Skip to main content
67

Dette jobopslag er udløbet

Pinngortitamut Avatangiisinullu Naalakkersuisoqarfimmi Pinngortitamut Silallu Pissusianut Immikkoortortaqarfik ilinniartumik ikiortissarsiorpoq

Nunatsinni allanngueqataanissamik kissaateqarpit? Pingaartumik uumasut nujuartat naasullu nungutaanissamut ulorianartorsiortut niuerutigineqarnerinik ingerlatsineq eqqarsaatigalugu? Allaffissorneq attaveqaqatigiinnerlu pikkoriffigaagit?

Taamaappat ilinniarninni Pinngortitamut Avatangiisinullu Naalakkersuisoqarfimmi atorfik immaqa ilinnut tulluutissaaq. Ilinniarnermi atorfimmi CITES-imut allaffimmi ingerlatsinermi suliassat iluanni sullissinermi ikiuisoqassaaq, tassunga allatassat ikinnerusut, sullissinerit annikinnerusut, nittartakkanik nutarterinerit allaffissornermilu suliassat assigiingitsut ilaallutik.
CITES nunani tamalaani uumasunik nujuartanik naasunillu nungutaanissamut ulorianartorsiortunik niueruteqarnermut isumaqatigiissummut naalisaataavoq, nunani tamalaani atuuttoq, Kalaallit Nunaata pisussaaffeqarfigisaa.

Atorfik pillugu
Ilinniartoq atorfeqartussaq sapaatit akunnerannut nalunaaquttap akunnerisa qulit 15-illu akornanni sulisassaaq, isumaqatigiissuteqarnikkut agguarneqartussani. Piffissat misilitsiffiusut eqaatsumik aaqqiiffigisarpagut.
Suliassat assigiinngissitaartuupput, kisiannili pingaarnertut suliassatit tassaassapput:
 

  • CITES-imut allaffimmi ingerlatsinermi suliassanik assigiinngitsunik isumagisaqarneq
  • Allakkatigut saaffiginnissutinut akissuteqartarneq
  • Ulluinnarni CITES-imut malittarisassat ataanni takornarianut akuersissutinik suliaqarnermut tunniussisarnermullu atatillugu sinerissami takornarianut pisiniarfinnut attaveqarneq
  • Paasititsiniaanermi atortussanik suliaqarneq nutarterisarnerlu, taakkununnga nittartakkat ilaallutik
  • Paasissutisssaasivimmut (CITES pillugu paasissutissaasivimmut) naqiterisarneq
  • Qinnuteqaatinik suliaqartarneq

Ilinnut tunngasut

  • Ilinniarfimmi imaluunniit Niuernermik Ilinniarfimmi ilinniakkami ingerlaqqiffiusumi, soorlu inuiaqatigiilerinermi pinngortitamiluunniit ilisimatusarnermi ilinniartuuvutit, imaluunniit attaveqaqatigiinnermut ilinniakkami, it-mut ilinniakkami ilinniakkamiluunniit attuumassutilimmi allami ilinniartuuvutit
  • Kalaallisut, danskisut ajornanngippallu tuluttut allakkatigut oqaluinnarnikkulluunniit attaveqaqateqarnissamut ingerlatitseqqinnissamullu pikkorissuuvutit
  • Ulluinnaat allanngorartut, qaqutiguinnaq assigiissinnaasut atorlugit sulinissamut pikkorissuuvutit
  • Aaqqissuussaanermi politikkikkut aqunneqartumi sulinissamut piareersimavutit
  • Piffissap atugassavit tulleriiaarnissaa pilersaarusiornissaalu pikkoriffigaat
  • Pisussaaffinnik naammassinnittarputit akisussaaffitillu ilisimaaralugit
  • Paasissutissaasivinnik suliaqarnermut ilisimasaqarneq iluaqutaassaaq, piumasaqaataanngilarli

Uagutsinnut tunngasut:
Pinngortitamut Silallu Pissusianut Immikkoortortaqarfik suliassaqarfinnik arlalinnik akisussaaffeqarpoq, taakkununngalu sumiiffinni eqqissisimatitsiviusuni ingerlatsineq, CITES-imut oqartussaaffeqarfimmik ingerlatsineq tassungalu ilanngullugu CITES-imut akuersissusiortarneq, UNESCO-p nunarsuarmi kingornussaqartitsiviani Ilulissat Kangianni ingerlatsineq, Kalaallit Nunaanni inuilaami ilisimasassarsiornissamut akuersissuteqartarneq kiisalu silap pissusianut attuumassutilinnik ingerlatsitseqqittarneq ilaatinneqarput. Aamma immikkoortortaqarfiup pinngortitami illersuinissaq pillugu nunani tamalaani isumaqatigiissutinik arlalinnik ingerlataqarneq akisussaaffigaa.

Ilinnut tulluussorigukku qinnuteqaatit kingusinnerpaamik 13. marts 2020-mi nassiuguk. Apriilip ulluisa aallaqqaataanni tamatumaluunniit kingorna piaartumik atorfinitsitsisoqassaaq.

Atorfik pillugu annertunerusumik tusagaqarusukkuit AC-fuldmægtigi Esben Ehlers e-mail esbe@nanoq.gl aqqutigalugu imaluunniit oqarasuaat 34 54 30-mut attaveqarfigisinnaavat. Tamatuma saniatigut Naalakkersuisoqarfik immikkoortortaqarfillu, taakkununngalu CITES ilanngullugu, pillugit nittartakkani ukunani atuagaqarsinnaavutit: 
https://naalakkersuisut.gl/kl-GL/Naalakkersuisut/Naalakkersuisoqarfiit/N...

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk