Find job
Dette jobopslag er udløbet
Ulloq unnuarlu angerlarsimaffimmi Sungiusarfik Aaqa-mi pisortaq
Soqutigiviuk allanartumi, ineriartortitsiffiusumi pissarsiassaqarfiusumilu sunniuteqarluarlutit suliffeqarnissat, taava una atorfik ilinnut soqutiginaateqarsimassaaq.
Ulloq unnuarlu Innarluutilinnut inissiisarfimmi immikkoortortaqarfik Isumaginninnermut Aqutsisoqarfimmiittoq ulloq unnuarlu angerlarsimaffimmut Aaqa-mut piginnaasalimmik pikkorissumillu pisortassamik pissarsiorpoq ulloq 1. maj 2023-mi imaluunniit immikkut isumaqatigiissuteqarnikkut aallartittussamik.
Sungiusarfik Aaqa tassaavoq nuna tamakkerlugu ulloq unnuarlu tarnimikkut nappaatilinnut skizofreni-tunut angerlarsimaffiusoq, 32-nik inisimasoqarsinnaavoq immikkoortortanut arfinilinnut agguataarnikuulluni. Angerlarsimaffik nuummi inissisimavoq – illoqarfik alianaatsoq najoruminartumi avatangiiseqartoq. Sulisorisat suliaminnut tunngasutigut misilittagaqarluartuupput.
Sungiusarfik Aaqa naatsumik
Sungiusarfik Aaqa inersimasunut skizofrenimik nappaateqartunut inunnik persorsaanermut nuna tamakkerlugu ulloq unnuarlu paaqqinniffiuvoq. Sungiusarfik Aaqami immikkoortortaqarfiit arfiniliupput, taakkunannga immikkoortortat pingasut qitiusumik illorsuarmut attuumassuteqarlutik. Immikkoortortoat taakku pingasut ateqarput:
- SIVISUUMIK INISSISIMAFFIK, arfineq-pingasunik inissalik,
- PAAQQUTARINNIFFIK, arfineq-pingasunik inissalik kiisalu
- IMMIKKOORTORTAQ ALLOQ, arfineq-marlunnik inissalik.
Avataani immikkoortortat Aaqamut attuumassuteqartut pingasuupput, SUNGIUSARFIK arfinilinnik inissalik, taannalu Nuussuarmiippoq. AKUITSUT inunnut Prader-Willi-Syndrom-eqartunut marlunnut inissalik, taannalu aamma Nuussuarmiippoq. ALLORIARFIK, sannavik illersugaq Aaqamit atuisunut 15-inut inissalik. ALLORIARFIK Industrivejimi putorsuup eqqaaniippoq.
Neqeroorutigaarput:
- Sulisunik assigiinngisitaartunik immikkullu piginnaaneqartunik piginnaasat ineriartortillugit suleqateqalernissat
- Ingerlatsinermi ineriartortitsinermilu sunniuteqarluarlutit inissisimanissat
- Suliffeqarfik ineriartortitsiviusoq ilinniartitsinermillu pingaartitsisoq suliffigilissavat
- Perorsaanermi ingerlatsinermilu unammilligassat ineriartortitsinissallu suliarisassavatit
- Isumaginninnermut aqutsisoqarfimmik – pingaartumillu ulloq unnuarlu inissitsiterisarnermullu immikkoortortaqarfimmik suleqateqartassaatit
- Ulloq unnuarlu angerlarsimaffinni allani pisortaasut sulianut tunngatillugu isumasiorsinnaallugillu ikorfartoqatigisassavatit
- Ukiumoortumik pisortat isumasioqatigiinnerinut ataatsimeersuarnerannullu peqataaneq
Naatsorsuutigaarput:
- Perorsaasutut imaluunniit isumaginninnikkut peqqinnissamulluunniit tunngasumik ilinniagaqarsimassasutit
- Pisortatut misilittagaqarnermik uppernarsaateqarnissat kissaatiginarpoq, suliassanillu agguaassisinnaallutit
- Ingerlatsinermik aningaasatigullu aqutsinermik misilittagaqarluartoq
- Nuannersumik suleqatigiittoqarnissaanut aqqutissiuillaqqittuussaatit
- Qanilaartoq, eqeersimaartitsisoq tutsuiginartorlu
- Inuunerminik nuannarinnittoq aammalu inunnik allaanik akuersaartuunermigut attaveqallaqqittoq
- Sapinngisamik marloqiusamik oqaaseqartoq kalaallisut/qallunaatullu
- Namminersorlutik Oqartussat ulloq unnuarlu angerlarsimaffiinik allanik suleqateqarnissamut piumassuseqartoq
- Ulloq unnuarlu inissitsiterisarnermullu immikkoortortaqarfimmik qanittumik ineriartortitsiffiusumillu suleqatiginninnissamut ammasuussaatit
- Nunamut tunngasoq, tunniusimasoq aammalu ulloq unnuarlu meeqqanut, inuusuttuaqqanut inersimasunullu annertuumik innarluutilinnut sullissinermik misilittagalik
- Inatsisinik ilisimaarinnittoq
Sukumiinerusumik paasissutissat
Sap.akunneranut nal.ak. 40-t sulisassaatit.
Atorfik pillugu sukumiinerusumik paasisaqarusukkuit tikilluaqqusaavutit imm. pisortamut Marie Sofie Pedersen, oqarasuaat +(299) 34 66 48 imaluunniit e-mail; misp@nanoq.gl aqqutigalugu paasiniaanissamut.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Qinnuteqarfissaq
Qinnuteqarnermi ilinniarsimasat pillugit paasissutissat, pillagaasimannginneq pillugu paasissutissat, suliffigisimasat innersuunneqassapput, ulloq unnuarlu inissitsiterisarnermullu immikkoortortaqarfiup pisariaqartikkuniuk attaveqarsinnaatitaassalluni. Tamatuma saniatigut meeqqanut pinerlussimannginnermut uppernarsaat pissarsiariniarneqartussaavoq.
Qinnuteqarnissamut ulloq killigititaq tassaavoq 28. marts 2023, tamatumalu kingorna piukkunnaatillit sap.ak. 13-mi oqaloqatigineqarnissaat naatsorsuutigineqarsinnaassalluni.
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job