Skip to main content
91

Dette jobopslag er udløbet

Nunatsinni Peqqinnissaqarfimmi Nuummi qullersanut siunnersuisoqarfimmi aningaasaqarnermut sulisoqarnermullu pisortamik pissarsiorpugut

Peqqinnissaqarfitsinni nunarput tamakkerlugu innuttaasunut napparsimasunullu tamanut sunniuteqarluartunik qaffasissumik pitsaassusilinnik peqqinnissakkut neqerooruteqarnissaq suliniutigarput. Taamaammat illit piginnaasatit atorfissaqartippagut.
 
Qullersanut siunnersuisarfik aningaasaqarnerup sulisoqarnerullu iluani atituunik allanngorartunillu suliaqarfiusoq aqussinnaagukku, inerisarsinnaagukku pitsaassusaalu qulakkeersinnaagukku, ataatsimut isiginnissinnaaneq piginnaaneqarfigilluarukku kinguneqartussamillu periuseqaruit – taava atorfittaartissinnaavatsigit.

Suliffik
Kalaallit Nunaanni Peqqinnissaqarfimmi qullersanut siunnersuisarfimmi Aningaasaqarnermut Sulisoqarnermullu immikkoortortami pisortatut, immikkoortortami aqutsisunik sulisunillu suleqatigisartakkanillu allarpassuarnik, kinguneqarluartussamik sunniivigeqatigiinnikkut ulluinnarni ingerlatsineq inerisaajuarnissarlu akisussaaffigissavatit.
Suleqatigiinneq, ataqatigiissaarineq, nukissanik nuussineq, ingerlatsinermik pitsanngorsaaneq aningaasartuutissatullu missingersuutinik malitseqartitsineq kiisalu ataatsimut isigisinnaalluni inerisaaneq, tamatumunngalu atatillugu suliassat pingaaruteqartut soorlu aningaasaqarnermik aqutsineq, aningaasartuutissatut missingersuusiornissamut pilersaarusiorneq malitseqartitsinerlu tamatumunngalu atatillugu sulisussarsiniarneq, aalaakkaasunik sulisoqarneq, atorfinititsisarneq assigisaallu pillugit periarfissanik nutaanik pitsanngorsaataasinnaasunillu inerisaaneq atuutilersitsinerlu qitiutinneqarput.
 
Qullersanut siunnersuisoqarfimmi Aningaasaqarnermut Sulisoqarnermullu immikkoortortami, Peqqinnissaqarfimmi immikkoortumi pingaaruteqarluinnartumi, aningaasaqarnermik aqutsineq pisiniarnerlu, sulisussarsiniarneq aalaakkaasunillu sulisoqarnissaq pillugit suliamik tamakkiisumik naammassinninnissamut aalajangiisuulluinnartuusumut, pisortamik pimoorussisumik ataatsimut isiginnissinnaassusilimmik angusaqarusussusilimmillu pissarsiorpugut. Suliassat tamarmik ataqatigiinneq, ikiuukkumatussuseq allanullu qanoq isumaqarnerat paasilluarsinnaallugit suliarineqassapput.
 
Suliassat assigiinngitsorpassuit ilaatigut makkuupput:
  • Peqqinnissaqarfimmi qullersanik aqutsisoqatigiinnillu allanik siunnersuineq
  • Aningaasaqarnermut immikkoortortaq tamatumunngalu atatillugu aningaasartuutissanut missingersuusiorneq, naatsorsuuserineq malitseqartitsinerlu
  • Tusarniaanerni akissutissanik suliaqarneq politikeriniillu saaffiginnissutinut akissuteqarneq tamatumunngalu atatillugu Aningaasanut Inatsisissatut siunnersuusiornermi peqataaneq
  • Peqqinnissaqarfimmi qullersanut Peqqissutsimullu Naalakkersuisoqarfimmut allanullu aqutsinermi sakkussanik nalunaarusiornermi, allakkiornerni, tusarniaassutinut akissusiornerni aalajangiivigisassatullu saqqummiussani peqataaneq
  • Suliniutini suliassanilu aningaasaqarnermut, pisiniarnermut sulisoqarnermullu attuumassutilinni peqataaneq
  • Pisiniartarneq tamatumunngalu atatillugu pitsanngorsaaneq, assigiissaarineq tuniniakkallu
  • Sulisussarsiniartarneq tamatumunngalu atatillugu sulisussarsiniarnermi iliuuserisanik ikorfartuineq
  • Inissanut tunngatillugu allaffissornikkut ingerlatsineq tamatumunngalu atatillugu suleriaatsinik pitsanngorsaaneq maleruagassanillu malinninneq
  • Suleriaatsinik nalinginnaasumik pitsaanngorsaaneq, naatsorsueqqissaaneq sulianillu nalunaarsuineq.
 
Toqqammavissat
Kalaallit Nunaanni Peqqinnissaqarfik nuna tamakkerlugu ataatsimut aaqqisuussaavoq, peqqinnissamut tunngatillugu peqqinnissaqarfiup qitiusumik immikkoortuini innuttaasunik peqqissaaneq, kigutilerineq nakorsaatinillu pilersuineq ilanngullugit, assigiinngiaartorpassuarnik suliaqarfiusoq. Peqqinnissaqarfik 1400-it missaannik sumiiffinni assigiinngitsuni 72-iniittunik sulisoqarpoq. Aaqqisuussaanikkut takussutissiaq uani takuuk:  https://gjob.dk/media/czbjfrgx/organisationsplan_shv_2020-10.pdf
Dronning Ingridip Napparsimmavissua nuna tamakkerlugu napparsimmavittut atuuppoq immikkullu ilisimasaqarfinnut tunngasuunerusut tassani isumagineqarput. Peqqinnissaqarfik Rigshospitalimut Region Hovedstadimullu ilisimasaqarfinnut immikkorluinnaq ittunut tunngasunik isumagisalinnut isumaqatigiissuteqarpoq.
 
Aningaasaqarnermut Sulisoqarnermullu immikkoortortaq 30-it missaannik sulisoqartoq sumiiffinni pingasuniittoq – Nuummiittut marluk Københavnimiittorlu ataaseq, ataatsimut qullersanut siunnersuisarfittut qanittukkut kattunneqarput. Aningaasaqarnermut Sulisoqarnermullu immikkoortortaq aaqqisuussaanikkut suli inissivinngimmat illit annertuumik sunniuteqarfigisinnaavat.
Peqqinnissaqarfiup ukiumut aningaasartuutigisartagai 1,5 mia. koruunit missaanniipput – tamatumanilu illit qitiusumik inissisimassaatit.
Sulisoqarnermut tunngatillugu suliassanut ilaapput sulisussarsiniarnermi suleqatigiit Københavnimi Kalaallit Nunaata Sinniisoqarfianiittut. Sulisussarsiniarneq atorfinititsinissat, sulilerlaanik pitsaasumik tikilluaqqusineq Peqqinnissaqarfiullu inuit attaveqatigiittarfiisigut, ataatsimoorluni saqqummiinertigut, aaqqisuussinertigut assigiinngitsunillu saqqummiussinertigut, suliffittut pissanganartutut ersersinnissaa suleqatigiit suliassaraat.
 
Qullersanut siunnersuisoqarfimmi Aningaasaqarnermut Sulisoqarnermullu immikkoortumi pisortatut aaqqisuussaanikkut Kalaallit Nunaanni Peqqinnissaqarfimmi qullersat ataanni inissisimassaatit. Pisortaq tassaassaaq pingaarnertut siunersioqatigisagassat.
 
Piginnaasat
  • Naapertuuttumik kandidatitut ilinniagaqarneq
  • Aningaasaqarnermut aamma/imal. sulisoqarnermut tunngatillugu sulinermit misilittagaqarneq
  • Aqutsinermik misilittagaqarneq immaqalu aqutsisutut ilinniarsimaneq iluaqutaassapput
  • Kalaallit Nunaannik ilisimaarinninneq pingaartinneqassaaq
 
Illit kinaavit?
  • Aqutserusussuseqarputit
  • Peqqinnissaqarfimmi allaanerusumi, kulturinik akimuisumi, pissanganartunik assigiinngitsorpassuarnik unammilligassanik suliaqarfiusumi sulisinnaavutit
  • Suleqatiginnikkusussuseqarputit, ammasuuvutit, piviusunik tunngaveqarlutit aaqqiissuteqarniartarputit eqaatsumillu pissuseqarlutit
  • Imminnut akerleriinnik piumaffigineqarneq iliuuseqarfigisinnaavat, suliassat nukissallu isumannaatsumik, ilisimaaralugit isumatuumillu pingaarnersiorlugit tulleriiaarsinnaavatit
  • Ingerlatsinermik ukkassisinnaassuseqarputit, pitsaassutsimik ilisimaarinnipputit aaqqiissutissanillu salliussillutit
  • Anguniagassanik takorluuisinnaassuseqarputit, akuuffiusoq, oqaluttuassartaa misilittakkallu ataqqillugit inerisaanissamik salliussisuullutit
  • Anguniakkamik siunniussaqarnermik tunngaveqartumik eqqarsartariaaseqarputit, ataatsimut isiginnississaassuseqarputit, iliuuseqarsinnaassuseqarputit akisussaaffinnillu ilisimaarinnillutit
  • Ingerlariaqqinnissamut piumassutsimik pilersitserusupputit inerisaarusupputit taamaaliorsinnaallutillu
  • Misissueqqissaarneq nukittuffigaat
  • Alapernaatsuuvutit tusarnaartuullutillu – oqaloqatigiinnermik, peqataatitsinermik attaveqattigiinnermillu tunngaveqartumik suleriaaseqarputit
  • Politikkip ilinniagaqassutsillu sinnersaraaffianniissinnaavutit
  • Sulisunik aqutsineq, tamatumunnga atatillugu sullivimmi avatangiisinik ukkassineq, ataatsimoorneq, sulinermik nuannarisaqarneq, kajumissuseqarneq piginnaasanillu inerisaaneq soqutigisaraatit.
  • Ajornartorsiutinik paasilertoruminaatsunik pisariitsumik ersarissumillu nunap pissusaagut, ilinniagaqassutsikkut politikkikkullu killiliussat akimorlugit – allakkatigut oqaatsitigullu ingerlatitseqqiisinnaavutit.
 
Innersuussut: https://gjob.dk/sog-job/funktionsbeskrivelser/okonomi-hr/
 
Uagut kikkuuvugut?
Tassaavugut innuttaasunut peqqinnissakkut neqerooruteqartut. Ataqqinninneq, tatiginassuseq, tungiuineq ilinniagaqassuserlu tassaapput Peqqinnissaqarfimmi ataatsimoorluni naleqartitat. Suleqatit pikkorissut soqutiginnillutillu pingaartitsisut, napparsimasut aqqusaartugassaasa pitsaasuunnissaannik ukkassisut iluatitsisartullu naapissavatit. Kalaallit Nunaanni Peqqinnissaqarfik uani annertunerusunik paasisassarsiorfigiuk: (http://www.gjob.gl/Sundhedsvæsenet/Organisationen).
 
Nunatsinni Peqqinnissaqarfik – Atitussuseq, unammilligassaq ilinniagaqassutsimillu tulluusimaarutiginninneq
Kalaallit Nunaanni Peqqinnissaqarfik aaqqisuussaanikkut Peqqissutsimut Naalakkersuisoqarfiup ataani inissisimasoq sinerissami tallimanik qitiusumik immikkoortoqarpoq, Napparsimmavissuaq nakorsaanermi qulaaluanik qitiusumik immikkoortoqarpoq arfinilinnillu qullersanut qitiusumik siunnersuisarfeqarluni.
 
Ilinniagaqassutsikkut unammilligassanik ujartuivit, alapernaatsuuit atituumillu suliaqarnissaq nuannaraajuk, taava nunatsinni Peqqinnissaqarfimmi suliffeqarnissaq ilinnut naleqquttuussaaq.
Kalaallit Nunaanni Peqqinnissaqarfik uani annertunerusunik paasisassarsiorfigisinnaavat: www.gjob.gl            
 
Kalaallit Nunaanni sunngiffimmi timimik atuilluarluni inuuneqarnissamut periarfissagissaarpoq. Aasami asimi angalaarneq, arfersiorneq, piniarneq, aalisarneq angallimmillu angalaarneq sammisassaqqissuupput. Ukiumi arsarnerit takussaasarput sisoqqattoqarluartarporlu qaasuitsullu killeqarfia avannamut qaangerlugu najugaqaraanni qimussertoqarsinnaavoq. Illoqarfinni annerusuni kulturimut tunngasunik sammisassarpassuaqarpoq, timersoqatigiiffiit, eqqumiitsulianik saqqummersitsinerit, nipilersukkanik tusarnaartitsinerit, kaffisorniartarfiit neriniartarfiillu. Nunap immikkoortua suliffissarsiorfiusoq pillugu uani: www.peqqik.gl annertunerusunik paasisassarsiorsinnaavutit. 
 
Innuttaassuseq
Nunat Avannarliit arlaanni innuttaassuseqanngikkuit najugaqarsinnaatitaanerup sulisinnaatitaanerullu atorfininnissami piumasaqaataanerat maluginiaqquneqarpoq. Najugaqarsinnaatitaaneq sulisinnaatitaanerlu atorfininnissaq isumaqatigiissutaareerpat aatsaat qinnuteqaatigineqarsinnaapput.
 
Sulilerfissaq: 1. januar 2022 immikkulluunniit isumaqatigiissuteqarnikkut.
 
Qinnuteqarfissaq kingulleq: 1. november 2021. Qinnuteqartunik oqaloqateqarnerit, sap. ak. 44-mi imal. 45 2021 ingerlanneqarnissaat naatsorsuutigineqarpoq.
 
Attavissaq
Atorfik pillugu paasissutissat Peqqinnissaqarfimmi pisortaagallartoq peqqissaasullu qullersaat Ella Skifte oqarasuaatikkut: (+299) 344395 imal. mailikkut: ELLA@peqqik.gl imal. allaffissornikkut ingerlatsinermi pisortaq Tina Amondsen oqarasuaatikkut: (+299) 344491 imal. mailikkut: TIAM@peqqik.gl attavigalugu pissarsiarineqarsinnaapput.
 
Akissarsiat atorfininnermilu atugassarititaasut pillugit paasissutissat nalinginnaasut sulisoqarnermut ineqarnermullu immikkoortortamut PERSONALE@PEQQIK.GL saaffiginninnikkut pissarsiarineqarsinnaapputtaaq.
 
Kalaallit Nunaanni Peqqinnissaqarfiup aaqqusuussaaneranut takussutissiaq uani pissarsiassaavoq:
https://gjob.dk/organisationen/
 
Kalaallit Nunaanni Peqqinnissaqarfik suliffittut pujortarfiunngilaq.
Akissarsiat atorfeqartitaanermilu atugassarititaasut:
Atorfik akissaateqarfimmi (LR 38) maanna inissisimavoq.

Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemandi-tut atorfeqareersimaguni Nunatsinni pisortani tjenestemandit pillugit inatsisit malillugit tjenestemandinut atugassariti-taasut naapertorlugit atorfinitsinneqarsinnaavoq.

Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat.

Piffissap suliffiusussap sivisussusissaa aallaavittut sapaatip akunneranut nalunaaquttap akunnerinik 40-nik sivisussuseqarpoq.

Akissarsianut atorfeqartitaanermullu tunngasutigut piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik.  Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.     Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk