Skip to main content
65

Dette jobopslag er udløbet

Tusagassiornermut Immikkoortortami (TI) Ilisimatusarfimmut studieadjunktitut atorfik inuttassarsiuunneqarpoq.

Tusagassiornermi tusagassiuutilerinermilu studieadjunktitut atorfik inuttassarsiuunneqarpoq 1. juuni 2021-mit isumaqatigiissuteqarnikkulluunniit sulilersussamik. Atorfik kingusinnerusukkut taaguuteqalersinnaavoq ”adjunkti ph.d-inngorniartoq” tamanna isumaqatigiissutigineqarpat, kingusinnerpaamilli pissalluni atorfininnermiit ukiut marluk qaangiuppata.

Adjunktitut sulineq ph.d.-mik ilalik: Atorfik adjunktitut atorfiusinnaavoq ukiut 6-it tikillugit, atorfininnermi ph.d.-mik sammisaqarnissamik isumaqatigiissusiortoqarsimappat. Adjunktitut atorfinitsitsineq ph.d.-mik ilalik pisinnaavoq ph.d.-mik ilinnialerniarluni nalunaarnermi malittarisassat atuuttut malinneqarsimappata.

Tusagassiornermut Immikkoortortami (TI) pissarsiariniarparput kandidati, ilinniartitsinermik aamma /imaluunniit tusagassiornermik tusagassiorfinnilu sulinermik misilittagalik. Suliassat pingaarnerusut tassaapput ilinniartitsineq, siunnersuineq soraarummeersitsinerlu, tassunga ilanngullugit faginik aaqqissuineq, atuagassiissutillu allattorsimaffiinik inerisaaneq kiisalu immikkoortortami suleqatigisat peqatigalugit faginik ataqatigiissaarineq. Taakkua saniatigut atorfinittussap Ilisimatusarfimmi ilisimatuutut sulinissamut piukkunnarsarneq ”adjunktpædagogikum” peqataaffigissavaa tassani sammissallugu ilinniartitsinermik ineriartortitsineq siunnersuisarnerlu. Aammattaaq atorfinittussap piffissaqarfigissavaa ph.d.-ngorniutigisinnaasami najoqqutassaanik piareersaataasumik allaaserisaqarnissani.

Illit tassaavutit:

  • Tusagassiornermi tusagassiuutilerinermilu kandidatitut soraarummeersimasoq
  • Kalaallisut/danskisullu marluinnik oqaasilik
  • Paasissutissiillaqqissuullunilu ilinniartitsisinnaasoq, pingaartumik kalaallisut
  • Tusagassiortutut misilittagalik
  • Sulinermi avatangiisini fagit kulturillu assigiinngitsut naapiffigisaanni peqataarusuttoq


Immikkoortortaqarfik pillugu
Tusagassiornermut Immikkoortortaq (TI) Inuiaqatigiilerinermik ilisimatusarfinnut, Aningaasarsiornermut, Tusagassiornermut Inatsisilerinermullu Ilisimatusarfimmut (SØJ atavoq),  Ilisimatusarfimmi Nuummiittumi.

Immikkoortortami tusagassiornermik ilinniartitsineq ingerlanneqarpoq, tassanilu ukiut allortarlugit tusagassiornermik bachelorinngorniartut aallartittarput ukiullu aappaani tusagassiornermik masterinngorniartut aallartittarlutik. Bachelorinngorniarneq ukiut sisamaat avillugu sivisussuseqartarpoq masterinngorniarnerlu ukiunik marlunnik sivisussuseqartarluni. Aamma takuuk Ilinniakkamut najoqqutassiarput 2016-imeersoq: https://www.uni.gl/media/1641996/journalistik.pdf 

Tusagassiornermut Immikkoortortami aalajangersimasumik atorfeqarput ilinniartitsisut 3½-t, taakkununnga ilaalluni immikkoortortami pisortaq ilinniartitsisussaatitutaasoq. Taakkua saniatigut ilinniartitsisut avataaneersut najukkamiittullu assigiinngitsut tusagassiornermik faginilu ilisimatusaataasunik ilinniartitsisinnaasut atortarpavut. Assersuutigalugit ilinniartitsissutaasarput tusagassiornermi periutsip iluani genret assigiinngitsut, soorlu nutaarsiassalerineq, tusagassiorfinni oqaatsit il.il.

Immikkoortortami suliat pissanganartuullutillu ineriartortinneqarput illillu periarfissaqarputit immikkoortortami suleqataallutillu ineriartortitseqataanissannut.

Qinnuteqaat
Qinnuteqaat makkuninnga ilaqassaaq:
Ilanngussaq 1: Curriculum Vitae
Ilanngussaq 2: Soraarummeersimanernut uppernarsaatit
Ilanngussaq 3: Ilanngussat allat attuumassuteqartut

Attavigisassat/ilisimatitsissutit:
Atorfik pillugu sukumiinerusunik paasisaqarusuttut tikilluaqquneqarput attavigissallugu immikkoortortami pisortaq Naja Paulsen, oqarasuaat: +299 385648 imaluunniit instituttimi pisortaq Gestur Hovgaard, oqarasuaat +299 38 56 00. Ilisimatusarfik pillugu paasisaqarnerorusukkuit uunga isersinnaavutit www.uni.gl.

Atorfinitsitseriaaseq:
Immikkoortortami pisortaq siunnersuisoqatigiinnik pilersitsissaaq. Taakku qinnuteqaatinik takkuttunik ilisimatinneqassapput, taamaalioreerunillu qinnuteqartut sorliit oqaloqatigineqassanersut aalajangissavaat.

Ilisimatusarfik pillugu.
Ilisimatusarfik – Grønlands Universitet – issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu.
 
Ilisimatusarfik sisamanik instituteqarpoq:

  • Kulturimik, Oqaatsinik Oqaluttuarisaanermillu Ilisimatusarfik
  • Ilinniartitsinermik Ilisimatusarfik ilinniartitsisunngorniarfittaqarlunilu meeqqat atuarfianni ilinniartitsisunut ilinniaqqiffissartalik
  • Peqqissaanermik Ilisimatusarfik peqqissaasunngorniarfittalik
  • Inuiaqatigiilerinermik, Aningaasaqarnermik Tusagassiornermillu Ilisimatusarfik


Allaffissornikkut aqutsisoqatigiiffik pillugu:
Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilinniarfissuarmi Ilimmarfimmilu immikkoortortaqarpoq. Immikkoortortat faginik ingerlatsiviusunik qanimut suleqateqartarput soorlu namminneq akunnerminni aamma taamaattartut.
Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit aqutsineq, Siulersuisunik, Akademisk Rådimik kiisalu ilimmarfimmi sulisunik ilinniartunillu sullissineq.
Allaffissornikkut aqutsisoqatigiiffiup Ilimmarfiup ilutaanik sanaartornermik nakkutiginninneq aamma ingerlataraa.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk