Skip to main content
73

Dette jobopslag er udløbet

Nuummi Qitiusumik Siunnersuisarfik Immikkut Suleqatigiissitamut isumaginninnermut siunnersortinik marlunnik pissarsiorpoq

Pitsaaliuinermut Isumaginninnermullu Aqutsisoqarfik Qitiusumik Siunnersuisarfimmi Immikkut Suleqatigiissitamut isumaginninnermut siunnersortinik marlunnik pissarsiorpoq.
 
Qitiusumik Siunnersuisarfik immikkoortortaqarfiuvoq Pitsaaliuinermut Isumaginninnermullu Aqutsisoqarfiup ataani inissisimasoq. Immikkoortortaq kommunit ingerlatsiviini inatsisitigut isumaginninnermillu suliaqarnermut tapersiissutaasussaq pilersinneqarsimavoq, oqartussaasunullu meeqqanik inuusuttunillu atugarliortunik sullissisunut tunngatinneqarluni.
 
Pilertortumik ikiorneqarnissamik pisariaqartitsisunut Immikkut Suleqatigiissitat kommunit pilertortumik ikiorneqarnissaminnik pisariaqartitsisut ikiortassavaat – ass. kinguaassiutitigut atornerluisoqarsimatillugu suliani annertuuni. Immikkut Suleqatigiissitat nammineq najukkaniit ikiorserneqarnissamik ujarlertoqartillugu aamma immikkut ittunik pisoqartillugu immikkut ilisimasanik aammalu - siunnersuinernik tunniussisinnaassapput. Kinguaassiuutitigut atornerluisoqarsimatillugu suliani, nalunaarutiginnittoqarnerani, politiinit killisiuisoqarnerani, meeqqanik angajoqqaanillu oqaloqateqarnermi kiisalu malitseqartitsinermi suliap ingerlaarnerani tamarmiusumi kommunini sulisut immikkoortortap ilaatigut suliassarai.  
 
Isumaginninnermut siunnersortit makkununnga peqataasassapput:

  • Meeqqanik inuusuttunillu sumiginnagaasimasunut aamma/imaluunniit kinguaassiutitigut atornerlunneqarsimasunut sullissisunut attuumassutilinnut kommuninullu tunngatillugu suliani aalajangersimasuni ilitsersuisarneq siunnersuisarnerlu.
  • Sanileralugu ilinniartitsineq/ sulianut tunngatillugu ikiorsiisarneq
  • Suliffiup iluani avataanilu sulianut arlalinnut tunngasutigut suleqatigiinnernik isumaqatigiissuteqartarneq.
  • Ataqatigiissaarisarneq.
  • Immikkoortortaqarfik suleqatigalugu isumaginninnermi sulianut tunngasutigut ilisimasanik, periutsinik suliniutinillu ingerlaavartumik nutarterineq.
  • Ilisimasanik katersisarneq ingerlatitseqqittarnerlu

 
Naatsorsuutigaarput illit:

  • isumaginninnermi siunnersortitut ilinniagaqartutit
  • pisortaqarfinni suliaqartarnermik misilittagaqartutit
  • immikkoortut akunneranni suleqatigiittarnernik ilisimasaqarluartutit
  • ataqatigiissaareqqissuullutillu suleqatikkuminartutit
  • akuersaartumik nukissallu qitiutillugit isummersuisinnaasutit
  • tulleriiaarillutit sulisinnaasutit
  • atassuteqartarnernik pilersitsinissamut pitsaasunik piginnaasaqartutit
  • nammineersinnaassuseqartutit, aaqqissuisinnaassuseqartutit aamma tamakkiisumik paasinnittumik aaqqiissuteqarsinnaassuseqartutit
  • marluinnik kalaallisut danskisullu oqaaseqartuusutit.

 
Suliffik pissanganartoq assigiinngitsunik suleqaterpassuaqarfiusoq aamma suliaqarfimmi meeqqanik inuusuttunillu sumiginnagaasimasunik sullissisarnermik pitsanngorsaallutik suliaqartunik suleqateqartarfiusoq neqeroorutigisinnaavarput.
 
Angalasarsinnaanissaq pillugu
Atorfimmut atatillugu annertuumik angalasarnissaq naatsorsuutigisariaqarpoq aammalu piffissaq sivikitsoq atorlugu aallariataarsinnaasoqassaaq.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Sapaatip akunneranut 40 tiimit suliffiussapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq.

Paasissutissat sukumiisut
Atorfik pillugu annertunerusunik paasisaqarusukkuit siunnersuisarfiup pisortaa Arnajaraq Poulsen attaveqarfigisinnaavat oqarasuaatikkut +299 34 60 14 imaluunniit e-mailikkut apou@nanoq.gl.
 
Qinnuteqarfissaq ulloq kingulleq: 6. december 2019
 
Namminersorlutik Oqartussat pillugit annertunerusumik paasisaqarusukkuit www.nanoq.gl aqqutigalugu paasisaqarnerusinnaavutit.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk