Skip to main content
138

Dette jobopslag er udløbet

Nuna tamakkerlugu Ilinniartunik Siunnersuisarfiup Nuummi immikkoortua psykologinik marlunnik pissarsiorpoq

Massakkorpiaq psykologinik atorfinitsitassatsinnik marlunnik pissarsiorpugut. 1. juli atorfinitsitsinissaq kissaatigaarput tamatumaluunniitt kingunerani sukkanerpaamik. Ilinniartunik Siunnersuisarfik tallimanik immikkoortortaqarfeqarpoq, aqqaneq marluk missaannik sulisulimmik, Ilulissanut, Aasiannut, Sisimiunut, Nuummut Qaqortumullu agguataakkanik immikkoortortaqarpoq. Ilinniakkat akimorlugit suleqatigiinnut immikkoortunut tallimanut agguataakkanut, psykologit arfineq pingasut aamma katsorsaasut pingasut peqatigalugit suleqataassaatit. Sulisut tamarmik nuna tamakkerlugu Ilinniartunik Siunnersuisarfimmi psykologit pisortap ataani aaqqisuussaannikkut inissisimapput.
Nuna tamakkerlugu Ilinniartunik Siunnersuisarfik tassaavoq Nuna Tamakkerlugu Ilitsersuisarfimmi ilinniartunut akeqanngitsumik pisortatigoortumik neqeroorut.

Suliassaqarfiit
Ilinniartunik Siunnersuisarfimmi tarnip pissusaanik immikkut ilisimasalittut, ilinniartunik ataasiakkaanik tarnikkut katsorsaaneq, suliassavit pingaarnersaraat. Tamatuma saniatigut, suliniutinik ilinniakkaminnik taamaatitsiinnartartunik ikilisaanissamik ilinniartullu akornanni nalerisimaarnermik annertusaanissamik pingaarnertut anguniakkatsinnut iluaqutaasunik aallartitsinikkut, sunniuteqarnissaq periarfissaavoq.

Sullitagut suleqatigullu ilinniarfiit pisariaqartitaat eqquutsissinnaajumallugit suliffeqarfitta inerisarnissaa qitiutittuarparput. Taamaalilluta iliuusissanik qulaani anguniakkatsinnik qulakkeerisunik piviusunngortitsiniarnermi isumassarsiorusussuseqarnissaq allatullu eqqarsarsinnaanissaq kaammattuutigaagut. Tamatumunnga atatillugu najukkami suleqatigisagut peqatigalugit akuttunngitsunik attaveqatigiittut ataatsimiittarpugut.

Tamatuma saniatigut Ilinniartunik Siunnersuisarfik sinnerlugu, suliffimmut atatillugu suleqatinut ilinniartunullu angalasarnissaq periarfissaavoq.

Sullitagut tassaapput inuusuttut inersimasullu ilinniartut

Sullitatta amerlanersaat najukkaminni immikkoortortami oqaloqatiginnikkiartortarput, ilinniartunilli illoqarfinni immikkoortortaqanngitsuni najugaqartunik Teams -ikkut oqaloqateqartarnissaq pisariaqartassaaq.


Sullivimmi pissutsit ilinniagaqassuserlu
Suliffeqarfiuvugut ataatsimoornermik nalerisimaarnermillu annertuumik pingaartitsisoq. Taamaammat katsorsaanermut toqqammavissanik, tarnikkut katsorsaanermik pitsaassutsikkut qaffasissuujuartumik qulakkeerisunik, sulisutta nukissaarutinnginnissaannut iluaqutaasunik, ersarissunik maleruagassiorpugut. Tamanna ilaatigut sullitat ataatsikkut 20-it sinneqannginnissaannik isumaqarpoq, ullormullu pingasuniit amerlanernik tarnikkut katsorsaalluni oqaloqateqarnissat naatsorsuutigineqarnani. Tamatuma saniatigut soorunami suliffiup nalaani ilinniarnissap ikorfartorneqarnissallu /supervision piffissaqarfiginissaannut periarfissiivugut.

Suleqatigiissitatsinni imaannaanngitsumi, ataatsimuussutsimik misiginerup attatiinnarnissaanut- ilaatigut aalajangersimasumik ataatsimiittarnissat ilutsinni ilisimasanik avitseqatigiiffiusut, ikorfartoqatigiiffiusut, atuagarsisartunut klubbeqarfiusut, nalerisimaarfiusut (sap. ak. allortarlugit ataatsimoorluni ullaakkut sammisaqartarnikkut) pilersippagut. Tamatuma saniatigut suleqatigiit tamakkerlutik nunarput akimorlugu ukiumut marloriarlutik naapittarput, suliffiup inerisarnissaa suliniutigalugu misigisassarsiorlutillu angalaartarlutik. Immikkoortartani ataasiakkaani sulisut ukiumut ataasiarlutik misigisassarsiorlutik angalaartarputtaaq.

Sullitatsinnik tamatigut pitsaanerpaamik katsorsaanissaq qulakkeerniarlugu, sulisut tamarmik immikkut atorfininnerminni nammineq toqqakkamik ikorfartorneqarnissamut/supervision ukiumut 30.000 koruuninik aningaasaliiffigineqarput, namminerlu toqqakkamik ilinniagaqarnissamut 30.000 koruuninittaaq aningaasaliiffigineqarlutik.

Atorfininnermi sulilerlaanut paasissutisseeriaaseq (buddy-system) atorparput, suleqatinnik ilitsersuisussamik suliassanut suliffimmullu paasissutissiisussamik, sap. ak. ataasiarlutit ataatsimeeqatigisartagassannik ikiortissalerneqassaatit. Tamatuma saniatigut atorfininninniit qaammatini siullerni marlunni aallartisarninni tapersersorneqarlutit, tarnip pissusaanik immikkut ilisimasalittut pisortaq aalajangersimasumik ataatsimmeeqatigisassavat.


Naatsorsuutigaarput:

  • Psykologitut ilinniarsimaneq, ajornanngippat sulisinnaatitaanermut uppernarsaatitalik imal. sulisinnaatitaanermut uppernarsaasigaanissamut aallartereersimaneq  
  • Ataasikkaanik katsorsaanermik misilittagaqarneq
  • Ilinniartitsinermik saqqumiinermillu misilittagaqarneq
  • Ilinniakkat akimorlugit suleqatigiinnermut kajumissuseqarlunilu piginnaaneqarneq
  • Neqeroorummi pilersinneqarlaami unammilligassanik suliaqarnissamut suliffeqarnissamullu kajumissuseqarneq
  • Ingerlatitseqqiillaqqinneq
  • Qarasaasiamik atuinissamik ilisimaarinninneq
  • Oqarasuaatikkut qarasaasiakkullu siunnersuinermik ilisimaarinnissinnaaneq
  • Kalaallisut, qallunaatut tuluttullu oqaatsinik atuisinnaaneq iluaqutaassaqaaq.


Neqeroorutigaagut:

  • Nunatsinni ilinniartitaanermi annertuumik sunniuteqarsinnaaneq
  • Atorfik inuttut ilinniagaqassutsikkullu ineriartornissamut periarfissalik
  • Suliffeqarfimmi avataaniillu siunersioqateqarnissamut ilinniaqqinnissamullu pitsaasunik periarfissalik
  • Suliffik uummaarissoq
  • Suleqatigiitsialaat – suleqatissat pikkorissut pimoorussisullu.


Akissarsiat atorfininnermilu atugassarititaasut
Tunngaviusumik isumaqatigiissutit malillugit atorfinititsisoqassaaq, qinnuteqartorli tjenestemanditut atorfeqariissappat tjenestemanditut atorfinititsiusoqarsinnaavoq. Akissarsiat atorfininnermilu atugassarititaasut, atorfininnermut atatillugu angalanissamut pisattallu angallanneqarnissaannut akiliunneqarnissamut pisinnaatitaaffik ilanngullugu, atorfininnermi Kalaallit Nunaanni Namminersorlutik Oqartussat kattuffiullu isumaqatiginninniarsinnaatitaasup akornanni isumaqatigiissut atuuttoq naapertorneqassaaq.

Naalaagaaffimmi tjenestemandit qaffasissumillu ilinniagallit pillugit isumaqatigiissutit arlallit- ilaatigut DJØF-ip Finansministeriallu akornanni isumaqatigiissut naapertorlugit atorfillit, Kalaallit Nunaanni Namminersorlutik Oqartussani atorfininnermut atatillugu akissarsiaqaratik sulinngiffeqarsinnaaneq pisinnaatitaaffigaat. Kalaallit Nunaanni Namminersorlutik Oqartussani atorfininnermi akissarsiaqarani sulinngiffeqarnissamik qinnuteqaatinut akuersaarnissaq, nunami namminermi ministereqarfimmit kommuninut nunallu qitiusumik immikkoortuinut innersuussutaavortaaq. Sulinngiffeqarnissamut aalajangersakkat Kalaallit Nunaanni Namminersorlutik Oqartussani atorfinittut aapparisaannut/inooqatigisaannut aamma atuupput.


Sap. ak. nal. ak. suliffiusartut 40-ipput

Pisattanik angallassineq
Atorfininnermi pisattavit Danmarkimiit Kalaallit Nunaannut nuunneqarsinnaanissaat neqeroorutigaarput.

Qinnuteqarnissaq qinnuteqarfissarlu kingulleq juunip 9-aani 2022
Siulianiittut soqutiginnilersissimassappatsit atorfillu pillugu annertunerusunik paasisaqarusukkuit, psykologit pisortaat Bjørn Noer oqarasuaatikkut: +299 34 68 65 imal. oqarasuaat angallattakkamut +299 25 03 62 imal. emailikkut: bjno@aqqut.gl attavigisinnaavat.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk