Skip to main content
112

Dette jobopslag er udløbet

Nunanut Allanut Naalakkersuisoqarfik Hans Egedep Illuani ulluinnarni aqutsisussarsiorpoq

Hans Egedep Illua pillugu:
Hans Egedep Illua nunatta oqaluttuarisaaneranut ilaavoq. Tassani palasi Hans Egede niuertoqarfik Nuuk tuungavilermagu 1728-miit najugaqarsimavoq. Illu eqqissisimatitaavoq. Illu ullumikkut Naalakkersuisunut Inatsisartunullu ilassinninnernut aaqqissuussanut toqqammaviuvoq.

Atorfik pillugu:
Pisussanut tunngasunut allaffissornikkut, pilersaarusiornikkut piviusunngortitsinernillu suliassanik suliaqartartussamik Illumut ulluinnarni aqutsisussamik pissarsiorpugut.
Suliassatit ukuupput:

  • Pisiniarneq
  • Illumi allaffissorneq
  • Ataatsimiinnernut/pisussanut tunngasunik allaffissorneq
  • Suliffeqarfiup iluani aningaasaqarneq

Naatsorsuutigaarput:

  • Ataatsimiinnissanut pilersaarusiornermik pisiniarnermillu misilittagaqartutit.
  • Naleqquttumik ilinniagaqarsimasutit assersuutigalugu økonoma-tut igasutulluunniit imaluunniit assinganik suliaqarnermut uppernarsaatitalimmik misilittagaqartutit.
  • Sulisunik aqutsinermi misilittagaqartutit.
  • Sulisut suleqatigalugit nerisassanik aallaavittut kalaaliminernik qaffasissumik pitsaassusilinnik nillertunik kissartunillu nerisassiorsinnaasutit sassaalliisinnaallutillu.
  • Pisussanik ataqatigiissaarinermi imaqarniliuinermilu misilittagaqartutit (inuit amerlassusii).
  • Missingersuutinik/naatsorsuusiornermik suliaqarnermi misilittagaqartutit.
  • IT-mik misilittagaqartutit.
  • Torersaartuusutit igaffimmilu eqqiluisaarneq nakkutigilluarsinnaagit.
  • Aningaasaqarnermut paasisimasaqartuusutit, aamma aningaasanik peqqumaatinillu aqutsineq pitsaasoq qulakkeersinnaagit.
  • Sulisunik sullitanillu attaveqateqarneq piginnaaffigigit.
  • Aalajangiisinnaassuseqartutit.

Neqeroorutigaavut:

  • Atorfik pissanganartoq akisussaaffilillu
  • Piffissaq suliffik nikerarsinnaasoq – piffissat ilaanni assut allanngorarsinnaavoq, kisianni ukiumut najoqqutassiamut akunnerni 2080-iniitinneqarsinnaalluni.


Attavissaq qinnuteqarnerlu
Atorfik pillugu apeqqutissaqaruit Pisussanik aqutsisuuneq Jakob Rohmann Hard attaviginissaanut tikilluaqqusaavutit uunga jaha@nanoq.gl imlt. +299 55 33 26.

Akissarsiat atorfinitsitaanermilu atugassarititaasut
Akissarsiat atorfinitsitaanermilu atugassarititat, tamatumunnga ilanngullugit atorfininnermi soraarnermilu akiliunneqarluni angalaneq aamma pisattat nuunnerinut akiliunneqarneq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit pissapput.

Ineqarneq
Atorfimmut atatillugu inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaat
Qinnuteqaat kingusinnerpaamik 17. oktober 2019-imi tigoreersimassavarput.
Atorfininnermut ulloq tassaavoq 1. november imaluunniit isumaqatigiissuteqarnikkut piaarnerpaamik.
Qinnuteqaat ilinniartitaaneq siusinnerusukkullu suliffigisimasat pillugit paasissutissaqartoq, soraarummeernermi uppernarsaatit il.il. assilineri ilanngullugit uunga “qinnuteqaat nassiuguk” toorlugu nassiukkit.
E-mail-ikkut qinnuteqaatinik tigusineq ajorpugut.
 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk