Skip to main content
128

Dette jobopslag er udløbet

Oqarasuaat atorlugu Tusaanngami siunnersorti

Tusarnaallaqqippit aamma nunami tamarmi innuttaasut atugarliortut pillugit allanngueqataarusuppit?

Tusaannga oqarasuaat aamma sms atorlugit siunnersuisarnerni suleqatissamik tunniusimasumik pissarsiorpoq. Illit siunnersortitut pingaarnertut suliassatit tassapput innuttaasunik artorsartunik tapersersuillutit oqaloqatiginissaanik neqeroorutiginninneq, tusarnaarneq aamma siunnersuineq.
Tusaannga tassaavoq Kalaallit Nunaanni tamarmi meeqqanik, inuusuttunik inersimasunillu oqarasuaat 801180 aamma sms 1899 atorlugit siunnersortinnissamik neqeroorut. Tusaannga innuttaasunut, nalinginnaasumik inunnit qanimut avatangisiminnit imaluunniit najukkaminni inuiaqatigiinnit ikiorserneqarsinnaanngitsutut misigisimasunik, ajornartorsiutitik pillugit arlaannik oqaloqateqarnissaminnik pisariaqartitsisunut neqeroorutaavoq.
Ajornartorsiutit isumagineqartussat assigiinngitsorpassuusinnaapput. Taamaattumik illit siunnersortitut misiginneqataasinnaanerit, pisumut naleqqussallaqqittuunerit aamma pisuni uisakajaarfiusuni eqqarsarluarsinnaanissat pingaaruteqarput. Oqaloqatiginninnermik siunnersuinermillu siusinnerusukkut misilittagaqarneq kiisalu oqaloqatiginneriaatsinik ilisimasaqarneq imaluunniit misilittagaqarneq pitsaaqutaassapput, taamaattorli pisariaqanngillat, tassami sanileralugu ilitsersuussineq uagut atortarparput aamma piginnaasanik inerisaanermut pikkorissartitsisuartarpugut aamma oqaloqatigiinneq atorlugu ingerlaavartumik imaajaasarluta.
 
Tusaannga Isumaginninnermut Aqutsisoqarfiup ataaniippoq aamma Innuttaasunut immikkoortortaqarfimmut ilaalluni.
 
Oqarasuaat atorlugu siunnersortitut pingaarnertut makkua suliarisassavatit:

  • Oqarasuaat aamma sms atorlugit tapersersuilluni oqaloqatiginnittarluni sullissineq
  • Meeqqat/ inuusuttuaqqat inersimasullu ajornartorsiutillit tapersersorlugit oqaloqatigineri tusarnaarnerilu, soorlu assersuutigalugu qinngasaartinnermik, persuttartinnermi/persuttaanermik, perorsaanermik, inooqatigiinnerlunnermik, imminut toqunissamik eqqarsaateqarnermik, kinguaassiuutitigut kanngutsaattuliornernit, atornerluinernit il.il. pillugit sullississassaatit.
  • Innuttaasut ajornartorsiutiminnik qaangiiniarlutik iliuuseqarnissaannut siunnersorlugillu kajumissaartassavatit
  • Katsorsaavittut neqeroorutinut allanut innersuuttassavatit

 
Illit makkunannga piginnaasaqartutit ujarpatsigit:

  • Inuuniarnikkut qanorluunniit ittunik ajornartorsiuteqartunik sullisserusussusilik.
  • Innuttaasut sanngiitsut inuunerinik allannguerusuttutit.
  • Naliliisinnaassuseqarluartoq aamma pisuni ulapaarfiusuni iliuuseqarsinnaassusilik.
  • Aalajaatsoq aamma siunissami ungasinnerusumi taamatut imminut isigissaatit.
  • Aaqqissuulluagaasoq, akisussaassuseqarluartoq, inerisimasoq mattusoorlu.
  • Oqaatsitigut allattariarsornikkullu attaveqallaqqissasutit
  • Teknikimik piginnaaneqarluartoq.
  • Peqqissaanermik, perorsaanermik imaluunniit isumaginninnermik ilinniagaqartutit. Misilittakkat attuumassuteqartut ilinniagaqarnissamik piumasaqaatit taarsersinnaavaat.
  • Danskisut/kalaallisut marluinnik oqaaseqartuuneq. Tamatumunnga ilanngullugu Tunumiutut oqalussinnaaguit iluaqutaassaaq.
  • Pinerluuteqarsimannginnermut uppernarsaammik/ meeqqanik innarliisimannginnermut uppernarsaammik uppernarsaateqarneq
  • Nuummi najugaqarneq.

 
Suliffik imattoq ilinnut neqeroorutigisinnaavarput:

  • Isumalik tunniussisartorlu, tassani innuttaasut sanngiitsut inuunerannik allanngueqataanissarnut periarfissaqassaatit.
  • Tassani akisussaafferujussuarmik tigusissaatit.
  • Piffissat nikerartut suliffigissassavatit
  • Suleqatigiit suliaminnik soqutiginnittut ataqatigiilluartullu suleqatigilissavatit
  • Inuttut suliatigullu ineriartornissamut periarfissat pitsaasut.

 
Atorfik piffissaq tamakkerlugu atorfiuvoq (sapaatip-akunneranut nalunaaquttap akunneri 40-t suliffiuvoq) aamma eqimattat pingasut paarlakaallutik sulisartut suleqatigilissavatit. Atorfiup 1/10- 2022-mi  imaluunniit piaarnerpaamik inuttalerneqarnissaa kissaatigineqarpoq.
 
Atorfik soqutigigukku inuiaqatigiinnilu sunniuteqaqataarusukkuit qinnuteqaammik CV-millu nassiussigit.
 
Tusaannga aamma atorfiit pillugit itinerusumik paasissutissat immikkut ittumik siunnersortimut Mette Lange-Nielsenimut ukua atorlugit +299 346023 imaluunniit maili: mlan@nanoq.gl imaluunniit siunnersortimut  Ellen Johanssonimut ukua atorlugit +299 346010 imaluunniit maili eljo@nanoq.gl pissarsiarineqarsinnaapput.
 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk