Skip to main content
122

Dette jobopslag er udløbet

Naalakkersuisut Siulittaasuata Naalakkersuisoqarfia nutaamik inatsisilerinermi pisortassarsiorpoq

Inatsisilerinermi pisortatut aamma Namminersorlutik Oqartussat Inatsisilerinermut immikkoortortaqarfiani pisortatut atorfik sapinngisamik piaartumik imaluunniit isumaqatigiissuteqarneq malillugu inuttassarsiuunneqarpoq.
Inatsisilerinermi pisortaq Inatsisilerinermut immikkoortortaqarfimmi, Namminersorlutik Oqartussani qitiusumi inatsisilerinermut immikkoortortaqarfiusumi, aqutsisuuvoq. Aaqqissuussaanikkut Inatsisilerinermut immikkoortortaqarfik Naalakkersuisut Siulittaasuata Naalakkersuisoqarfiata ataani inissisimavoq.
Inatsisilerinermi pisortap, Naalakkersuisut Siulittaasuata Naalakkersuisoqarfiani Naalakkersuisoqarfimmi pisortat qullersaralugit, Naalakkersuisut Siulittaasuanut aamma Naalakkersuisunut inatsisitigut siunnersuineq suliassaraa.
Inatsisilerinermut immikkoortortaqarfiup Namminersorlutik Oqartussani qitiusumi inatsisilerinermi immikkoortortaqarfiusutut inatsisilerinermi suliassat assigiinngitsorpassuit isumagisarai, aammalu Naalakkersuisunut inatsisilerinikkut ikiuuttarnermi saniatigut aamma qitiusumik allaffeqarfinni oqartussaasunut allanut inatsisilerinikkut siunnersuisarluni.
Inatsisilerinermut immikkoortortaqarfiup sulinerani suliassat pingaarnerit makkua ilaapput

  • Inatsisilerineq, Kalaallit Nunaanni inatsisinut tunngatillugu nalunaarutiginninnerit aamma tamanut saqqummiussinerit
  • Inatsisinik nassuiaaneq aamma qitiusumi allaffeqarfimmi oqartussaasunik inatsisitigut siunnersuineq
  • Inatsisiliornernik suliaqarnerni suleriaatsinik aaqqissuussineq
  • Pisortat ingerlatsineranni inatsisinut tunngatillugu maleruagassiisarneq aamma ilitsersuisarneq – ilanngullugit kaajallaasitanik suliaqarnerit
  • Inatsisinut nalinginnaasumik apeqqutinut akissuteqartarneq
  • Inatsisinut tunngasunik allakkianik aamma akissutissanik suliaqarneq

Piukkunnassuseqarnermut piumasaqaatit

  • Politikkimut tunngasunik suliaqallaqqinneq aamma aaqqissuussaanermi politikkikkut aqunneqartumi sulinissamut piumassuseqarneq
  • Atuagarsornermik patajaatsumik tunuliaqutaqarneq
  • Pisortaqarfinni inatsisinut tunngasunik suliassanik suliarinnittarnermi ukiuni arlalinni misilittagaqarneq
  • Pisortatut misilittagaqarneq
  • Inatsisilerinermut immikkoortortaqarfimmi inatsisilerinermut piginnaasanik ineriartortitsinissamut soqutigisaqarneq aamma piginnaaneqarneq
  • Aaqqissuussaanikkut killissaliussat aamma sulianut ilinniagaqarsimanikkut tunngavissat akimorlugit suleqatigiinnissamut piginnaaneqarneq
  • Pisariaqarpat immikkut annertunerusumik suliniarnissamut aammalu piffissatigut tatisimaneqarluni sulinissamut piumassuseqarneq

Inuiaqatigiit ineriartornerannut suliniutini annertuuni, Kalaallit Nunaanni ulluinnarni malugisimaneqartuni inatsisitigut malittarisassanut siunnersuutit pitsaassusaannik qulakkeerineq aamma peqataaneq, immikkoortortaqarfiup suliassaanni qaffasissumik pingaartinneqarpoq.
Naatsorsuutigineqarpoq inatsisilerinermi pisortap ineriartortitsinermut suliniutit, inatsisiliornermik suliaqarnermi qaffasissumik pitsaassuseqarnissaannut iluaqutaasut, suliarisinnaassagai aammalu naammassisinnaassagai, peqatigisaanillu isumalluutit ataatsimoortut, maleruagassanik suliaqarnermi atorneqartartut, sunniuteqarluartumik atorluarneqarnissaannut peqataassalluni.
Ammasumik nuannersumillu immitsinnut periaaseqarnissaq pingaartipparput aammalu inatsisilerinermi pisortaq sulinermi avatangiisini persuarsiorfiunngitsuni immikkoortortaqarfimmi inatsisilerituut allat aamma Naalakkersuisut Siulittaasuata Naalakkersuisoqarfiani sulisut allat peqatigalugit, pisortatut akuusinnaasoq naatsorsuutigaarput. Immikkoortortaqarfiup angissusaata killeqarnera pissutigalugu – pisortatut sulinerup saniatigut – inatsisilerinermi suliassanik aalajangersimasunik isumagisaqartussaanissaq, taamatullu allaffissornermut tunngasunik ataasiakkaanik suliassaqalertarsinnaanissaq, inatsisilerinermi pisortap piareersimaffigisariaqarpaa.


Akissarsiat atorfeqartitaanermilu atugassarititaasut:
Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemandi-tut atorfeqareersimaguni Nunatsinni pisortani tjenestemandit pillugit inatsisit malillugit tjenestemandinut atugassariti-taasut naapertorlugit atorfinitsinneqarsinnaavoq.

Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat.

Piffissap suliffiusussap sivisussusissaa aallaavittut sapaatip akunneranut nalunaaquttap akunnerinik 40-nik sivisussuseqarpoq.

Akissarsianut atorfeqartitaanermullu tunngasutigut piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.

Ulloq atorfiniffiusussaq erseqqinnerusumik isumaqatigiissuteqarneq malillugu pissaaq.

Namminersorlutik Oqartussat Pointer Search A/S-ilu atorfimmut uunga inuttassarsiuinermi suleqatigiinnissaminnik isumaqatigiissiorsimapput. Taammaattumik Pointer Search A/S-imi pisortaq Inger Ingvardsen, oqar. +45 29368636 imalt. siunnersorti Morten R. Christiansen, oqar. +45 26170932 attavigisinnaavatit. Saaffiginnissatit tamarmik matoqqasumik ingerlanneqassapput. Qinnuteqaatit piaartumik kingusinnerpaamillu 31. januar 2019 uunga nassiunneqassaaq: kam@pointersearch.dk 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job