Skip to main content
100

Dette jobopslag er udløbet

Meeqqat illersuisuat - Kalaallit Nunaanni meeqqat tamarmik sinniisussaannik oqallorissumik Namminersorlutik Oqartussat sulisussarsiorput

Inatsisartut 2011-imi meeqqat pisinnaatitaaffii pillugit nutaamik allaffeqarfiliorpoq Meeqqanut illersuisulimmik meeqqat pisinnaatitaaffiinik peroriartornermilu atugassarititaannik Kalaallit Nunaanni saqqumilaartitsinerulernissamik sulissuteqartussamik.

Meeqqat illersuisuat taassaavoq meeqqat pisinnaatitaaffii pillugit allaffeqarfimmi siuttuusussaq, aammattaaq Meeqqat Siunnersuisoqatigiivinut allattoqarfiannullu ilaasoq. Meeqqat illersuisuat Meeqqat Siunnersuisoqatigiivini siulittaasuuvoq meeqqallu sinniisoqarfianni qullersaalluni. Meeqqat Pisinnaatitaaffii pillugit Naalagaaffiit Peqatigiit Isumaqatigiissutaat aallaavigalugu meeqqat atugassarititaannut pisinnaatitaaffiinullu tunngatillugu ukkatarinnilersitsineq ilisimasanillu siuarsaaneq sulinermi tunngaviuvoq.

Meeqqat illersuisuattut atorfik meeqqat atugassarititaannik pisinnaatitaaffiinillu suliaqarnikkut suliatigut inuttullu immikkuullarissumik sunniuteqaqataanissamut periarfissiivoq.

Meeqqat illersuisuata pingaarnertut suliassarissavai:

  • Meeqqat atugassarititaannut pisinnaatitaaffiinullu tunngatillugu apeqqusiisarneq oqallitsitsinerlu, meeqqat sinnerlugit oqariartuuteqartarneq oqallinnermilu meeqqat sinnerlugit oqaaseqartarneq
  • Meeqqat atugassarititai pisinnaatitaaffiilu pillugit oqartussaasunut, suliffeqarfinnut, kattuffinnut inuinnarnullu siunnersuisarneq ilitsersuisarnerlu
  • Kalaallit Nunaanni inatsiseqarnermut suleriaatsimullu tunngatillugu Meeqqat Pisinnaatitaaffii pillugit Naalagaaffiit Peqatigiit Isumaqatigiissutaanni aalajangersakkat naapertuunneqarnersut pillugit nakkutiginninneq
  • Pissutsinik meeqqat atugassarititaannut periarfissaannullu inuiaqatigiinni nalinginnaasumik ineriartornikkut sunniutilinnik uparuaasarneq
  • Meeqqanut inatsiseqartitsinikkut isumannaatsuutitsinissamut siuarsaataasinnaasunik suliniutigisassanut siunnersuuteqartarneq
  • Meeqqat atugassarititaat pillugit ilisimasanik katersisarnissamik, ineriartortitsinermik siammarterisarnissamillu qulakkeerinninneq


Meeqqat illersuisuat politikkikkut attuumassuteqanngilaq inuiaqatigiinnilu meeqqat atugassarititaat pisinnaatitaaffiilu pillugit arlaannaanulluunniit attuumassuteqanngitsumik oqaaseqarsinnaalluni.

Meeqqat illersuisuat suliassani meeqqanut tunngasuni politikkikkut, allaffissornikkut suliatigullu ingerlatsinermik nalilersuinissaminut paasiniaasinnaanera pillugu siammasissumik Meeqqat illersuisuat aamma Meeqqat pillugit Siunnersuisoqatigiit pillugit Inatsisartut inatsisaannit nr. 11, 22. november 2011-meersumit periarfissinneqarpoq.

Meeqqat illersuisuattut atorfimmut qinnuteqartunut naatsorsuutigaarput:

  • atorfiup imarisaanut naleqquttumik ilinniagaqartuusoq misilittagaqarlunilu
  • attaveqatiginnillaqqissoq, aammalu meeqqanik oqaloqateqarsinnaanermik piginnaasalik
  • aqutsisutut pilersaarusiornermik suleqateqarnikkullu misilittagalik
  • namminersorluni sulisinnaalluartoq, eqinnaatsoq sulianillu aallussilluartoq
  • akisussaassuseqarluartoq suliamullu ataqqinnittoq
  • kalaallisut, nunat avannarliit oqaasiinik tuluttullu oqaatsinik piginnaasaqarluartoq
  • isumassarsiullaqqissoq, ilakkuminartoq alapernaatsorlu


Meeqqat illersuisuattut atorfik ukiut aalajangersimasut malillugit atorfiuvoq ukiuni sisamani atorfeqarfiusussaq.

Ukiut, suiaassuseq, ammip qalipaata, upperisaq, inuiannut sumut ilaaneq apeqqutaatinnagit soqutiginnittut tamaasa atorfimmut qinnuteqarnissaannut kajumissaarneqarput.
 
Qinnuteqarnissamut killigititaasoq 31. januaari 2021
Atorfininnissamut oqaloqatiginninnerit 2021-mi februaarip aallartinnerani pinissaat naatsorsuutigineqarpoq.

Ulloq atorfiniffissaq
1. juuni 2021.

Angalasarnerit
Atorfeqarnermut atatillugu piffissap ilaatigut angalasarnissaq naatsorsuutigineqassaaq.

Atorfik pillugu paasisaqarnerorusukkuit uunga attaveqarnissannut tikilluaqquneqarputit:
Julie Præst Wilche, Naalakkersuisoqarfiup pisortaa, Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfik, e-mail: jprw@nanoq.gl, oqarasuaat: + 299 34 66 44 imaluunniit Kirsten Olesen, e-mail kiol@nanoq.gl, oqarasuaat: +299 34 6657

Meeqqat illersuisuat aamma Meeqqat pillugit Siunnersuisoqatigiit pillugit Inatsisartut inatsisaat nr. 11, 22. november 2011-meersoq Inatsisinik ujarlertarfimmi uani pissarsiarineqarsinnaavoq www.nanoq.gl

Ineqarneq
Atorfimmut atatillugu sulisunut inissiamik innersuussisoqanngilaq. Qinnuteqartorli Namminersorlutik Oqartussani atorfeqarnerminut atatillugu sulisutut ineqareersimaguni sulisunut inissiamik innersuuffigineqarsinnaanini attatiinnassavaa. Atorfimmut atatillugu ini atorfeqarnermut tunngavoq atorfeqarnerullu uninnerani qimanneqassalluni.

Akissarsiat atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginninniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk