Skip to main content
91

Dette jobopslag er udløbet

Saqqummiuteqqitaq suliffiup iluani suliniutinik suliaqartussaq

Suliniutinik suliaqarneq suliniutinillu aqut­si­neq so­qutigilluinnagaraagit?
Taava Akileraartarnermut Aqutsisoqarfiup suli­so­­rilerusuppaatit.
Sulianik ingerlatsinernik, IT atorlugu aaqqissuussinernik suleriaatsinillu atuutilersitsineq naleqqulluartoq, pit­saalluinnartoq suleriaatsimillu nassuiaanertalik suleqatinit atorluarneqarsinnaasoq aqut­tuuffigisinnaa­vi­uk?
Suleriaatsinik ineriartortitsinermut siunnersortitut/suliniutinik suliaqarnermi suleqatissatut atorfik Akile­raar­tarnermut Aqutsisoqarfimmi Nuummiittumi 1. juni 2019-imi erseqqinnerusumilluunniit isumaqatigiis­su­teqarnikkut sulilersussamik inuttassarsiuunneqarpoq.

Tunuliaqutaq
Suliatta sulisunit isumagineqartartut ilarpassuisa suleriaatsillu digitaliusumik ingerlanneqalernissaat Aki­leraartarnermut Aqutsisoqarfiup maanna sulissutigaa, matumani aamma pisortat aningaasaqarnikkut aquts­inerminni ataatsimoorussamik atortoriligassaannik Prisme-mik atuutilersitsinissaq.
 
Suliarisartagassatit
Suliassavit pingaarnersarissavaat suliniutinik, maanna sulisooreersut suleqatigalugit ataqatigiis­saa­ri­nis­saq. Suliniutit ERP-ip allattoqarfia, avataanit suleqatigisat kiisalu Akileraartarnermut Aqutsisoqarfiup ilu­ani immikkoortortat akornanni ataqatigiissaarneqarnissaanni pingaarutilimmik inissisimassaatit.
Al­lannguinissaq siunertaralugu, LEAN atorlugu periutsit ilisimaneqartut iluaqutigalugit sulissaatit. Sule­riaatsit suliniutillu qularnaatsumik atuutilersinneqarnissaanni, siammarterneqarnissaanni sungiunniar­ne­qar­nissaannillu pingaaruteqarluinnartumik inissisimassaatit.
Suliassat imarigajuttarpaat suliniutit taakkununngalu atasumik suliniutinik aqutsineq. Taamaammat pit­saalluinnassaaq Prince2-mik imaluunniit suliniutinik aqutsinissamut ilinniakkamik assingusumik ilinnia­ga­qarsimaguit. Akileraartarnermut Aqutsisoqarfiup suliniutaani suliassaanilu amerlasuuni assigiinngit­su­nik suliassaqartuullutit peqataasassaatit. Akileraartarnermut Aqutsisoqarfimmi immikkoortortat assigiin­ngit­sut aammalu Nammi­ner­sorlutik Oqartussani naalakkersuisoqarfiit assigiinngitsut suliniutaannik suli­as­saannillu suliaqar­tas­saatit. 
 
Piginnaasaqarfiit
Tassaavutit suliassatigut suliassaqarfiit assigiinngisitaartut, suliniutinik arlalinnik tapertallit akisussaaf­fi­gis­sallugit iluarisalik. 
Tassaavutit suliniutinik sulialik pikkorissoq, suliat suuneri qaffasissutsillu apeqqutaatinnagit suleqatit aqut­sisullu peqatigalugit aqutsisoqarfiup suleriaasiinik ingerlaasiinillu aserfallatsaaliuillunilu nutarteri­sus­saq. Naatsorsuutigaarput piffissamik eqquilluartuullutillu sulianik naammassisaqarnermik takutitsisin­naas­suseqartutit, aaqqissuussaasumik aalajaatsumillu eqqarsartaaseqartutit aammalu oqariartuutigini­akkannik suleqatinut suleqatigisakkanullu apuussilluarsinnaasutit. Taamaammat nalunaaruteqarniartar­ninni erseqqissuliortarnissat pitsaasuussaaq.
Naatsorsuutigaarput suliffimmi ulapaarfiusinnaasartumi nammineerlutit sulisinnaasutit, pisortani allaffis­sor­neq iternga tikillugu ilisimasaqarfigigit, kiisalu oqariartuutinik oqaasertaliilluarsinnaassuseqarlutillu paa­sisitsiniaallaqqissuusutit.
Kalaallit oqaasiinik aamma/imaluunniit kulturiannik ilisimasaqarnissat pitsaasuussaaq, soorluttaaq aam­ma paasissutissat inunnut tunngasut pillugit inatsimmik, matumani aamma paasissutissanik suliaqarneq pillugu isumaqatigiissutinik, sullissisunut isumaqatigiissutinik il.il. ilisimaqarnissat pitsaalluinnassasoq.
Sulilersussaq atorfimmut naleqquttoq immikkut ittumik siunnersortitut atorfininnissamut periarfissa­qar­poq.
 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk