Skip to main content
152

Dette jobopslag er udløbet

Nuummi sullissivimmi suliatigut aqutsisussarsiorpoq

Nuummi sullissivimmi suliatigut aqutsisussarsiorpoq
 
Suliatigut aqutsisutut atorfik 1. apriili 2019 aallartiffigalugu isumaqatigiissuteqarnikkulluunniit inuttassarsiorneqarpoq. Atorfik Akileraartarnermut Aqutsisoqarfiup ataatsimoorussanik immikkoortortaani Nuummiittumi inissisimavoq.
 
Innuttaasunik sullissivimmi maannakkut Illoqarfinnut tallimanut agguaassimasunik 19-inik sulisoqarpoq. Akileraartarnermut Aqutsisoqarfimmi maani suliassaqarfiit assigiinngitsut saaffiginnittarfianni sulivugut.
 
Sullissiviup ingerlatsinikkut akisussaaffiini misilittagaqarluartumik atorfik inuttalerusunneqarpoq.
 
Suliassat:  
Suliatigut aqutsisup pingaarnertut suliassai tassaapput ilitsersuisarnertigut kiisalu ingerlatsinikkut innuttaasunik sullissivimmi suliassanik tamanik ataqatigiissaarnerit. Ilulissani, Sisimiuni, Maniitsumi, Nuummi kiisalu Qaqortumi innuttaasunut sullissivinni sisamaasuni tamani ulluinnarni suliarisartakkatigut ingerlatsinertigullu akisussaasuuneq. Tamakku saniatigut suliassat naammassisarnissaannut aqutsisoq peqataasassaaq, matumani akileraartarnermut tunngasut, akitsuutinut tunngasut, akiliisitsiniartarnernut tunngasut kiisalu akitsuuserinermut tunngasut. Taamaammat naatsorsuutigineqarpoq sulianik sullissinermi nammineersinnaassuseqarluarnissaq aammalu ajornanngippat sullissiviup akisussaaffiini inatsisinik attuumassuteqartunik ilisimasaqarnissaq. Taakku saniasigut immikkoortortaqarfiup suliassaasa sinneri pillugit ingerlaavartumik aqutsisoq malinnaasassaaq. Aammattaaq allaffiup pisortaanik immikkoortortaqarfiullu pisortaanik ullut tamaasa isumasioqateqartarnissaq naatsorsuutigineqarpoq.
 
Piginnaasat:                       
Illit sullissivimmi suliatigut aqutsisutut ingerlatsinikkut misilittagaqarluartuussaatit, suleqatikkuminartoq kiisalu innuttaasut kiffartuunnissaat nuannarissagit suliassanillu nutaanik suliaqalerninni qunusuitsuusutit naatsorsuutigaarput. Taakku saniatigut ulluinnarni ingerlatsinermik ataqatigiissaarisarnermik paasisimasaqartutit naatsorsuutigaarput.  
 
Ataatsimoorussanik Immikkoortortami suliatigut aqutsisoq suliassanut tunngasutigut nalunaartassaaq. 

Atorfik pillugu paasissutissat sukumiinerusut allaffimmi pisortap Linda Brandtip mailikkut libr@nanoq.gl saaffigineratigut pissarsiariniarneqarsinnaapput.
 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk