Skip to main content
67

Dette jobopslag er udløbet

Pitsaaliuinermut Isumaginninnermullu Aqutsisoqarfik innuttaasunut katsorsaanermik neqeroorutinik ineriartortitsinermut pimoorussisumik suliniutinut aqutsisussarsiorpoq

Innuttaasunut katsorsaanermik neqeroorutinik ingerlatsinernut qulakkeerinninnissaq ineriartortitsinissarlu kajumigisaqarfigaagit? Taakkununnga ilaalluni inunnut inatsisitigut ataataqanngitsunut neqeroorutit aammalu inunnut persuttaasarnertigut pissusilersortartunut neqeroorutit. Ineriartortitsinernik ingerlatsinermi aqutsisutut aammalu avataanit suleqatinik suleqateqartarnernik suliaqarlutit nuannarigukku, taava atorfitsialammik periarfissippatsigit!
 
Atorfik pillugu
Suliniutinik ineriartortitseqqinnissaq suliassarilissavat, aammalu piujuartitsinermillu atuutsitsilernissaq qulakkiissallugu.
Taamaattumik suliniutinik aqutsinerit, allaffissornikkut suliassat kiisalu assersuutigalugu tarnip pissusaanik ilisimasallit suliaannik ataqatigiissaarisarnerit aammalu oqarasuaatitigut siunnersuisartut akornanni sunniiveqatigiinnerni sulisinnaassaatit. Iluaqutaassaqaaq Kalaallit Nunaanni persuttaanermut tunngasut aamma/imaluunniit isumaginninnermut tunngasut iluini ilisimasaqarlutillu misilittagaqaruit, taamaasillutit suliniutit ineriartortinnerisa nalaani ilisimasatit misilittakkatillu sunniuteqaatigisinnaallugit.  Atorfimmi pingaaruteqarpoq suleqateqarluarsinnaanermik piginnaasaqaruit atassuteqarnernillu pilersitsinissamut attatsitsinissamullu pikkorissuuguit.
 
Neqeroorutit maannakkorpiaq illit akisussaaffigisassatit tassaapput Alliaq aamma Inatsisitigut ataataqanngitsunut suliniutit. Alliami katsorsarneqarnissap siunertaa tassaavoq, angutit arnallu nakuusertartut nakuusertarnerminnik nassueruteqarnissaat nakuusertarnerminnullu akisussaaffimmik tigusinissaat kiisalu nakuusertarunnaarnissaat. Inatsisitigut ataataqanngitsunut katsorsaanissamik neqeroorutitigut suliniuteqarfiit pingasuupput: innuttaasunut inatsisitigut ataataqanngitsunut tarnip pisussaanik ilisimasalinnit katsorsaasarnerit aammalu inatsisitigut siunnersuisarnerit kiisalu inuiaqatigiinni kalaallini, kiisalu innuttaasunut inatsisitigut ataataqanngitsunut siunnerfeqartumik paasissutissiisarnerit.
 
Atorfiit Qitiusumik Siunnersuisarfimmi Pitsaaliuinermut Isumaginninnermullu Aqutsisoqarfimmiittumi inissisimapput, taakku ilaatigut kommunit ingerlatsiviini inatsisitigut isumaginninnermillu suliaqarnermut ikiuuttarpoq oqartussaasunullu meeqqanik inuusuttunillu atugarliortunik sullissisunut tunngatinneqarluni. Qitiusumik Siunnersuisarfimmi oqartussani ingerlatsivinnilu sullissisunut siunnersortinnerit ilitsersuunneqarnerillu kiisalu meeqqanik inuusuttunillu atugarliortunik suliassaqarfimmi supervisioni neqeroorutigineqartarput. Taamatuttaaq immikkoortortami innuttaasunut neqeroorutit, soorlu kinguaassiutitigut kannguttaatsuliornermut tunngatillugu angalaqatigiit, Oqarasuaatikkut siunnersuisarfiit Tusaannga aamma Alliaq isumagineqartarput.
 
Suliassatit pingaarnerit tassaapput:

  • Suliniutinik aqutsineq aammalu ineriartortitsinermik sammisuusumik sulisinnaassuseqartutit Suliniutinut aqutsisutut ilinniarsimasuuguit iluaqutaassaqaaq
  • Allaffissornikkut suliassat, ilaatigut tassaasinnaasut killiffiit pillugit ataatsimiinnerit, akissarsiat aammalu avataanit siunnersortinut isumaqatigiissutit, IT supportinut attaveqartarnerit
  • Persuttaanermut akiuiniarnermi sulianik ineriartortitseqqinneq, taakkununnga ilaallutik tarnip pissusaannik ilisimasalinnik aammalu oqarasuaatitigut siunnersuisartunut, paasissutissiisarnertigut suliniutinut, sullitanillu suliniuteqareernermi malitseqartitsinernut/naliliivigisaqartarnernut ukiumoortumik ataatsimiinnissamik pilersaarusiornissaq
  • Suliniutinut paasissutissat
  • Susassaqartunik suleqateqarneq
  • Missingersuutinik aqutsineq
  • Innuttaasunut neqeroorutinik akunniliulluni sulissussineq


Illit piginnaasatit aammalu inuttut piginnaasat:
Suleqatitut ammasuuvutit ilakkuminartuullutit. Illit suliassatit ataatsimullu suliassat akisussaaffigisinnaallugit. Tunniusimasuunissat  namminerlu suliassarsiullaqqissuunissat uatsinnut pingaaruteqarpoq. Tamatuma saniatigut pingaartipparput, illit:

  •  Suliniutinik aqutsinermik misilittagaqassaatit.
  • Tamakku saniatigut pingaaruteqarpoq suliniutitigut allaffissornikkut suliassat ilaannik suliarinnissinnaanissat
  • Peqqissaartuullutit pitsaassutsimillu pingaartitsisuusutit
  • Tamakkiisumik isiginnillaqqissuussasutit nutaanillu sammisaqarusuttuullutit
  • Ataqatigiissaarillaqqissuuvutit nammineerlutillu sulisinnaassuseqarputit
  • Allattariarsornermi oqaluttariarsornermilu attaveqarnermut pikkorissuullutit


Neqeroorutigaavut:

  • Suliffik nammineerfiusoq,tassanilu suliniutit sunniuteqarfigissallugit periarfissaqarputit
  • Suliassat allanngorartut pissanganartullu
  • Suleqatit soqutiginnittut suleqatiginnikkusuttullu
  • Suliffimmi isumannaallisaanikkut pissutsit suliamullu naleqquttunik sulinissamik nukittorsaanissaq pillugu suleqatigiittut isumasioqatigiinneq
  • Aaqqissuussaaffimmut annertuumik ineriartorfiusumut ilanngutissaatit


Pitsaaliuinermut Isumaginninnermullu Aqutsisoqarfik pillugu
Pitsaaliuinermut Isumaginninnermullu Aqutsisoqarfik, Naalakkersuisuni aqutsisoqarfiuvoq tulliuttunik tallimanik immikkoortortaqarfeqartoq: Pinaveersaartitsinermut immikkoortortaq PAARISA, Aningaasaqarnermut immikkoortortaq, Ulloq unnuarlu aamma nalilersuisarnermut immikkoortortaq, Qitiusumik Siunnersuisarfik aamma Allattoqarfik. Immikkoortortaqarfiit qanimut suleqatigiittarput, suliffiuvorlu suliassanut tunngatillugu amerlasuunik unammilligassaqarfiusoq.

Aningaasarsiatigut atorfinitsitaanermilu atugassarititaasut
Suliassamik aqutsisutut atorfik ukiunut marlunnut killilimmik piffissaligaavoq. Atorfik aalajangersimasumik atorfiusoq sapaatit akunneranut 40 tiimit suliffiusartoq piaarnerpaamik inuttalerniarneqarpoq.
Atorfik aaqqissuussaanikkut Nuummi Pitsaaliuinermut Isumaginninnermullu Aqutsisoqarfimmi inissisimavoq.

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Paasissutissat sukumiinerusut
Atorfik pillugu annertunerusumik paasisaqarusukkuit, attavigisinnaavat sulianik aqutsisoq, Stina Mølgaard ugguuna +299 34 60 17 og stmo@nanoq.gl imaluunniit suliassamik aqutsisoq, Laura Øraker ugguuna +299 34 68 87 aamma laor@nanoq.gl.
 
Qinnuteqarneq
Qinnuteqarnissamut killigititaasoq tassaavoq ulloq 23. august 2020. Atorfinitsitsinissamut oqaloqateqarnissat ingerlanneqassapput  sapaatit akunneranni 35-mi.
 
Piffissaq atorfiniffiusussaq
Atorfik 1. oktober 2020 imaluunniit isumaqatigiissuteqarnikkut inuttalerneqarnissaa kissaatigineqarpoq.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk