatta sinneraneersut akuuffigisaannik. Nunatta Isiginnaartitsisarfia Kalaallit Nunaanni misigisassanik nutaanik pilersuivoq, uniganilu ineriartorfiujuarpoq isiginnaartitsisartullu nutaat pikkorissut pinngorarfigaat.

 

Pisortaq nutaaq illuliussaaq aaqqissugaanermillu inerisaassalluni

Nunatta Isiginnaartitsisarfia pisortassarsiuupparput isiginnaartitsisarfiup aaqqissugaaneranik ineriartortitsisinnaasumik aammalu ulluinnarni ingerlatsinermik isumaginnilluarsinnaasumik. Pisortap akisussaaffigaa isiginnaartitsisarfiup allaffissornikkut, aningaasaqarnikkut eqqumiitsuliornikkullu aqunneqarnera, Nunatta Isiginnaartitsisarfiata siulersuisui qullersaralugit. Pisortap qulakkeertussaavaa siulersuisut innersuussutaat malillugit suliffeqarfiup aqunneqarnissaa aammalu Isiginnaartitsisarfeqarneq pillugu Inatsisartut inatsisaat nr. 23, 18. november 2010-meersoq naapertorlugu. Pisortap akisussaaffigaa siunniussat suliassatullu pilersaarutit allanneqarlutillu timitalersorneqarnissaat isiginnaartitsisarfiup periusissiaa aqqutigalugu.

 

Isiginnaartitsinermik Ilinniarfik aaqqissugaavoq Nunatta Isiginnaartitsisarfiata ilaatut inissitaalluni. Isiginnaartitsinermik Ilinniarfik bachelorinngorniarfinngorlugu iluarsaateqqinneqarpoq ukiuni pingasuni ilinniarfigineqarsinnaasunngorlugu, amerlanerpaamik arfineq-marlunnik ilinniartoqarsinnaasoq. Pisortap isiginnaartitsisartunngorniarfiup aqunneqarnera akisussaaffigaa, bachelorinngorniarfittullu iluarsaateqqinnerani ilinniartitaanerup ilusaa aaqqissugaaneralu suliarisussaallugit inatsisitigut nalunaarutitigullu innersuussutit naapertorlugit.

 

Pisortaq katersuuffiullunilu ingerlatitsisuussaaq

Isiginnaartitsisarfinni suliassat isiginnaartitsissutissanillu aaqqissuussinerit misilittagaqarfigigukkit suliffeqarfimmillu aqutsisuusimaguit immaqa tassaasimassaatit Nunatta Isiginnaartitsisarfiani pisortarerusutarput. Pingaaruteqarpoq katersuuffiunissat aammalu suleqatigiissitsillaqqissuunissat. Taakku saniatigut aamma siunissamut takorluugaqarlutillu pinngorartitsinikkut eqqarsariallaqqissuussaatit, aammalu isumassarsianik nutaanik aallartitsisarnerpit saniatigut ingerlareersut pitsaasumik naammassineqartarnissaat isumagisinnaassallugu.

 

Piginnaasat piukkunnaatillu

Aqutsisutut ilinniagaqarsimassaatit aamma/imaluunniit pisortatut periusissianillu ineriartortitsinermut piffissami sivisuumi misilittagaqarsimassallutit. Missingersuusiorsinnaassaatit pilersaarusiorsinnaassallutillu. Attaveqaqatigiinnerup periarfissaanik atorluaallaqqillutillu amerlasuunik attaveqarfeqariissaatit. Sakkortuunik piumasaqaatitaqartunik suliassaqarsinnaasarneq artussanngilat, uivernallu suliassat amerlagaluartut ingerlassinnaassallugit. Aalajangigassat eqqortut piffissaagallartillugu isumagisarnissaat piginnaaneqarfigissavat, taamaaliorninnilu ataqqinnittumik akisussaassuseqartumillu kikkulluunniit eqqorneqarsinnaasut pissuseqarfigisassallugit.

 

Isiginnaartitsisarfiup salliutikkusuppai qinnuteqartut kalaallisut, danskisut tuluttullu oqalussinnaalluartut allassinnaalluartullu.

 

Akissarsiat atorfinitsitaanerlu

Akissarsiat atorfininnermilu atugassarititaasut immikkut isumaqatigiissusiornikkut pissapput.

Isiginnaartitsisarfimmi pisortaq ukiunut sisamanut killilikkamik sivitsorneqarsinnaasumilli atorfinitsinneqassaaq. Pisattat nassiunnerinut akiliussisoqarsinnaavoq, aammattaaq atorfinitsinneqarnermut atasumik nuunnermi angalanermut aningaasartuutit matussuserneqarsinnaallutik, Namminersorlutik Oqartussat tamakkununnga malittarisassaat atuuttut malillugit.

 

Atorfimmut tunngasunik sukumiinerusumik paasiniaaffigineqarsinnaavoq isiginnaartitsisarfimmi aqutsisoq Edvard Lyberth-Mørch attavigalugu, tlf. 381378 imaluunniit e-mail: edvard@nuis.gl

 

Qinnuteqaat kingusinnerpaamik nassiunneqassaaq ulloq 16. februaari 2023. Nunatta Isiginnaartitsisarfianut qinnuteqaammut ilanngunneqassaaq CV, nassiussivissarlu tassaalluni e-mail: edvard@nuis.gl. Atorfinitsinneqarnerup ullorisinnaavaa 1. juuni 2023.