Skip to main content
152

Qaqortumi Ilinniartunut Siunnersuisarfik tarnip pissusaanik immikkut ilisimasalimmik pissarsiorpoq

Nuna tamakkerlugu ilinniartunik Majoriamiittunillu siunnersuisarfimmi sulerusuppit?
Saaffigineqartut taakku akornanni ilinniakkaminnik naammassinnittartut amerlineqarnissaannut ingerlalluarnerunissaannullu peqataarusuppit?
Suliffeqarfimmi eqeersimaartumi suliassanut tunngatillugu sunniuteqaqataaffigisinnaasanni sulerusuppit?
Atorfik pilerigigukku qinnutigissavat.

Ilinniartunut Siunnersuisarfik sunaana?
Inooqataanikkut Tarnikkullu Siunnersuisarfik – (nalinginnaasumik Ilinniartunut Sunnersuisarfimmik taaneqartartoq) Nuna Tamakkerlugu Ilitsersuisarfimmi immikkoortortaavoq. Ilitsersuisarfik Ilinniartitaanermut, kultureqarnermut Ilageeqarnermullu Naalakkersuisoqarfiup ataani Aningaasaqarnermut inatsimmi aningaasalersugaavoq siunertarlu tassaavoq: ”Saaffigisat atornerlunneqarsimasut ilinniakkaminnik nammassinnittartut amerlisinnissaat, inuunermik naleqarnerulersitsineq kiisalu atornerlueriaatsit ingerlateqqinneqartarnerannik pitsaaliuineq.” (Aningaasanut Inatsit, 2018). Ilinniartunut Siunnersuisarfik tallimanik immikkoortortaqarpoq taakkulu illoqarfinni ukunaniipput: Qaqortoq, Nuuk, Sisimiut, Aasiaat Ilulissanilu. Ilinniartunut Siunnersuisarfimmi sulisut tarnip pissusaanik immikkut ilisimasalittut, tarnikkut katsorsaasututullu ilinniarsimasuupput.

Qaqortumi immikkoortortaq:
Nunatta kujataani illoqarfimmi Qaqortumiissaatit tarnip pissusaanik immikkut ilisimasalimmik qanimut suleqateqarlutit. Aaqqisuussaanikkut Ilinniartunut Siunnersuisarfimmi tarnip pissusaanik immikkut ilisimasalittut pisortap Nuummiittup ataani inissisimassaatit. Illoqarfimmi Campus Kujalleq ilinnarfiuvoq Majoriaqarlunilu, tamatuma saniatigut immikkoortortaq kommunimi illoqarfinnik arlalinnik Majoriaqarfinnik sullissisuuvoq. Immikkoortortaq Kalaallit Nunaanni Ilinniartunut Siunnersuisarfimmut ilaavoq immikkoortortallu akimorlugit suleqatigiittoqarluni. Qaammammut ataasiarluni Skype atorlugu ataatsimeeqatigiittoqartarpoq ukiumullu marloriarluni illoqarfimmi ataatsimi katersuunnikkut ataatsimoortoqartarluni.

Kina pissarsiariniarparput?

Tarnip pissusaanik immikkut ilisimasalimmik - ajornanngippat sulisinnaatitaanermut uppernasaatilimmik pissarsiorpugut, ilinniarnerminnilli naammassinnerlaat sulisinnaatitaanermut uppernarsaammik pissarsiniat tigusisinnaavugut.
Sulisumik makkunannga misilittagalimmik aamma/imal. soqutigisalimmik pissarsiorpugut:
  • Majoriami ilinniartunik ataasiakkaanik oqaloqateqartarneq,
  • Eqimattanik katsorsaaneq,
  • Suleqatinik Majoriami ilinniartunik toqqaannartumik attaveqartunik ikorfartuineq,
  • Suliniutinik sammisanilluunniit ingerlalluarnerulersitsisinnaasunik allanik ilaatigut saqqummiussinernik, suleqatigiissuteqartitsinernik/workshops, pikkorissaanernik suliaqarneq,
  • Ilinniartunik illoqarfinni allaniittunik qarasaasiakkut siunnersuineq,
  • Saaffigisanik tamanik sakkut teknologiskiusut atorlugit ikiuineq,
  • Suliffiup iluani avataanilu suliffeqarfinnik allanik ikiorsiissutinullu tunngatillugu suleqatigiinnermut piginnaassuseqarluartoq. 
  • Ajornanngippat kalaallisut/qallunaatullu illugiinnik oqaasilik

Suut neqeroorutigaagut?

  • Suliaq isumalik pissanganartunik saaffigisalik
  • Kalaallit Nunaanni ilinniartitaanerup siuarsarneqarnerani sunniuteqarsinnaaneq.
  • Suliat pissanganartut allanngorartullu, suliallu sunniuteqaqataaffiginissaannut periarfissiisut
  • Suleqatit tunniusimasut pikkorissullu
  • Sulisinnaatitaanermut uppernarsaateqanngikkaanni uppernarsaatitaarnissaq pingaarnersiuilluni tulleriiaarinermi salliunneqassaaq.
  • Inuttut ilinniakkatigullu ineriartornissamut, pikkorissarnissamut ikorfartorneqarnissamullu periarfissinneqarneq.
  • Sulinermut atatillugu Kalaallit Nunaanni illoqarfiit assigiinngitsut tikillugit angalanissanut periarfissinneqarneq

Atorfiup aggustusip ulluisa  aallaqqaataanni 2019 tamatumaluunniit kinguninngua inuttalerneqarnissaa kissaataavoq.

Tunngaviusumik sap. ak. nal. ak. 40-it suliffiupput.

Qinnuteqarneq kingusinnerpaamillu qinnuteqaammik tunniussinissaq
Siuliani paasissutissiissutit soqutiginnilersitsisimassappata imal. atorfik pillugu paasissutissanik allanik pissarserusukkuit tarnip pissusaanik immikkut ilisimasalik Sofie Sand Ullum mailikkut: sosa@aqqut.gl imal. oqarasuaatikkut: +299 346863 imal. tarnip pissusaanik immikkut ilisimasalittut pisortaq Lars Husted mailikkut: lahu@aqqut.gl imal. oqarasuaatikkut: +299 34 68 65 attavigisinnaavat.
Danmarkimiit sianissaguit nalunaaquttap nikinganera maluginiagassaraat. Danmarkimi nal. ullup qeqqarpat Kalaallit Nunaanni ullaakkut arfineq pingasunngussaaq.

Qinnuteqaat Nuna Tamakkerlugu Ilitsersuisarfimmit kingusinnerpaamik julip ulluisa 24-anni 2019 tiguneqareersimassaaq.
Qinnuteqaat uunga nassiunneqassaaq: nti@aqqut.gl  

Sap. ak. 30/31-imi qinnuteqartunik oqaloqateqarneq ingerlanneqassaaq
 
Akissarsianut atorfininnermullu atatillugu atugassarititaasunut tunngasut
Atorfinititsineq tunngaviusumik isumaqatigiissutit naapertorlugit pissaaq, qinnuteqartoq tjenestemanditut atorfimmeersuuppat tjenestemanditut atorfinititsisoqarsinnaavoq.
Atorfininnerup nalaani Namminersorlutik Oqartussat kattuffiullu illuatungiliuttup isumaqatigiissutaat atuuttoq naapertorlugu, akissarsiat atorfininnermilu atugassarititaasut tamatumunngalu ilanngullugu angalanermut pisattanillu assartuussinermut akiliussisoqassaq.

Naalagaaffimmi tjenestemandit qaffasissumillu ilinniagallit (AC) isumaqatigiissutaat- ilaatigut DJØF-ip Finansministeriallu isumaqatigiissutaat naapertorlugu atorfinitsitat, Kalaallit Nunaanni Namminersorlutik Oqartussani atorfininnermut atatillugu akissarsiaqaratik sulinngiffeqarsinnaatitaapput. Kalaallit Nunaanni Namminersorlutik Oqartussani atorfininnermut atatillugu akissarsiaqarani sulinngiffeqarsinnaatitaaneq Indenrigsministeriap Qallunaat Nunaanni kommunut nunallu immikkoortuinut ammaffigeqquaa. Sulinngiffeqartitaanermut tunngatillugu aalajangersakkat Kalaallit Nunaanni Namminersorlutik Oqartussani atorfinittut aapparisaannut/inooqatigisaannut aamma atuupput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk