Skip to main content
92

Dette jobopslag er udløbet

ILLIT TASSAAVIT NUUMMI QULLERSAQARFIMMI SULINIUTINUT AQUTSISORTAASSARPUT?

Nukissiorfiit Suliniutinut Allaffiat pikkorissumik suliniutinut aqutsisussarsiorpoq, suliassat suunerat apeqqutaatinnagu aningaasaqarnermut, inatsisilerinermut, teknikimut aamma aqutsinermut tunngasumik suliaqartartussamik.

 

Nukissiorfiit ingerlaavartumik sanaartornermut suliniutinik pingaarutilinnik suliaqartitsisarput, atortutsinnik alliliinermik/nutarterinermik/taarsiinermik akuttunngitsumik qulakkeerinnittussanik, tassunga ilanngullugu nuna tamakkerlugu pilersuinerup isumannaatsuunissaanik annertuumik qulakkeerinninnissaq. Suliniutit allanngorarput innaallagissamut aqqutinit, imermut aamma kiassaanermut, innaallagissiorfiit kiassaateqarfiutigisut, imermit nukissiorfiit aamma imeqarfiit aamma nutaanngorsaaneq taamatullu nutaanik sanaartorneq aamma sanaartorfigiuminarsaaneq  ilaapput. Tamakkua saniatigut suliniutit ataqatigiissaarneqassapput oqartussaasut akimorlugit aamma inuiaqatigiinni aningaasaqarneq isiginiarlugit.

 

Suliniutinut aqutsisussatut illit sulisortaarerusuppatsigit makkuninnga piginnaanilik:

  • Ingerlaqqiffiusumik tulluartumik ilinniagalik
  • Suliniutinut aqutsisussatut ilinniagalik/akuersissummik pigisaqartoq
  • Teknikimut tunngasunik paasinnissinnaasoq aamma suliniutinut aqutsisutut misilittagalik
  • Aningaasanik aqutsinermut piginnaanilik
  • Attaveqaqatigiinnermut aamma ingerlatitseqqittarnermut pikkoriffilik
  • Ataqatigiissaarinermut piginnaaneqarluartoq aamma sulianut malinnaalluarsinnaasoq
  • Suliniutit naammassillugit ingerlatsinermut misilittagalik
  • Avataaneersut pisiffigisartakkat aamma suleqatigisartakkat attaveqarfigisarnissaannut aqutsinermik misilittagalik

 

Iluaqutaassaaq illit AP 95 ilisimasaqarfigigukku aamma pilersuinermut atortunik misilittagaqaruit.

 

Suliniutinut allaffimmi suliniutinut pisortaq akisussaassuseqarfigalugu atorfeqalissaatit. Suliniutinut atatillugu aqutsisooqatigiit siulittaasuat akisussaassuseqarfigissavat, taanna amerlanertigut najukkami nunap immikkoortuani pisortaasarpoq (uagut najukkami ingerlatsinermut aqutsisorput Kalaallit Nunaat tamakkerlugu). Suliniutinut suleqatigiikkuutaat aquttassavatit, tassaasut suleqatigiit Kalaallit Nunaanni tamani sulisuusut. Aammattaaq suliniutinut tunngatillugu piareersaalluni aaqqissuinerit aamma aalajangiinissamut tunngavilersuutissat pisariaqartut suliarisassavatit.  

 

Neqeroorutigaavut:

  • Atorfik pissanganartoq nammineersuutigalugu annertuumik nakkutigisaqarluni aalajangeeqataaffigisaqarfiusoq, kiisalu suliassat aaqqiissuteqarfiginissaannut sunniuteqarnissamut periarfissartalik
  • Sullivimmi avatangiisit sulianik aallussilluarfiusut, tassani illit suliatigut aamma inuttut ineriartornissamut periarfissaqarputit
  • Suliffik pikkorissuseqarnermik aamma suliffeqarfiup kulturia aallussinermik malunnaateqarfiulluartoq
  • Ataatsimoornermik pitsaasumik misigisaqarfiusoq, tassani uagut suliffimmik iluarisimaarinninneq aamma sulinermik nuannarisaqarneq qitiutillutigu.

 

Atorfeqartitaanermi atugassarititaasut 

Akissarsianut aamma atorfeqartitaanermi atugassarititaasut ingerlanneqassapput Naalakkersuisut aamma pineqartup kattuffiata isumaqatigiinniarsinnaatitaasup isumaqatigiissutai tunngavigalugit. Atorfinitsitsinermi qaammatit pingasut ingerlaneri misiliutaassapput.

 

Inissaq

Malittarisassat qaqugukkulluunniit atuuttut naapertorlugit atorfinittumut sulisunut inissiamik pequsersugaanngitsumik innersuussisoqarsinnaavoq. Inissiamut innersuunneqartumut malittarisassat qaqugukkulluunniit atuuttut naapertorlugit ineqarnermut akiliutit akilerneqartassapput aamma iserternermi qularnaveeqqutit akilerneqassallutik. Sulisutut inissiaq atorfeqartitaanermut attuumassuteqarpoq atorfeqarunnaarnerullu taamaatinneranut atatillugu qimanneqassalluni.

 

Inissiap pisoqassusia, kikkut piginnittuunersut il.il. apeqqutaallutik ineqarnermut akiliutit inissiallu pitsaassusia allanngorarsinnaapput. Sulisunut inissiap inigineqalertussap innersuunneqarnissaata tungaanut utaqqisoqartarsinnaavoq, taamaammat utaqqiisaannaagallartumik inissiisoqarsinnaasarluni, taamatuttaaq ataatsimoorluni ineqarfissiani mikinerusuni akunnittarfiillu inissiartaanni, taakkunaniinnermut akileraarutinik akiliisoqartarpoq.

 

Atorfininnermi/soraarnermilu angalaneq akiliunneqassaaq, atorfininnermilu pequtit nuunnissaanut, ukiut pingasut kipisaqattaanngitsumik atorfeqareernerup kingornatigut inoqutigiit qitornaat 18-it inorlugit ukioqartut ilanngullugit angerlarlutik angalanissaannut akiliunneqassapput.

 

Atorfimmut atatillugu inissaqartitsisoqanngilaq, Namminersornerullutik oqartussat aqqutigalugu ineqaruit piginnaatitaaffit ineqarnermut pigiinnassavat.

 

Suli paasisaqarusuppit?

Takuuk www.nukissiorfiit.gl paasissutissat allat. Atorfik pillugu erseqqinnerusumik paasisaqarusukkuit projektchef Ole Ziemer atassuteqarfigiuk: tlf.: (+299) 34 95 80/ (+299) 55 88 80 Nalinginnaanersumik apeqqutissaqaruit HR-immikkoortortaqarfianut saaffiginnissutigineqarsinnaapput: HR@nukissiorfiit.gl imal. tlf.: (0299) 34 95 00

 

Nukissiorfiit pillugit

Nukissiorfiit sulisuisa 400-t Kalaallit Nunaat tamakkerlugu innaallagissamik, imermik aamma kiassaanermik pilersupput. Ataatsimoorluta sulissutigiuarparput atuisartutsinnut iluaqutaasumik aaqqiissutissanik aningaasartuutinik atorluaanermik aamma piujuartitsinermik tunngaveqartumik pilersitsinissarput sulissutigiuarparput. 2019-imi innaallagissamik, imermik aamma kiassaanermik nioqquteqarnitta 72 procentia ataavartumik nukissiornermit pivoq. Uiup 2030-p tungaanut sulissutigaarput nukissiaq ataavartoq atorlugu 100 %-imik nioqqutissiulernissarput. Nukissiorfiit sulisunut tamanut killiussat pitsaanerpaat pilersinniarneranni iluatsittumik angusaqarput. Tassami Kalaallit Nunaanni aamma Danmarkimi suliffeqarfiit akornanni sulisut naammagisimaarinninnerat qaffasinnerpaanut ilaavoq. Uagut pilluta annertunerusumik atuartit uani: www.nukissiorfiit.gl.

Qinnuteqarnissamut killissarititaasoq: januaarip 30.-at, 2021

ATORFIK UNA QINNUTEQARFIGIUK