Skip to main content
66

Nakkutilliinermik ingerlatsivimmut nakkutilliisut isumaginninnermi suliatigut ilinniarsimasut, Isumaginninnermut Inatsisinillu Atuutsitsinermut Naalakkersuisoqarfik

Isumaginninnermut Inatsisinillu Atuutsitsinermut Naalakkersuisoqarfik nakkutilliisussanik isumaginninnermi suliatigut ilinniagaqarsimasunik nammineersinnaalluartunik misilittagartuunillu 1. maj 2020 tamatumaluunniit kingorna piaarnerpaamik atorfinitsinneqartussanik marlunnik sulisussarsiorpoq.
 
Takorloorparput illit

  • Isumaginninnermut siunnersortitut ilinniagaqarnermi professionsbacheloriusutit imaluunniit isumaginninnermut siunnersortitut ilinniagaqarsimasutit naleqquttunillu allagartartaarfiusumik ilinniagaqaqqissimasutit, cand. soc.-imik ilinniagaqarsimasutit imaluunniit assigisaanik ilinniagaqartutit.
  • inunnik isumaginninnermut suliassaqarfimmi ukiuni arlalinni suliaqarnermi naleqquttumik misilittagaqartutit
  • qanilaartuusutit suliffeqarfimmilu nalimuattut assigiinngitsut tamaasa peqataaffigisinnaallugit
  • oqaluttariarsornikkut allattariarsornikkullu atassuteqarsinnaaneq pikkoriffigit, oqaloqatiginnissinnaanerlu sapinngikkit,
  • namminersorlutit suliassanik piareersaasinnaanermik piginnaasaqartutit namminerlu akisussaaffimmik tigusisinnaasutit
  • nammineq aaqqissuussaasumillu sulisinnaasutit
  • pitsaassuseq appartinngikkaluarlugu suliassat piffissalerneqarsimasut ukkatarisinnaagitit.

Kalaallit Nunaanni pissutsinik ilisimasaqassaatit aamma kalaallisut qallunaatullu oqallorissuussallutit
 
Uagut pilluta
Nakkutilliinermik ingerlatsivik Isumaginninnermut Inatsisinillu Atuutsitsinermut Naalakkersuisoqarfiup ataaniippoq ataatsimik immikkoortortaqarfimmut pisortalik aamma 5-inik nakkutilliisartunik sulisulik.
Nakkutilliinermik ingerlatsiviup nakkutilliisarnerit 2-t assigiinngitsut ingerlattarpai:

  • Ingerlatsinermut inatsiseqartitsinikkut malittarisassat (immikkoortunik nakkutilliineq) malillugit ingerlatsinersut aamma isumaginninnermut inatsimmi malittarisassat malillugit kommunit sulinersut pillugit nakkutilliineq.
  • Ulloq unnuarlu paaqqinniffinnut suliassaqarfimmik ingerlatsinikkut, aningaasaqarnikkut perorsaanikkullu nakkutilliineq.


Ilinnut neqeroorutigisinnaavagut

  • Suliffeqarfik aalajangiisinnaassuseqarnermik namminerlu sulisinnaassusermik pingaartitsisoq, illillu ulluinnarni sulisarnerit nammineerlutit sunniuteqaqataaffiginissaanut pitsaasumik periarfissalik
  • Kalaallit Nunaanni annertuumik angalasarnissat, angalanerni sapaatip akunnera 1 sinnerlugu angalasinnaallutit
  • Atorfik akisussaaffeqarfiusoq unammilligassaqarlunilu pissanganartulik, suliamut inummullu tunngatillugu ineriartornissamik periarfissalik.


Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Sapaatip akunneranut akunnerit 40-t suliffiusarput, kisiannili qaangiuttoortarnissat naatsorsuutigisariaqarput, tassami atorfimmut atatillugu annertuumik angalasarnissat naatsorsuutigisariaqarmata.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Ulloq sulilerfissaq
1. maj 2020.
 
Paasissutissat sukumiinerusut:
Atorfik pillugu annertunerusumik paasisaqarusukkuit Naalakkersuisoqarfimmi Pisortaq Julie Præst Wilche oqarasuaat 00299 551190 atorlugu / jprw@nanoq.gl –ikkut imaluunniit siunnersortit pisortaannut Kirsten Olesen kiol@nanoq.gl attaveqarsinnaavutit.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk