Skip to main content
89

Nalileeqataasartunngorit

Nalileeqataasartunngorit

Piffissami nalileeqataasartussatut atuuffimmi 2020 – 2024-imi nalileeqataasussanngortitsinissamut qinnuteqaat.

PI/SPS ilinniakkanut ingerlaqqiffiusunut nalileeqataasartussatut qinnuteqaqqusivoq

Qaffasinnerusumik ilinniartitaanerit pillugit Inatsisartut inatsisaat nr. 14, 12. juni 2019-imeersoq naapertorlugu Perorsaanermik Ilinniarfik/Socialpædagogisk Seminarium piffissami 2020 – 2024-mi nutaanik nalileeqataasartussanngortitsisussaavoq 

Taamaattumik Perorsaanermik Ilinniarfik/Socialpædagogisk Seminarium fagimi ataatsimi arlalinniluunniit ataani taaneqartuni nalileeqataasartussatut ikkunneqarnissamut piukkunnaatilinnik qinnuteqaqqusivoq.

Fagit

  • Perorsaanermi suliassaqarfik pingaarneq
  • Isumaginninnermi suliassaqarfik pingaarneq
  • Pinngorartitsinermi suliassaqarfik pingaarneq
  • Inaarutaasumik misilitsinnerit
  • Bachelorinngorniarluni allaaserisassaq

Ilinniakkat pillugit annerusumik paasisaqarniaraanni nittartaakkami uani aaneqarsinnaapput.

Ilinniakkanut ingerlaqqiffiusunut nalileeqataasartunngussagaanni piginnaasaqarfiit piumasarineqartut tassaapput faginut nalileeqataasarfissatut qinnutigineqartunut tunngatillugu attuumassutilimmik ilinniagaqarsimanissaq atorfeqarsimanissarlu, piumasarineqarporlu ilinniagaq kandidatitut qaffasissuseqassasoq.

Perorsaanermik Ilinniarfiup/Socialpædagogisk Seminarium kissaatigaa qinnuteqartut kalaallisut oqalussinnaassasut Kalaallillu Nunaanni pissutsinik ilisimasaqassasut.

Maannakkut nalileeqataasussatut ikkusimasut minnerpaamik pingajorarterutaat nutaanik nalileeqataasartussanngortinneqartussanit taarserneqassapput, taamaattumik qinnuteqarnermi nalileeqataasartussatut ikkuteqqinneqarnissaq qulakkeerneqarsinnaanngilaq.

Kajumissuseqarluni qinnuteqaatit atorfeqarnermut ilinniagaqarnermullu uppernarsaatitallit uangutsinnut nassiunneqassapput

Kingusinnerpaamik 9. december nal. 16 kalaallit nalunaaqutaat malillugu.

Nalileeqataasartussatut ikkunneqartut katitigaanerat qinnuteqartunut nalunaarutigineqassaaq kingusinnerpaamik 10. januar 2020-mi
 

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk