Skip to main content
112

Sanaartornermut Nakkutilliisoqarfimmut allaffimmi pisortatut atorfik pissanganartoq

Namminersorlutik Oqartussat illuliortiternermut sanaartornermullu takorluugaannik ineriartortitseqataarusuppit piviusunngortitseqataarusullutillu, aammalu illulianik sanaartukkanillu pitsanngorsaanermi nutaaliornermut nunatsinnut nuannaarutaasumik iluaqutaasumillu qulakkeereqataarusuppit?

Allaffimmi pisortassamik tunniusimasumik misilittagalimmillu, ineriartortitsinermik nutaaliornermillu suliaqartussamik, Sanaartornermut Nakkutilliisoqarfimmut 1. oktober 2019 aallarnerfigalugu imaluunniit isumaqatigiissuteqarnikkut piaartumik atorfinittussamik pissarsiorpugut.

Sanaartornermut Nakkutilliisoqarfiup Namminersorlutik Oqartussat nutaaliornissaq ineriartortitsinissarlu, kiisalu sanaartukkanik pitsanngorsaanissaq eqqarsaatigalugu anguniagaannik pingaarnernik isumagisaqarput. Kiisalu Sanaartornermut Nakkutilliisoqarfiup illulianik sanaartukkanillu allanik sanaartornermi, nappaatiterinermi ilusilersuinermilu qitiusumik suliassanik aalajangersakkanillu isumagisaqarput, kiisalu Namminersorlutik Oqartussat inissialiortiternerini sanatitsisutut inissisimallutik.

Sanaartornermi Nakkutilliisoqarfimmi ineriartortitsinermut nutaaliornermullu allaffimmi pisortatut Naalakkersuisoqarfimmi aqutsisooqatigiinnut ilaassaatit.

Neqeroorutigaavut,
Sanaartornermi Nakkutilliisoqarfimmi sulineq avatangiisini pissanganartuni suliatigullu unammillernartuni, ineriartortitsinermut akisussaaffeqarnissamut suliatigullu ineriartoqqinnissamut periarfissaqarfiulluartuni ingerlanneqarpoq.

• Suliffeqarfik nutaaliornermik nutaanillu eqqarsarnermik aallussiviusoq
• Naalakkersuisoqarfimmi politikkikkut aalajangiisarnerit qanillugit sulineq
• Sullivimmi avatangiisit pingaartorsiorfiunngitsut ammasullu, tunniusimasunik suleqateqarfiusut
• Inuttut suliatigullu unammilligassat pissanganartut kiisalu ilinniaqqinnissamut periarfissat

Ataqatigiinneq pingaartorsiorfiunngilaq, aammalu ulluinnarni ulapaarfiusuni qiimaneq ersarippoq, kisiannili aamma suliffiup ilaqutariittullu inuunerup ataqatigiinnissaat ataqqineqarpoq.

Suliassaqarfiit
Sanaartornermut Nakkutilliisoqarfimmi allaffimmi pisortatut pingaartumik sanaartukkani sulianik aqutsineq pingaarneq, suliniutinik assigiinngitsunik ineriartortitsineq atuutsitsilertarnerlu aammalu pisortat illuliornerini peqqussutit suliarissavatit. Tamatuma saniatigut Namminersorlutik Oqartussani suliassaqarfinnut Naalakkersuisoqarfinnut sullissivinnullu siunnersuisarneq pingaarneq isumagissavat.

  • Sanaartornermi teknikkimut tunngasunik Naalakkersuisunut aamma Naalakkersuisoqarfimmi pisortaanermut siunnersuisarnermi ikiuunneq
  • Ukiumoortumik aningaasanut inatsisissat ilassutitullu aningaasaliissutissat suliarineqarnerini ikiuunneq
  • Sanaartukkani illulianilu nutaani, taakkununngalu ilanngullugit atortuni nutaaliorneq ineriartortitsinerlu
  • Sanariaatsit nutaat pillugit suliassaqarfiit akimorlugit suliniutinik ineriartortitsineq atuutsitsilertarnerlu
  • Sanaartukkanut atortut digitaliusut atorneqarnerini ikiuuttarneq ineriartortitseqqinnerlu
  • Sulianik / isumaqatigiissutinik aqutsineq
  • Ajornartoorfiusinnaasunik naliliisarneq aamma ajornartoorfiusinnaasunik aqutsineq
  • Suliani aalajangersimasuni siunnersortinik avataaneersunik aqutsineq
  • Sanaartornermi teknikkimut tunngasut pillugit Naalakkersuisoqarfiit akimorlugit suleqatigiissitanut peqataaneq
  • Naalakkersuisoqarfimmi sanaartukkanut aningaasaliissutinik aqutsineq, atugassiisarneq nakkutilliinerlu aammalu missingersuutinut malinnaaneq
  • Naalakkersuisut Inatsisartullu suliassaannik ataqatigiissaarineq suliaqarnerlu
  • Inuinnarnit taamatullu pisortanit saaffiginnissutinut akissuteqartarneq, taakkununnga tusarniaanerit ilaallutik
  • Naalakkersuisoqarfiup suliassaqarfiisa tamarmiusut iluanni suliassaalersut assigiinngitsut

Sanaartornermut Nakkutilliisutut suliassat assigiinngiiaartut naammattoortassavatit, tassanilu suliassat akimorlugit suleqatigiinnissaq eqaatsumillu aaqqiisarnissaq pisariaqarpoq, tamannalu ulluinnarni sulininni ersiuteqartassaaq.

Qinnuteqartoq naleqquttoq
Qinnuteqartoq naleqquttoq teknikkikkut attuumassutilimmik ilinniagaqarsimassaaq, aammalu pisortat illuliortiternerannik sanaartornerannillu ilisimasaqassaaq, kiisalu sivikinnerpaamik ukiuni qulini sulianik attuumassutilinnik misilittagaqarsimassalluni.

  • Aaqqissuussaanermi politikkikkut aqunneqartumi sulinermik misilittagaqartoq
  • Pisortat illuliortiternerini sanaartornerinilu sulianik aqutsinermik ilisimasalik misilittagalillu, tassunga aningaasaqarnermik aqutsineq ilanngullugu
  • Nutaanik sanaartornermi illuliortiternermilu malitassanik ineriartortitsinermik atuutsitsilertarnermillu misilittagalik
  • Sanaartornermut atortunik digitaliusunik aamma Byggeweb-imik atuinermik ilisimasalik misilittagalillu
  • Namminersorlutik Oqartussat aningaasaqarnermik aqutsissutaannik, XAL-imik, tassungalu ilanngullugu Time/Sag-imik ilisimasalik misilittagalillu
  • Ungasianiit aqutsinermik misilittagalik
  • Sulianik paasisimaarinnittoq aammalu sulianik ataatsikkut amerlasuunik ingerlatsisinnaasoq
  • Sunniisinnaasoq
  • Ilumoorussisoq, isumagissaartoq aammalu sullivimmi avatangiisinut uummaasissunut naleqqussarsinnaassusilik
  • Suliniuteqarnissamut piumassusilik suleqateqarsinnaasorlu, taamatullu namminersorluni sulisinnaasoq
  • Allakkatigut oqaluinnarnikkullu ingerlatitseqqinnissamut piginnaanilik
  • Najoqqutassanik paasiuminaatsunik ajornaatsumik paasiuminartumillu ingerlatitseqqinnissamut piginnaanilik

Atorfimmi ilinnut piginnaasannullu annertuumik piumasaqarfigineqartarneq misigissavat. Suliatigut qaffasissunik piginnaaneqarnerpit saniatigut inuttut arlalinnik piginnaaneqarfeqarnissat naatsorsuutigaarput, taakkununngalu sulianik amerlasuunik assigiinngitsunillu ilisimaarinninnerup a paasinnissinnaanerup akornanni oqimaaqatigiissitsisinnaanissat, namminersorluni ataatsimoorlunilu pilersitsisarnerup akuleriissinneqarnerini iluaqutissanik takunnissinnaanissat, kiisalu ileqqorissaarlutit, pingaartorsiornak qungujulaarlutillu ulluinnaat suliffiusut – ilaanneeriarluni ulapaarfiusartut – peqataaffigisinnaassagitit.

Kalaallit oqaasiinik inuiaqatigiinnillu ilisimasaqarnissat, kiisalu politikkikkut anguniakkanik pingaarnernik ilisimasaqarluarnissat piumasaqaataavoq.

Avatangiisini pingaartorsiorfiunngitsuni suleqatikkuminartuuvutit, aammalu sutigut tamatigut aqutsisinnaavutit attaveqarsinnaallutillu. Pitsaassutsimik ilisimaarinnikkuit aammalu apeqqutit pisariusut pilersitsiviusinnaasumik isigisiniarsinnaagukkit iluaqutaassaaq. Atorfimmi eqaatsumik aaqqiisinnaanissat, piffissallu ilaani annertunerusunik suliaqartarnissamut piareersimanissat pisariaqartinneqarpoq.

Pingaarnertullu allannguinissamut kajumissuseqassaatit aammalu pisortat sanaartornerinik suliaqarnitsinni pitsaasunik tapersiisinnaassallutit. Ulluinnaat ulapiffiusut nuannaraatit suliassallu ataatsimut isigalugit paasisimaarilluassallugit, aammalu isumassarsiat timitalersinnaavatit.

Paasissutissat amerlanerusut
Atorfiup imai pillugit paasissutissat amerlanerusut Immikkoortortaqarfimmi Pisortaq Embla Kristjánsdóttir, emki@nanoq.gl aqqutigalugu saaffigalugu pissarsiarineqarsinnaapput.
 

Akissarsiat atorfeqartitaanermilu atugassarititaasut:
Atorfik akissaateqarfimmi LR 38-mi. (Lønnen i (LR 36) udgør med faste løndele: 21. januar 2016 kr. 45.393,59 pr. md. og årligt kr. 544.723) maanna inissisimavoq.

Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemandi-tut atorfeqareersimaguni Nunatsinni pisortani tjenestemandit pillugit inatsisit malillugit tjenestemandinut atugassariti-taasut naapertorlugit atorfinitsinneqarsinnaavoq.

Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat.

Piffissap suliffiusussap sivisussusissaa aallaavittut sapaatip akunneranut nalunaaquttap akunnerinik 40-nik sivisussuseqarpoq.

Akissarsianut atorfeqartitaanermullu tunngasutigut piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk