Utoqqaat illersuisuata allattoqarfia allaffissornikkut suleqatissamik attaveqatigiilerinermik suliaqarluarsinnaasumik 1. juni 2023 imaluunniit isumaqatigiissuteqarnikkut piffissalikkamik sulilersinnaasumik suleqatissarsiorpoq.
Marluinnik oqaaseqartuuit kalaallisut/qallunaatut, aammalu allaffissornermut tunngasunik ilinniagaqarlutit, attaveqaqatigiinnikkut suliassat naammassilluarsinnaavigit - oqaluttariarsornikkut allattariarsiornikkulluunniit, taava imaassinnaavoq illit tassaasutit atorfimmut inuttassarsiuussatsinnut naleqquttoq.

Suliassat makkuusinnaapput:

• Utoqqaarnik qanigisaannillu apeqqutinut inatsisilerinermik tunngasunut oqaloqatiginninnerit aammalu kommunit ingerlatsiviini sulianik naammassineqanngitsunik malitseqartitsinermik suliaqarneq, utoqqaat illuinut nuunnissamut sulianik misissuineq, taamatuttaaq utoqqalinersiaqartitsinermut tunngasunik misissuineq il. Il. 
• Utoqqarnik qanigisaannillu oqaloqatiginninnermi oqaaseqaasiortarneq
• Utoqqarnik maalaaruteqarnissamik siunnersuisarneq suliallu pisoqalisoorsinnaaneri pillugit eqqumaffiginninnissamik siunnersuisarneq
• Kommunit ingerlatsiviinut assigiinngitsunut taamatuttaaq naalakkersuisoqarfinnut assigiinngitsunut allanullu pisortatigoortumik allagaqaatinik suliarinnittarneq
• Tusagassiuutitigut nalunaarutissanik oqallisissiassanillu suliaqartarneq
• Utoqqaat atugarisaat pillugit nittartakkakkut inuillu attaveqatigittarfiisigut paasissutissanik saqqummiunneqartussanik suliarinnittarneq
• Utoqqaat Oqaaseqartartuat peqatigalugu utoqqaat inuunerminni atugaat tunngavigalugit oqallisigineqarsinnaasut assigiinngitsut pillugit isummersoqatigiittarnerit
• Naalakkersuisut tusarniaassutaannut akissutissanik suliarinnittarneq
• Tusagassiuutinut attaveqartarneq aammalu suleqatit avataaneersut attaveqarfigisarnerinut ataqatigiissaarisarneq
• Paasisassarsiorluni angalasarnerit pillugit ataqatigiissaarinerit
• Avataanut suliakkiussat ataqatigiissaarneqarnerat.

Piginnaasat
Takorloorparput suleqatissarput makkuninnga piginnaasaqassasoq:

• Inatsisilerinermik ilisimasaqarneq aammalu allaffissornikkut suliassanik ilisimaarinninneq
• Attaveqaqatigiinnermut paasissutissanillu ingerlatitseqqiisarnermut piginnaasaqarluartoq
• Namminersorluni eqaatsumik aammalu tunniusimalluni sulisinnaassuseqarneq
• Akisussaassuseqarluartuuneq
• Suleqatigiinnermut piginnaasaqarluartuuneq
• Nutaaliorsinnaassuseqarneq, inussiarnersuuneq, tusarnaarsinnaalluartuuneq aammalu alapernaatsuuneq
• Kalaallisut qallunaatullu tamakkiisumik piginnaasaqarneq.

Atorfimmut atatillugu angalasarnissaq naatsorsuutigineqassaaq.

Akissarsiat sulinermilu atugassat
Akissarsiat sulinermilu atugassarisassat, matumani atorfininnermut atatillugu angalanermut kiisalu atorfiup qimannerani angalanermut atorfininnermilu pigisat assartorneqarnerannut tunngatillugu atorfininnermi namminersorlutik oqartussat sulilersussallu kattuffiata attuumassuteqarfiataluunniit isumaqatigiinniarsinnaatitaasup akornanni isumaqatigiissut tunngavigineqassaaq.

Ineqarneq
Sulinermut atatillugu inigisassamik neqerooruteqartoqanngilaq. Qinnuteqartorli Namminersorlutik Oqartussat aqqutigalugit sulinermut atatillugu inigisaqaruni taanna inigiinnarneqarsinnaavoq. Sulinermut atatillugu inigisaq atorfimmut pituttorsimassaaq atorfeqarunnaarnermilu qimanneqartussaassalluni.

Qinnuteqartunik oqaloqateqateqallattaasoqassaaq.

Atorfik pillugu paasisaqarnerorusuppit?
Atorfik pillugu paasisaqarnerorusukkuit Utoqqaat Illersuisuat Inga Egede attavigissallugu tikilluaqqusaavutit, mobilip normua: 544729, imaluunniit e-mail: ineg@nanoq.gl
Ulloq qinnuteqarfissaq kingulleq: Apriilip 14-at 2023.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk