Skip to main content
144

Dette jobopslag er udløbet

Oliamut gas-imullu tunngasunut suliassaqarfimmut soqutiginnittunik Inuussutissarsiornermut Nukissiuuteqarnermullu Naalakkersuisoqarifk AC-fuldmægtiginik arlalinnik/ imaluunnit immikkut siunnersortinik sulisussarsiorpoq

Kalaallit Nunaanni kulbrintinik isumalluutit (uuliap aamma gassip) ineriartortinnissaanik suliaqarusukkuit, ilanngullugulu uuliasiornermik ingerlatseqatigiiffinnut attaveqartarnernik, aammalu misissueqqissaarinermik piginnaasaqarluarlutillu sulianik isumaginnittarnermik aamma/imaluunniit naalakkersuisumik kiffartuussisarnermik ukiuni amerlasuuni misilittagaqaruit immaqa tassaavutit suleqatitaasarput nutaaq.

Inuussutissarsiornermut Nukissiuuteqarnermullu Naalakkersuisoqarfik Kalaallit Nunaanni kulbrintinik suliassaqarfiusumut akisussaasuuvoq. Kulbrintinik suliassaqarfimmut tunngatillugu suliassat Uuliamut aamma Gassimut Immikkoortoqarfimmiipput, tassanilu ussassaarinermik sulianik, kulbrintinik suliassaqarfiup iluani nunami sananeqaataani piukkunnaataasunik nalunaarsuinermik, kiisalu akuersissutinut tunngasunik immikkut suliaqartoqarpoq.

Atorfik
Akuersissutinik tunniussaqartarnernut, kingornatigullu Kalaallit Nunaanni uuliamik gassimillu ujaasilluni suliarisat akuersissutiginerinut pisortaqarfimmi suliassanik isumaginninnermut suliassatit pingaarnerit attuumassuteqassapput.

Ulloq suliffiusoq assigiinngiiaartoq naatsorsuutigisinnaavat, tassani inissisimaffinni assigiinngitsorpassuarni kulbrintinik suliassaqarfimmi suliaqassallutit. Pisortaqarfimmi isumaginninneq eqqaassanngikkaanni aamma ussassaarinermik suliarisat missingersuutinillu malitseqartitsinissaq suliaqarfigisussaassavatit, aammalu Kalaallit Nunaanni kulbrintinik suliassaqarfiup ineriartortinneranut naqissusiinissannut periarfissaqassallutit.

Suliassat immikkoortoqarfimmi suleqatinnik, aamma nunatsinni pisortaqarfinnik sullissisarfinnillu suleqateqarlutit isumagissavatit, inatsisilerinerullu, aqutsisoqarnerup, aningaasaqarnerup, geologiip, teknikkip, pinngortitap avatangiisillu iluini nalinginnartut sammisaqarfiit killingi akimorlugit suleqatigiinnissamik suliniutinillu aqutarinissaannik tamanna pisariaqartitsivoq.

Sammisatigut piginnaasat:

  • Naleqquttumik nangitsilluni  ilinniakkamik sivisuumik ilinniagaqarsimavutit, soorlu cand. jur., cand. Scient. pol., cand. polit. imaluunniit cand. mag.itut
  • Ukiuni arlalinni sulianik isumaginninnermik / aqutsinermik misilittagaqarputit
  • Inatsisilerinermik paasisisimasaarluartuuvutit, naalakkersuinikkullu aqunneqartumi allaffissornikkut suliaqarluarsinnaallutit
  • Naleqquttunik misilittagaqarputit, ajornanngippat naalakkersuinikkut / allaffissornermik ingerlatsivimmit
  • Ajornanngippat Naalakkersuisup kiffartuunnissaanik misilittagaqarputit
  • Aatsitassanit atortussiassat imaluunniit kulbrintinik suliassaqarfiit iluanni akuersissuteqartarfimmik, aamma suliassaqarfimmi Kalaallit Nunaanni inatsisaasunut tunngasunik misilittagaqarnissat assut iluaqutaassaaq
  • Qallunaatut tuluttullu, aamma assut iluaqutaasussamik kalaallisut oqaatsinik piginnaasaqarluarputit.


Inuttut kinaanerit piginnaasatillu:

  • Kulbrintinik suliassaqarfik soqutigisaraat
  • Suliassaqarfiit nutaat ajornartorsiutillu nutaat piaartumik ilisimasaqarfigilersinnaavatit
  • Ataatsimut isiginnilluartuullutillu misissueqqissaarinermi piginnaaneqarluarputit
  • Isumagissaarputit, aamma
  • Qajannaatsuuvutit tunniussaqarsinnaallutillu – aamma ulapaarfiungaluarpat
  • Nammineq suliassannut piffissamilu killiliussanut akisussaaffimmik tigummiarsinnaavutit
  • Sammisatigut killiffiit akimorlugit suliaqarsinnaavutit.


Kalaallit Nunaanni kulturimut inuiaqatigiinnilu pissutsinut ilisimasaqassaruit aamma assut iluaqutaassaaq. Kalaallit Nunaata avataanit qinnuteqartunut sungiusimasanut naleqqiullugit kultureqassutsikkut pissutsit allat atugaralugit sulinissamut inuunissamullu piginnaasaqarneq, piumassuseq kajumissuseqarnerlu pingaartinneqarumaarput.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.


Qinnuteqartunik ataasiakkaaraluni nalilersuineq malillugu immikkut siunnersortitut atorfinitsitsineq pissaaq.

Sulinerup nalaa tassaavoq sap. akunneranut nal. akunneri 40-it. Pifissap ilaani ilassutinik suliaqartarnissat aamma Kalaallit Nunaata iluani avataanilu angalasarnissat naatsorsuutigisariaqassavatit.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.

Annertunerusunik paasissutissat
Atorfik pillugu annertunermik paasisaqarusukkuit immikkoortoqarfiup pisortaa Jacob Bech Andersenimut saaffiginninnissannut tikilluaqqusaavutit, makkunatigut (+299) 345670, jaba@nanoq.gl.

Kalaallit Nunaat aamma Namminersorlutik Oqartussat pillugit annertunermik paasissutissarserusukkuit Suliffiit ataanni www.naalakkersuisut.gl-imi annertunermik atuagaqarsinnaavutit. Kalaallit Nunaanni kulbrintinik suliassaqarfik pillugu paasissutissat uani nassaarisinnaavatit: www.govmin.gl

Qinnuteqaat
Qinnuteqarnermut killissaliussaq tassaavoq 7. december 2018

Sap. Akunnerini 10-11- imi atorfinitsitsinissamut oqaloqatiginninnerit ingerlanneqarnissaat  naatsorsuutigineqarpoq.

Atorfimumut toqqaannartumik qinnuteqarit:

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk