Postdoc-itut atorfik qeqqussanut immallu orpippassuinut  

Postdoc-itut atorfimmut qinnuteqaatit Silap Pissusianik Ilisimatusarfimmut nassiunneqassapput. Ilisimatusarluni suliniummut pissanganarluinnartumut: ‘Tracing the fate of macroalgae with a focus on blue carbon processes in sub-Arctic North Atlantic fjord økosystems and beyond (BlueCea)’-mut peqataanissamut periarfissatsialaavoq.

Atorfik suliffigineqarsinnaalissaaq 1. juni 2023 aallarnerfigalugu sukkanerpaamilluunniit.

Silap Pissusianik Ilisimatusarfik (GCRC), Pinngortitaleriffimmi immikkoortortaqarfiusoq, Nuummi Kalaallit Nunaanniittumi ukiuni marlunni postdoc-itut atorfimmi neqerooruteqarpoq. Postdoc-itut atorfik savalimmiut ilisimatusarnermut siunnersuisoqatigiiffiata aningaasaliiffigaa, ilisimatusarlunilu suliniutaasumut: ‘Tracing the fate of macroalgae with a focus on blue carbon processes in sub-Arctic North Atlantic fjord økosystems and beyond (BlueCea)’ sulilersoq suleqataasussaalluni. Postdoc-kandidatitut ilinniartoq Nuummi ukiuni marlunni atorfeqarluni sulisussaavoq, imaanilu sulilluni  ataatsimiigiarlunilu angalasarnissat naatsorsuutigineqassapput. Nunat avannaamioqatigiit tallimat suliniummut suleqataapput, taakkununnga ilaallutik Aarhus Universitet (Danmark), Fiskaaling (Savalimmiut), Tari (Savalimmiut), Færøernes Havforskningsinstitut (Savalimmiut) aammalu GCRC (Kalaallit Nunaat).

Toqqarneqartup immap orpippassuinut tunngasutigut  suleqatigiinneersut tamaasa suleqatigisartussaavai, soorlu qeqqussanut equutillu naatsorsuutigineqartutulli kulstof-ip annersaanik milluaasarnersut silallu allanngoriartornerata kingunerisaanik imaani orpippassuit kulstofimillu milluaasarnerat qanoq sunnerneqassava, qeqqussat imaani orpippassuaqarfiisa annertussusiat, annertussusiallu oqimaassusinngorlugu aammalu kuldioxid-imik milluaasinnaassusii misissorneqartussaapput.  

Suliniummi kangerluit marluk sammineqartussaapput tassalu Kaldback fjord, Savalimmiut aammalu Kangerluk Sermilik, Kalaallit Nunaata Kangiani. Postdoc’ertup imaani katersisarnermi saniatigut satellitsikkut assilisanik misissueqqissaartartussaavoq qeqquaqarfiit nunap eqqaaniittut, kangerlunniittut avataaniittullu misissuiffigilluartussaallugit. Suliap ingerlanerani immami kisitsisilersuilluni misissuinerni periutsit atuutereersut (Kangerlunni pissutsinik misissuineq) atorlugit Kalaallit Nunaanni – Islandimi – Savalimmiuni – Skotlandillu sineriaani qeqquaqarnerup tungaatigut siunissami susoqarnissaanik siumoortumik oqaaseqarsinnaanerulernissaq pitsanngorsarniarneqarpoq.    

Akisussaaffiit:
Toqqarneqartup qanimut suleqatigisussaavai postdoc’it allat suliniummik taassuminnga suliaqartut. Immikkut akisussaaffigisassat makkuupput:

• Kalaallit Nunaata Kangiani Savalimmiunilu sulinissat pilersaarusiornissaat peqataaffiginissaalu, qeqquanik uumassusillillu toqusimasut sinnerini katersillunilu, peqassuseq oqimaassusinngortillugu aammalu uumasoqatigiiaat assigiinngissitaarneri pillugit paasissutissanik katersisartussaavoq.  
• GCRC’ip immap naqqani uumassusilinnik nakkutilliilluni misissuinerinut peqataasarnissaq.
• Videoliorluni qeqquaqassutsimik misissuilluni immiussanik nalilersuilluni.
• Qeqquat uumassuseqartullu toqusimasut sinnikuisa satellitsikkut assilineqarnerinik misissuineq
• Ilisimatuussutsikkut paasisat saqqummiussisarfiini saqqummersitsisarnissaq ilisimatuussutsikkullu ataatsimeersuarnernut peqataasarnerit.
• Paasissutissiinernut suliaqartarnernut peqataasarluni.

Piginnaasassat:
Piukkunnarnerpaatut toqqagaasoq ph.d.’qassaaq imaani uumassuseqarnermut uumasulerituutut imaluunniit økologi’tut qeqquaqarnerit aammalu imaanilu orpippassuarnut tunngasutigut ilisimatusarsimassalluni. Postdoc-kandidatinngorniartoq attaveqatigiillaqqissuusariaqarpoq suleqateqarsinnaalluarsinnaasariaqarlunilu, aammalu suliaminut tunngasunik aallussisinnaassuseqarlunilu nammineersinnaassuseqartussaavoq  ilisimatusartullu akunnerminni paasisaannik suliaannillu ilanngussuilluni ataatsimoorussamik suliaqarsinnaassuseqartariaqassalluni.
Inuk namminermini piumassuseqareersoq pimoorussilluartorlu ukuninnga piginnaanilik pissarsiarerusupparput (imaluunniit saqqummiunneqartut ilaannik):

• Ataatsikkut arlalinnik naatsorsueqqissaarlunilu misissuinerit R/Phyton atorlugu
• Qeqquat sorliit suussusersinissaannut misilittagaqassaatit
• Imaani misissuisarnernik pilersaarusiorneq ingerlatsinerlu misilittagaqarfigaatit (umiatsiamiit-/umiarsuarmiit misissugassanik tigooraalluni)
• ROV/dronet atornissaannut misilittagaqarnissaq kingornalu immiussat nalilersuiffigisinnaanissaat
• Ilisimatusartunit akuerineqarsimasunik saqqummiussineq misilittagaqarfigaat
• Suliniummik aqutsinermik ataqatigiissaarinermillu misilittagaqarputit
• Tuluttut allalluarsinnaallutillu oqallorissuusariaqarputit

Atorfik juunip aallaqqaataa 2023 kingornalumi inuttalerneqarsinnaalissaaq.

Aningaasarsiatigut atorfinitsitaanermilu atugassarititaasut:
Postdoc’itut tamakkiisumik sulisussatut atorfinitsinneqarnissaq ukiuni marluinnarni atuuttussaavoq. Sulilersoqarsinnaavoq juuni 2023 isumaqatigiissutaasorluunniit naapertorlugu.
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Atorfik Silap Pissusianik Ilisimatusarfiup aqutsisuata ataaniittussaavoq.

Najugaq:
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Sukumiinerusumik paasisaqarniaraanni:
Atorfik pillugu sukumiinerusumik paasisaqarniaraanni taava Nadescha Zwerschke mailimut nazw@natur.gl -mut saaffigineqassaaq.

Kingusinnerpaamik qinnuteqarfissaq: 1. apriili 2023

Qinnuteqarnissamut periusissaq:
Qinnuteqaat qarasaasiakkoortoq tuluttut allallugu nassiunneqassaaq ”Nassiuguk” toorlugu. Qinnuteqaatit makkuninnga imaqartussaavoq/kiggiussanik ilaqartussaavoq – tamarmillu PDF-inngorlugit nassiunneqassallutik:

1. Qinnuteqaat (takinerpaamik 2 quppernerit)
2. CV ilinniarsimaneq ilanngullugu, sulinermi/ilisimatusarnermi misilittakkat, oqaatsinik qanoq piginnaaneqartigineq aammalu piginnaasat allat piukkunnaateqartut.  
3. PhD diplomi aammalu kandidatinngorsimanermut uppernarsaat. PhD suli naammassinngikkaanni taava PhDmut siunnersortiminngaaniit allakkatigut uppernarsaanissaq naammassaaq.
4. Saqqummersinneqarsimasut allattorsimaffiat.

E-mail-ikkut qinnuteqaatinik tigusineq ajorpugut.
 

Qinnuteqaat nassiuguk