Skip to main content
153

Dette jobopslag er udløbet

Peqqinnisaqarfimmi Illuutinut Sanaartornermullu immikkoortumi qullersanut siunnersuinermi aqutsisoq Nuumiittussaq

Nunatsinni Peqqinnisaqarfimmi peqqinnissamut tunngatillugu nuna tamakkerlugu neqeroorutinik kinguneqarluartunik qaffasissumillu pitsaassuseqartunik innuttaasunut napparsimasunullu tamanut neqeroorsinnaanissaq suliniutigaarput. Taamaammat piginnaasatit atorfissaqartippagut.
 
Illuutinik aserfallatsaaliinerni sanaqqiinernilu, kiisalu teknikkikkut nakorsaanermilu atortulersuutinik aserfallatsaalinermi, qullersanut siunnersuinermi atituunik assigiinngiiaartunillu suliassaqarfiusumi aqutsinissaq, inerisaanissaq pitsaassutsimillu qulakkeerinissaq kissaatigaajuk– taamaassappat atorfissat nutaaq unammillernartoq pigaarput.

Atorfik
Kalaallit Nunaanni Peqqinnissaqarfimmi Illuutinut Sanaartornermullu immikkoortumi qullersanut siunnersuinermi aqutsisutut, Peqqinnissaqarfimmi aqutsisunik, sulisunik suleqatigisartakkanillu allarpassuarnik qanimut kinguneqarluartumillu sunniivigeqatigiinnikkut, Peqqinnissaqarfiup nuna tamakkerlugu illuutaanik teknikkikkullu atortulersuutaanik ulluinnarni ingerlatsineq inerisaajuarnerlu akisussaaffigissavatit.
 
Aningaasartuutissatut killiliussat qitiutillugit pilersaarusiorneq ataqatigiissaarinerlu ukkanneqassapput, tamatumalu peqatigisaanik periarfissanik nutaanik pitsannguutaasinnaasunillu inerisaaneq atuutilersitsinerlu ukkanneqassallunissaaq. Peqqinnissaqarfiup ataatsimut isigalugu allanngorartuarnera ilisimaaralugu taamaaliortoqassaaq, taamaalilluni siunissamut iliuusissanik eqqarsarluni illuutigisanik eqqanaarinissaq naleqqussartuarnissarlu suliassaapput annertuut pisarialillu.
 
 Peqqinnissaqarfimmi suliassat ingerlatsinerup attatiinnarnissaanut pingaaruteqartut nakorsaanermi atortorissaarutinit atortulersuutinillu ikorfartorneqarput. Nakorsaanermi atortorissaarutitigut sukkasuumik ineriartortoqarpoq Peqqinnissaqarfiullu Napparsimmavissuarmiit nunaqarfinni nakorsiartitsivinnut periarfissiisunik killiliisunillu assigiinngitsunik annertussusilinnik immikkoortortaqarneranik paasinninnissaq pisariaqarluni.
 
Ilinniagaqassutsikkut piginnaasaqarluartumik, aaqqiissutissanik ujartuisumik angusaqarusussusilimmillu Illuutinut Sanaartukkanullu immikkoortumut pingaarutilimmut qullersanut siunnersuinermi aqutsisussarsiorpugut. Ataqatigiinneq, siunissamut qulakkeerineq aningaasaqarnerlu tappiffigalugit suliassat tamarmik ingerlanneqassapput. Qullersanut siunnersuinermi aqutsisutut, sulisunik sivisuumik atorfeqarsimasunik  Peqqinnissaqarfiullu oqaluttuassartaanik ilisimaarinnittunik, aammali nukissanik nutaanik ilinniagaqassutsikkut aqutsinikkullu siunersioqateqarnissamik pisariaqartitsisunik aqutsisussaassaatit.
 
Suliassarpassuatit ilaatigut makkuussapput:

  • Peqqinnissaqarfimmi qullersanik aqutsisunillu allanik siunnersuineq
  • Teknikkikkut atortorissaarutit aserfallatsaalinissaannut pilersaarusiorneq aningaasaleeqqinnissamullu pilersaarusiorneq taakkununngalu malitseqartitsineq
  • Aningaasartuutissanut missingersuusiorneq malitseqartitsinerlu
  • Tusarniaanernut akissusiorneq politikkikkullu saaffiginnissutinut akissuteqarneq, tamatumunngalu atatillugu aningaasanut inatsisissamut siunnersuusiornermi peqataaneq
  • Aqutsinermi sakkussanik nalunaarusiornerni, allakkiornerni, tusarniaanernut akissusiornerni, Peqqinnissaqarfimmi qullersanut Peqqissutsimullu Naalakkersuisoqarfimmut allanullu aalajangiivigisassanik siunnersuusiornerni peqataaneq.
  • Sanaartukkanut nakorsaanermilu atortorissaarutinik pisiniarnermut atatillugu suliniutini sulianilu peqataaneq.

 
Toqqammavissat
Kalaallit Nunaanni Peqqinnissaqarfik nuna tamakkerlugu ataatsimut aaqqisuussaavoq, peqqinnissamut tunngatillugu peqqinnissaqarfiup qitiusumik immikkoortuini innuttaasunik peqqissaaneq, kigutilerineq nakorsaatinillu pilersuineq ilanngullugit, assigiinngiaartorpassuarnik suliaqarfiusoq. Peqqinnissaqarfik 1400-it missaannik sumiiffinni assigiinngitsuni 72-iniittunik sulisoqarpoq.
Dronning Ingridip Napparsimmavissua nuna tamakkerlugu napparsimmavittut atuuppoq immikkullu ilisimasaqarfinnut tunngasuunerusut tassani isumagineqarput. Peqqinnissaqarfik Rigshospitalimut Region Hovedstadimullu ilisimasaqarfinnut immikkorluinnaq ittunut tunngasunik isumagisalinnut isumaqatigiissuteqarpoq.
 
Illuutinut Sanaartornermullu immikkoortumi qullersanut siunnersuisarfik 15-inik sulisoqartoq Nuummi Dronning Ingridip Napparsimmavissuani inissisimavoq.
 
Illuutinut Sanaartornermullu immikkoortumi qullersanut siunnersuisarfimmi aqutsisutut aaqqisuussaanikkut Peqqinnissaqarfimmi qullersat ataanni inissisimassaatit. Pisortaq pingaarnertut siunersioqatigisassavat.
 
Piginnaasat

  • Naapertuuttumik kandidatitut ilinniagaqarneq
  • Sanaartornermut sanaartukkanullu imal. nakorsaanermi atortorissaarutinut tunngatillugu sulinermik misilittagaqarneq
  • Aqutsinermik misilittagaqarneq immaqalu aqutsisutut ilinniarsimaneq iluaqutaassapput
  • Kalaallit Nunaannik ilisimaarinninneq pingaartinneqassaaq

 
Illit kinaavit?

  • Imminnut akerleriinnik piumaffigineqarneq iliuuseqarfigisinnaavat, suliassat nukissallu isumannaatsumik, ilisimaaralugit isumatuumillu pingaarnersiorlugit tulleriiaarsinnaavatit
  • Anguniakkamik siunniussaqarnermik tunngaveqartumik eqqarsartariaaseqarputit, ataatsimut isiginnississaassuseqarputit, iliuuseqarsinnaassuseqarputit akisussaaffinnillu ilisimaarinnillutit
  • Alapernaatsuuvutit tusarnaartuullutillu – oqaloqatigiinnermik, peqataatitsinermik attaveqattigiinnermillu tunngaveqartumik suleriaaseqarputit
  • Sulisunik aqutsineq, tamatumunnga atatillugu sullivimmi avatangiisinik ukkassineq, ataatsimoorneq, sulinermik nuannarisaqarneq, kajumissuseqarneq piginnaasanillu inerisaaneq soqutigisaraatit.
  • Suleqatiginnikkusussuseqarputit, ammasuuvutit, piviusunik tunngaveqarlutit aaqqiissuteqarniartarputit eqaatsumillu pissuseqarlutit

 
Atorfimmi akisussaaffinnut nassuiaat innersuunneqarpoq https://gjob.dk/sog-job/funktionsbeskrivelser/
 
Uagut kikkuuvugut?
Tassaavugut innuttaasunut peqqinnissakkut neqerooruteqartut. Ataqqinninneq, tatiginassuseq, tungiuineq ilinniagaqassuserlu tassaapput Peqqinnissaqarfimmi ataatsimoorluni naleqartitat. Suleqatit pikkorissut soqutiginnillutillu pingaartitsisut, napparsimasut aqqusaartugassaasa pitsaasuunnissaannik ukkassisut iluatitsisartullu naapissavatit. Kalaallit Nunaanni Peqqinnissaqarfik uani annertunerusunik paasisassarsiorfigiuk: (http://www.gjob.gl/Sundhedsvæsenet/Organisationen).
 
Nunatsinni Peqqinnissaqarfik – Atitussuseq, unammilligassaq ilinniagaqassutsimillu tulluusimaarutiginninneq
Kalaallit Nunaanni Peqqinnissaqarfik aaqqisuussaanikkut Peqqissutsimut Naalakkersuisoqarfiup ataani inissisimasoq sinerissami tallimanik qitiusumik immikkoortoqarpoq, Napparsimmavissuaq nakorsaanermi qulaaluanik qitiusumik immikkoortoqarpoq arfinilinnillu qullersanut qitiusumik siunnersuisarfeqarluni.
 
Ilinniagaqassutsikkut unammilligassanik ujartuivit, alapernaatsuuit atituumillu suliaqarnissaq nuannaraajuk, taava nunatsinni Peqqinnissaqarfimmi suliffeqarnissaq ilinnut naleqquttuussaaq.
Kalaallit Nunaanni Peqqinnissaqarfik uani annertunerusunik paasisassarsiorfigisinnaavat: www.gjob.gl            
 
Kalaallit Nunaanni sunngiffimmi timimik atuilluarluni inuuneqarnissamut periarfissagissaarpoq. Aasami asimi angalaarneq, arfersiorneq, piniarneq, aalisarneq angallimmillu angalaarneq sammisassaqqissuupput. Ukiumi arsarnerit takussaasarput sisoqqattoqarluartarporlu qaasuitsullu killeqarfia avannamut qaangerlugu najugaqaraanni qimussertoqarsinnaavoq. Illoqarfinni annerusuni kulturimut tunngasunik sammisassarpassuaqarpoq, timersoqatigiiffiit, eqqumiitsulianik saqqummersitsinerit, nipilersukkanik tusarnaartitsinerit, kaffisorniartarfiit neriniartarfiillu. Nunap immikkoortua suliffissarsiorfiusoq pillugu uani: www.peqqik.gl annertunerusunik paasisassarsiorsinnaavutit.
 
Attavissaq
Atorfik pillugu paasissutissat Peqqinnissaqarfimmi pisortaagallartoq peqqissaasullu qullersaat Ella Skifte oqarasuaatikkut: (+299) 344395 imal. mailikkut: ELLA@peqqik.gl imal. allaffissornikkut ingerlatsinermi pisortaq Tina Amondsen oqarasuaatikkut: (+299) 344491 imal. mailikkut: TIAM@peqqik.gl attavigalugu pissarsiarineqarsinnaapput.
 
Kalaallit Nunaanni Peqqinnissaqarfiup aaqqusuussaaneranut takussutissiaq uani pissarsiassaavoq:
https://gjob.dk/organisationen/
 
Kalaallit Nunaanni Peqqinnissaqarfik suliffittut pujortarfiunngilaq.
 
Akissarsiat atorfeqartitaanermilu atugassarititaasut:
Atorfik akissaateqarfimmi LR 38-mi maanna inissisimavoq.

1. april 2021 LR 38-mi akissarsiat imak isumaqagitiissutigineqarnikuupput qaamammut  Kr. 56.370 ukiumullu Kr. 676.441 tunngaviusumik aningaassarsiarititaasoq tapillu aalajangersimasut ilanngulugit.

Aallaavittut atorfinitsitsinermi isumaqatigiissut aallaaviussoq, qinnuteqartorlu tjenestemand-tut atorfeqareersimaguni nunatsinni Oqartussat kommuninilu tjenestemandit pillugu Inatsisartut inatsisissaat malillugu atorfinitsitineq tjenestemanditut atugassarititaasut naapertorlugit atorfinitsitaasoqarsinnaavoq.

Naalagaafiup ataanni atorfeqartut isumaqatigiissutaasimasut naapertorlugit aningaasarsiaqarnatit sulinngiffeqarnissamut periarfissinneqarnikuupput, Tjenestemand-itut isumaqatigiissulluniit naapertorlugu atorfeqaruni soorlulusooq kattuffik AC isumaqatigiissutigisimasaaniitut soorlu DJØF Finansministeriap akornani isumaqatigiissut.  Qallunaat nunaanni nunap iluani pissutsinut Naalakkersuisoqarfiusoq innersuussutigivaa Kalaallit Nunaanni Namminersorlutik Oqartussat ataanni atorfininnikkumallutit qinnuteqartut sapinngisamik akimisaarfigineqassanngitut akissarsiaqarnatik sulinngiffeqarniarlutit qinnueqarpata, sulinngiffeqarnissamut isumaqatigiissutit qinnuteqartup inooqataanuttaaq assingusumik atuutsitaapput.

Aallaaviusumik sapaatip akunnerani suliffiuvoq akunneri 40-t, atorfimmullu atuuppoq qaanngiuttornermusiaqarsinnaanginneq aammattaaq ulloq sulinngiffiusussaasoq annaagaani ajunngitorsiassaqarfiunngilaq.

Akissarsiatigut aamma atorfeqartitaanermi atugassarititaasut, taakkununga ilanngullugit atorfinikkiartorluni soraarlunilu angalasinnaatitaanermut aamma pequtit nuunneqarsinnaanerat akiliunne-qartarneq, Namminersorlutik Oqartussat aamma pineqartup kattuffiata isumaqatiginninniarsinnaa-titaasup akornanni atorfinitsitaanermi piffissami atuuttumi isumaqatigiissutaasa/sulisunut isumaqatigiissutaat naapertorlugit ingerlanneqartarput.


Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik.  Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk