Skip to main content
67

Dette jobopslag er udløbet

Tusaanngami oqarasuaatikkut siunnersuisartut

Innuttaasut pisariaqartitsinerat tunngavigalugu Tusaanngap ammarsarfii sap. ak. naanerini nal. 22:00-imiit 04:00-imut sivitsorneqarmata, oqarasuaatikkut siunnersuisartunik nutaanik pissarsiorpugut.

Tusaannga tassaavoq Kalaallit Nunatsinni siunnersortinnissamut neqeroorut ataatsimoortoq, nuna tamakkerlugu meeqqanut, inuusuttunut inersimasunullu, oqarasuaat 801180, 1899-imullu sms-erneq aqqutigalugit, siunnersuisarfik.
Tusaannga innuttaasunut neqeroorutaavoq, inuttaasup ajornartorsiutigisinnaasaminik, qanigisaniit imaluunniit nunaqqatiniit ikiorneqarsinnaanngissoriffimminni saaffigisinnaasaat.
Ajornartorsiutit isumagisassat assigiinngitsorpassuusinnaammata siunnersuisut misiginneqatiginnissinnaassuseqarnissaat, allannguinissamullu piareersimanissaat pingaaruteqarpoq. Siunnersuisartutut misilittagaqarneq iluaqutaassaaq, piumasaqaataanngilarli, sulisunut sanileralugit ilinniartitsineq atorneqartarmat, piginnaasanillu inerisaalluni pikkorissarnissat neqeroorutaajuarmata.
 
Tusaannga aaqqissuussaanikkut Pitsaaliuinermut Isumaginninnermullu Aqutsisoqarfiup ataani inissisimavoq.

 Oqarasuaatikkut siunnersuisartutut ilaatigut makku suliassaraatit:

  • Suleqatit peqatigalugit oqarasuaatitsinnik sms-itsinnillu suliaqarneq
  • Meeqqanut/inuusuttunut inersimasunullu- nikassaanermik, nakuusernermik, perorsaanermik, kanngutaatsuliornernik assigisaannillu ajornartorsiutilinnut tapersersuilluni tusarnaarneq.
  • Ajornartorsiutinut katsorsartinnissamut ingerlariaqqinnissamut innuttaasunik siunnersuineq kajumissaarinerlu.


Qinnuteqartutut naatsorsuutigarput:

  • Inerisimallutillu sanngisuujunissat.
  • Aalajaatsuunissat eqaatsumillu periuseqarnissat.
  • Illugiinnik kalaallisut/qallunaatullu oqaaseqartuunissat.
  • Inuttut ajornartorsiutinik -annertuppata annikippataluunniit suliaqarnissamik soqutigisaqarluinnartuunissat.
  • Pinerluuteqarsimannginnermut/meeqqanik pinerliisimannginnermut uppernarsaateqarnissat
  • Nuummi najugaqarnissat

Atorfiit/pigaartuuffiit agguataagaassammata saniatigut suliffittut isigineqassaaq. Suliffissat pingaarnertut sap. ak. naanerinut, unnunnut unnuanullu agguataarsimassapput.
 
Atorfik ilinnik soqutiginnilersitsippat inuiaqatigiinnilu allanngueqataarusukkuit, qinnuteqaammik sulerisimaninnut nassuiaat (CV) ilanngullugu nassiussigit.

Tusaannga atorfiillu pillugit paasissutissat sukumiinerusut Stina Mølgaard oqarasuaatikkut: +299 346017 imal. mailikkut: stmo@nanoq.gl attavigalugu pissarsiarineqarsinnaapput.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk