Skip to main content
92

Dette jobopslag er udløbet

Tusagassiorfinnut attaveqarnermut siunnersorti

Naalakkersuisut Siulittaasuata Naalakkersuisoqarfia tusagassiorfinnut attaveqarnermut siunnersortissarsiorpoq, Naalakkersuisut tusagassiorfinnut suliaqarneranni nutaamik eqqarsarnissamut sapiissusilimmik aamma Namminersorlutik Oqartussat tusagassiuutinik peqateqarnerannut tunngatillugu sallersaanissamut sapiutinngitsumik. Naalakkersuisut, Naalakkersuisut Siulittaasuata Naalakkersuisoqarfia naalakkersuisoqarfiillu allat siunnersorneri annertuumik suliassamut ilaavoq.
Qitiusumik politikikkut aalajangersimasumik iliuuseqarnermut annertuumik paasisimasaqassuseq neqeroorutigaarput, suliffik pissanganartoq ineriartornissamut pitsaasunik periarfissalik suleqatillu pimoorussilluartut. Inuiaqatigiinni Naalakkersuisut saqqumilaarnissaannut aamma nunami namminermi nunanilu allani Naalakkersuisut attaveqaqatigiinnermut pilersaarusiornerannut tunngasutigut illit nammineq sunniuteqarnikkut tunniussaqarnissamut periarfissaqalissaatit.

Piginnaaneqassutsit ukua ilisarisinnaagukkit illiusimasinnaavoq amigaatigisarput:

  • Politikimut tunngatillugu misikkarissuseq aamma aaqqissugaanikkut politikikkut aqunneqartumit sulinikkut misilittagaqarneq 
  • Attuumassuteqarfinnik pilersitsinissamut allanngutsaaliuinermullu pikkorissoq
  • Oqaluttuatsialammik takunninnissamut oqaaseqatigiiliornikkullu oqaasertaliinermut paasinnittoq – aamma sammisanut oqimaatsunut paasiuminartumik ingerlateqqissinnaasoq Kalaallit Nunaanni oqaatsitigut kulturikkullu allanngoralaarnerit eqqarsaatigalugit.
  • Tusagassiuutit sulineranni aalajangersimasumik pisartunut atugassarititaasunullu paasinnissuseqarluarneq
  • Tamakkiisumik isiginnissinnaanerit eqqissisimanerillu attatiinnarsinnaaviuk aamma ulapaarfiusuni sivikitsumik piffissamut killilikkani
  • Suleqatigiinnik suleqateqallaqqissuusutit, allaffimmi ataatsimoornerup ingerlalluartup naleqassusianik paasinnittutit peqatigisaanillu ammasuusutit qiimasuullutillu
  • Allattarissatigut oqaatsitigullu oqaasertaliullaqqissutit
  • Suliffeqarfiup angisuup iluani killit akimorlugit suliat assigiinngiiaarsinnaagaluartut sulisinnaaneq.


Naatsorsuutigaarput, immikkut inuit attaveqatigiittarfiini tusagassiuutini suliaqarnissamut soqutiginnittutit piginnaasaqartutillu, peqatigitilluguli nalinginnaasumik tusagassiuutit (aviisit, radiut, tv il. il.) kinguneqarluartumik ippinnaateqanngitsumik iliornikkut peqatigisinnaallugit paasisimagit. Tamatuma saniatigut Kalaallit Nunaanni kulturimut inuiaqatigiinnullu ilisimasaqarluareernissat iluaqutaalluartussatut isigaarput.

Neqeroorutigaavut:

  • Politikikkut aalajangiinernut suliallu ingerlasarnerinut paasisimasaqarneq
  • Naalakkersuisut pilersaarusiornikkut attaveqaqatigiinnermut periusissiaannut illit nammineq sunniuteqarnissamut periarfissaqassaatit
  • Suleqatit suliaminnik aallussilluartut, suliaminut pimoorussisut
  • Suliassat allanngorartut
  • Sulianut tunngatillugu nunat tamalaat akornanni annertuumik soqutiginninneq.


Ilinniagaq misilittakkallu pillugit:

  • tusagassiortoq, cand.comm. assigisaanilluunniit ilinniarsimasoq
  • tusagassiorfinnut attaveqarnermut siunnersuinermik imaluunniit politikikkut attaveqaqatigiinnermik naleqquttumik misilittagalik.


Tamatuma saniatigut piffissani nikerartumik sulisarnissaq aamma immikkut ittumik suliassiissutit, soorlu inatsisartut ataatsimiinnerini piareersimaffigissavatit.
Naalakkersuisut Siulittaasuata Naalakkersuisoqarfiata Naalakkersuisut Siulittaasuata Kalaallit Nunaanni Namminersorlutik Oqartussani aqutsisutut atuunnerani sullissinissaq pingaarnertut suliassaraa. Saniatigut naalakkersuisoqarfiup naalakkersuisoqarfinnut allanut tunngatillugu suliassaqarfiit akimorlugit ingerlatsinerit isumagisarai. Ullumikkut Naalakkersuisut Siulittaasuata Naalakkersuisoqarfiani immikkoortortat ukuupput: Pisortaqatigiit Allattoqarfiat, Nunamut namminermut immikkoortortaqarfik, Ingerlatseqatigiiffinnut Allattoqarfik, Inatsiseqarnermut immikkoortortaq kiisalu Tusagassiivik aammalu Nunatta Københavnimi Sinniisoqarfia.
Atorfik pissanganartoq pitsaasumik ineriartornissamut periarfissalik neqeroorutigaarput, tassanilu inuiaqatigiinnut tunngasut qitiusumit immikkut ittumik paasisaqarfigissavatit  sunniuteqarfigalugillu. Atorfik pillugu sukumiinerusumik paasisaqarnissamik kissaateqaruit attavigisinnaavat pisortaq Simigaq Broberg, oqa: 345144 imaluunniit Sbro@nanoq.gl.

1. novembari imaluunniit erseqqinnerusumik isumaqatigiissuteqarnikkut atorfinitsitsisoqassaaq.
Qinnuteqaativit tigunissaanut qilanaarpugut.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk