Skip to main content
104

Dette jobopslag er udløbet

Nunamut Namminermut Immikkoortortamut inatsisileritooq

Naalakkersuisut Siulittaasuata Naalakkersuisoqarfiani Nunamut Namminermut Immikkoortortaq inatsisilerituumik pimoorussisumik pissarsiorpoq.
Kommunini ileqqoreqqusat erseqqinnerulersinneqassapput. Kommunit piginnaatitaaffiisa killingi ersarissarneqassapput. Nakkutilliisoqarfiup piginnaasai nalilersorneqassapput. Kommuninut siunnersuineq aamma ilitsersuineq qulakkeerneqassaaq. Tamakku maannakkut inatsisitigut suliassatta tassaapput ilaannanngui.
Suliassat suliarinissaannut peqataasussamik inatsisilerituumik pitsaasumik atorfissaqartitsivugut. Taamaattumik inatsisilerituumik immikkoortortamut ujaasivugut.
Suleqatitit peqatigalugit Naalakkersuisutsinnik pitsaasumik sullissinissaq qulakkeerinneqataaffigissavat. Peqatigitillugu Kommuninut Nakkutilliisoqarfimmut, Qinersinermut Ataatsimiititaliamut, Qinigaasinnaanermut Ataatsimiititaliamut kiisalu Naalakkersuinikkut Ataqatigiissaarisoqatigiinnut, Naalakkersuisut borgmesterillu oqallittarfigisaannut allattoqarfittut sullissinermut peqataassaatit. Ilanngullugu nalinginnaasumik suliassanik suliaqarnermut kiisalu suliassanik allanik suliaqarnermut tapeeqataassaatit.
Nunamut Namminermut Immikkoortortap pingaarnertut akisussaaffigaa, kommunini aqutsinermi pissutsinik nakkutilliineq. Sapinngisamik ukiumoortumik kommunit tamaasa nakkutilliivigalugit tikeraartarpagut. Immikkoortortaq kommuninut oqartussaasunullu allanut qanimut attaveqarpoq. Peqatigitillugu immikkoortortaq assigiinngitsutigut pisortat akornanni suleqatigiinnernut peqataasarpoq.

Immikkoortortaqarfiup akisussaaffeqarfii ilaatigut tassaapput:

  • Kommunini immikkoortuni tamani aqutsinermut tunngasuni inatsisit malinneqarnerinik nakkutilliineq
  • Inatsisartunut aamma nunaqqatigiit siunnersuisoqatigiivinut qinersinerit ingerlanneqarneri
  • Kommunit Nakkutilliisoqarfianut allattaaneq
  • Qinersinermut Ataatsimiititaliamut allattaaneq
  • Qinigaasinnaatitaanermut Ataatsimiititaliamut allattaaneq
  • Naalakkersuinikkut Ataqatigiissaarisoqatigiinnut allattaaneq.


Immikkoortortaqarfik ilaatigut ukununnga inatsisinut akisussaasuuvoq:

  • Kommunit aqunneqarnerat
  • Inatsisartunut qinersineq
  • Kommunalbestyrelsinut, najukkani ataatsimiititalianut, nunaqarfinni aqutsisunut ilagiillu sinniisaannut qinersineq
  • Nunaqqatigiit siunnersuisoqatigiivinut qinersineq
  • Kalaallit Nunaata aggornilersornera
  • Nalunaarsuineq (Eqqartuussivikkoortitsineq)
  • Taarsiissuteqarluni arsaarinninneq.


Neqeroorutigaarput:

  • Suliffik naalakkersuinikkut aalajangiisarnermut qanittoq
  • Suliffik pingaartorsiorfiunngitsoq aalajangiisartunut qanittoq suleqatillu pimoorussisut
  • Ulluinnaat, allanngorartuaannartut, suliassanut sunniuteqarfigisinnaasatit
  • Inuttut suliatigullu ineriartornissamut periarfissaq.


Naatsorsuutigaarput, illit:

  • Inatsisilerituutut ilinniagaqartutit
  • Kommunit pillugit ilisimasaqartutit
  • Namminersorlutit kiisalu suleqateqarlutit sulisinnaasutit
  • Allannikkut erseqqissuliullaqqissutit
  • Nunami pissutsit ilisimasaqarfigigitit
  • Suliffeqarfimmi politikikkut aqunneqartumi sulineq ilisimasaqarfigigit
  • Oqaatsit arlallit atorsinnaagitit, matumani kalaallisut immikkut soqutigineqarneruvoq.


Taakku saniatigut pingaartipparput:

  • Ilaatigut ulapaarfiusumi sulinissaq soqutigigit
  • Arlalinnik suliaqarnissaq pikkoriffigigit
  • Misissueqqissaarnissaq aamma aaqqissuussamik pilersaarusiorneq piginnaasaqarfigigitit
  • Ulluinnatit nammineerlutit kiisalu immikkoortortaq peqatigalugu ilusilersorsinnaagitit
  • Eqeersimaartuusutit, nutaaliorsinnaasutit, anguniagaqartuusutit inussiarnersuullutillu.


Piffissaq suliffiusussaq tunngaviusumik sapaatit akunnerannut nal. ak. 40-nik sivisussuseqarpoq. 

Immikkoortortaqarfik atorfillu paasissutissat sukumiisut immikkoortortaqarfimmi pisortaq Klaus Georg Hansen-mut, oqarsuaat: 34 51 11, email: kgh1@nanoq.gl, saaffigalugu pissarsiarineqarsinnaapput.

Qinnuteqarnissamut killissarititaq: 2. december 2020 nal. 12:00.

Piffissaq atorfiniffissaq: 1. februar 2021, isumaqatigiissuteqarnikkulluunniit.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk