Skip to main content
152

Peqqissutsimut Pitsaaliuinermullu Aqutsisoqarfik aningaasaqarnermut pilersaarusiornermullu pisortassarsiorpoq

Nuummi Peqqissutsimut Pitsaaliuinermullu Aqutsisoqarfimmi aningaasaqarnermut pilersaarusiornermullu pisortassarsiorpugut. Atorfik piffissaq tamakkerlugu suliffiusussaq 2019-imi septembarip aallaqqaataani immikkulluunniit isumaqatigiissuteqarnikkut inuttassarsiuunneqarpoq.
 
Peqqinnissaqarfik ulluinnarni sulinitsinni politikkikkut, aningaasaqarnikkut nakorsaanikkullu soqutigisatigut unammilligassinneqarfiujuartoq, pissanganartumik ineriartorfiusumillu siunissaqarpoq. Periaatsinik pitsanngorsaanissaq, aningaasartuutissatut missingersuutinut malinnaaneq assigisaallu aningaasaqarnermut tunngatillugu sulinitsinni qitiutippagut, tamatumalu peqatigisaanik periarfissat nutaat inerisarneqarnissaat qulakkiigassaralugu. 
 
Taamaammat aningaasartuutissanut missingersuusianik malittarinninnikkut suliffeqarfimmut, pitsaanerpaamik angusaqarsinnaaneq qulakkeerniarlugu suliniutitigut politikkikkullu peqataanikkut suliffeqarfik akimorlugu sulisoqarneragut akuulersussamik, suliumatuumik angusaqarusussusilimmillu aningaasaqarnermut pilersaarusiornermullu pisortassarsiorpugut.
 
Kikkuuvugut?
Aningaasaqarnermut pilersaarusiornermullu immikkoortortaqarfik Peqqinnissaqarfiup Qullersaqarfiata ataani inissisimavoq. Immikkoortortami sulisut qulaaluat qulillu akornanniippugut, sinerissami qitiusumik immikkoortortanik, Dronning Ingridip Napparsimmavissuanik immikkoortortanillu allanik qanimut suleqateqarluta. Peqqinnissaqarfimmi tamakkiisumi 1200-illu missaannik sulisulimmi, aningaasanik aqutsineq tamatumunngalu atatillugu aningaasartuutinut tunngatillugu pilersaarusiorneq malinnaanerlu, suliassatta pingaarnersaraat.
Tamatuma saniatigut suleriaatsinik pitsanngorsaaneq-, naatsorsueqqissaarneq-, sulianik nalunaarsuineq-, tusarniaavigineqarnermi akissuteqaasiorneq politikerillu saaffiginnissutaat isumagisaraagut.  
 
Suliassatit
Aningaasaqarnermut pilersaarusiornermullu immikkoortortaqarfik akisussaaffigissavat suliassatillu pingaarnerit makkuussapput;
 

  • Aningaasaqarnermut pilersaarusiornermullu immikkoortortaqarfimmi aqutsinermut tunngatillugu akisussaasuuneq tamatumunngalu atatillugu immikkoortortaqarfimmi suliassat isumagineqarnissaasa immikkoortortaqarfiullu ingerlalluarnissaata qulakkeerneqarnissaannut akisussaasuuneq.
  • Politikkikkut saaffiginnissutit akissuteqarfigineqarnissaannut akisussaasuuneq
  • Peqinnissaqarfimmi aningaasaqarneq pillugu apeqqutinut tunngatillugu peqqinnissaqarfimmi qullersanut siunnersuisuuneq
  • Peqqinnissaqarfiup Qullersaqarfianut Peqqissutsimullu Naalakkersuisoqarfimmut aqutsinermi atugassanik paasissutissiorneq, allakkiorneq, tusarniaassutinut akissuteqarneq aalajangiinissamullu toqqammavissiornermi peqataaneq.
  • Suleriaatsinik pitsanngorsaanermi suliarinninnermilu peqataaneq
  • Suliniutinut aningaasaqarnermut pilersaarusiornermullu attuumassutilinnut akisussaasuuneq
  • Angusaqalertornermut pitsaassutsimullu tunngatillugu anguniagassatut siunniussanik suliaqarneq
  • Peqqinnissaqarfik tamakkerlugu aningaasartuutissatut missingersuutinik malittarinninnermut nakkutilliinermullu Aningaasaqarnermut Inatsimmi kontonut 1,4 mia. koruuninik aningaasaliiffigisanut akisussaasuuneq.

 
Illit kinaavit?
Illit tassaavutit aaqqissuussamik periuseqartoq ataqatigiissaarisinnaasoq, inerniliisinnaasoq, nunap immikkoortui, ilinniagaqassutsikkut politikkikkullu killigititaasut akimorlugit ingerlatitseqqiisinnaasoq. Tamanna nammineersinnaassuseqarnermik suleqatigiiaanilu peqataasinnaanermik piumasaqaatitaqarpoq.
 
Inuttut oqaluukkuminartuunissat qiimasuunissat-, suleqatinik pimoorussisunik suleqateqarnissamut kajumittuunissat-, sullivimmi pitsaasunik avatangiiseqarnissamik-, ataatsimuussutsimik ikorfartoqatigiinnermillu pingaartitsisuunissat pingaartitaraarput.
 
Tamatuma saniatigut makkunannga eqquutitsinissat naatsorsuutigineqarpoq:

  • Ukiut sisamat arfinillillu akornanni aqutsinermik misilittagaqarneq
  • Naapertuuttumik qaffasissumik ilinniaqarsimanissat ass. HD (R) imal Cand Merc,
  • Ukiut sisamat arfinillillu akornanni aningaasanik aqutsinermik, naatsorsuuserinermik, misissueqqissaarnermik, aningaasartuutissatut missinersuusiornermik suliniutinillu aqutsinermik misilittagaqarneq.  
  • Oqaatsitigut ersarissuuneq ajornartorsiutinillu paasilertoruminaatsunik ajornaatsumik ersarissumillu – allakkatigut oqaatsitigullu ingerlatitseqqiisinnaaneq
  • Sulianik ingerlatsinernik pitsanngorsaanermut atatillugu piginnaasaqarluarneq suliniutinillu aqutsinermik ilisimaarinninneq
  • Paasiniaaqqissaarsinnaassuseqarneq kisitsisinullu kakkattuuneq
  • Suliassanut suleqatinullu tunngatillugu suliumatussuseqarneq, akisussaassuseqarneq suliat ingerlanneqarnerannik angusanillu ukkassineq.

 
Akissarsiat atorfininnermullu atatillugu atugassarititaasut
Akissarsiat atorfininnermilu atugassarititaasunut tunngatillugu- tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorneqassapput. Kalaallit Nunaanni sap. ak. nal. ak. suliffiusartut 40-pput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik

Qinnuteqafissaq kingulleq: 15. august 2019
Atorfik sukumiinerusumik paasisaqarfigerusukkukku Aqutsisoqarfiup pisortaa Malene M. Nielsen oqarasuaatikkut (+299) 48 35 01 imal. e-mailikkut: mamn@peqqik.gl attavigisinnaavat.
 
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk