Skip to main content
93

Dette jobopslag er udløbet

Meeqqanut susassaqarfimmi kajumissutsimik suliaqarnermik nukittorsaanissamut AC-fuldmægtigi/immikkut siunnersorti

Meeqqanut susassaqarfimmi kajumissutsimik suliaqarnermi atugassarititaasut nukittorsarneqarnissaannut Isumaginninnermut Aqutsisoqarfik kajumissutsimik suliaqarnermut susassaqarfimmut tunngatillugu misilittagalimmik AC-fuldmægtigissarsiorpoq/immikkut siunnersortissarsiorpoq.

Atorfik pillugu
Isumaginninnermi politikkimut tunngatillugu ajornartorsiutinik aaqqiissuteqarniarnermi peqatigiiffiit kajumissutsimik suliaqartut peqataatinneqarnerusinnaaniassammata peqatigiiffiit kajumissutsimik suliaqartut, Namminersorlutik Oqartussat kommunillu akornanni malittarisaqarnerulluni suleqatigiinnermik pilersitsinissamut tunngaviliisinnaasumik nuna tamakkerlugu ataqatigiissaarinermut immikkoortortamik pilersitsinermi siuttuussaatit.  Ataqatigiissaarisut ingerlatitseqqittassapput, ikorfartuisassapput aamma peqatigiiffiit kajumissutsimik suliaqartut, Namminersorlutik Oqartussat kommunillu akornanni ataatsimoorussamik suleqatigiinnernik ineriartortitseqqittassapput, taamaaliornikkullu maannamut peqatigiiffiit kajumissutsimik suliaqartut isumaginninnikkut suliniutinik isumaginninnermi tapersersuisinnaanerunissaat qulakkeerlugu.
 
Sulininni suliassatit ilaatigut makkuussapput:

  • Nuna tamakkerlugu ataqatigiissaarinermik immikkoortortamik ineriartortitsineq
  • Kajumissutsimik peqatigiiffiit, Namminersorlutik Oqartussat kommunillu akornanni suleqatigiinnernik attaveqaatinillu ineriartortitsineq
  • Nuna tamakkerlugu kajumissutsimik suliaqarnermik nukittorsaasinnaasumik aamma kajumissutsimik sulisussanik sulisussarsiortarnermik sulisullu sulisoriinnarnissaannut tunngatillugu peqatigiiffinnik  tapersersuinissaq anguniarlugu kajumissutsimik sulinerup nalinga pillugu ilisimasanik katersineq siammarterinerlu
  • Danskit aningaasaateqarfiinut nuna tamakkerlugu attaveqarfissatut inissisimaneq, taamaalillutik suliassanut Namminersorlutik Oqartussani kommuninilu atorfissaqartinneqartunut annertunerusumik neqeroorsinnaaniassamata
  • Peqatigiiffiit kajumissutsimik suliaqartut suliniutaannik, pilersaarusiaannik taakkunanngalu angusaannik takussutissaliorneq
  • Suliassaqarfimmi paasititsiniaanermi qaammarsaanermilu periusissianik ineriartortitsineq
  • Meeqqanut susassaqarfimmi kajumissutsimik suliaqarneq pillugu ilisimasanik suliniutinillu takussutissiisumik digitalikkut aaqqiissutissamik pilersitsinissamut aallartitsineq. 


Suleqatissarsiorpugut makkuninnga piginnaasalimmik:

  • Kajumissutsimik suliaqarnermut tunngasunik ilisimasalik soqutigisalillu
  • Suliniutinik ineriartortitsinermillu suliaqarnermik misilittagalik
  • Allattariarsornikkut oqaluttariarsornikkullu paasissutissiisarnermut piginnaasalik
  • Naleqquttumik ilinniagalik
  • Ataqatigiissumik, misissueqqissaarnermik tunngaveqartumik nalinginnaasumiillu allaanerusumik eqqarsarsinnaassusilik
  • Aaqqissuussaasumik suleriaaseqartumik angusaqarluarnissamillu pingaartitsisumik
  • Aallussisumik aamma suliniaqatigiiffiit, suliaqaqatigiit ingerlataqarfiillu akornanni suleqatigiilluarnermik qulakkeerinnissinnaasumik
  • Kalaallinik inuiaqatigiinnik piorsarsimassusiannillu ilisimasaqarluartumik.


Kalaallit Nunaanni meeqqanut inuusuttunullu atugarliortunut tunngatillugu suliniuteqarnissaq pillugu nukittunerusumik suleqatigiinnissamik, tamannalu pillugu ataatsimoorluni suliaqarfinnik assigiinngitsunik suliaqarnermik pilersitsinissamik Naalakkersuisut danskillu naalakkersuisui oktober 2019-imi isumaqatigiissuteqarput.  Sulineq suliniutinik siunnerfilinnik 16-inik innersuussutigineqartunik inerneqarsimavoq, taakkunannga meeqqanut susassaqarfimmi kajumissutsimik suliniuteqarnissamut atugassarititaasunik nukittorsaanissaq ilaalluni. Atorfik kalaallit-danskit akornanni suliaqarfinnik assigiinngitsunik suliaqarnermit aallaaveqarpoq aallaaviatigullu 2023-p naaneranut killilerneqarluni, sivitsorneqaratarsinnaallunili.
 
Atorfik Isumaginninnermut Aqutsisoqarfimmi oqartussaasoqarfiit assigiinngitsunik suliallit akornanni pitsaaliuinermut immikkoortortap Paarisap ataani inissisimavoq.  Paarisami ilaatigut nuna tamakkerlugu periaasissanik nutaanik, suliniutinik kiisalu atuuttussanngortitsinermi suliamik tunngavissiinerit kommunit oqartussallu allat suleqatigalugit suliarineqartarput. Immikkoortortaqarfimmi suliassat pingaarnerit ilagaat suliassaqarfinnit assigiinngitsunit suliniutinik, oqartussaasunut kiisalu innuttaasunut tunngassuteqartunik ineriartortitsineq.

Sapaatip akunneranut nalunaaquttap akunneri 40-t suliffiusarput.

Ulloq atorfiniffissaq:
1. november 2020 isumaqatigiissuteqarnikkulluunniit.

Isumaginninnermut Aqutsisoqarfik pillugu
Isumaginninnermut Aqutsisoqarfik Naalakkersuisut ataanni aqutsisoqarfiuvoq ukuninnga arfinilinnik immikkoortortaqartoq: Pitsaaliuinermut immikkoortortaq Paarisa, Aningaasaqarnermut immikkoortortaqarfik, Ulloq unnuarlu paaqqinnittarfinnut tulleriiaarisarnermullu immikkoortortaq, Oqartussaasunut immikkoortortaqarfik, Pineqaatissinneqarsimasunut immikkoortortaqarfik aamma Allattoqarfik. Immikkoortortaqarfiit qanimut suleqatigiittarput, suliffiuvorlu suliassanut tunngatillugu amerlasuunik unammilligassaqarfiusoq.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Ineqarneq
Atorfimmut atatillugu pequsersugaanngitsumik inissaqartitsisoqarsinnaavoq. Qinnuteqartut atorfitsik aqqutigalugu ineqartinneqareersut imaluunniit kommuninit Namminersorlutik Oqartussanilluunniit pigineqartunik ineqartut inissaqartinneqarsinnaanngillat. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Sulisunut inissiaq atorfimmut atavoq, taannalu Namminersorlutik Oqartussat inissiaataannut nalinginnaasunut ilaanani. Sulisunut inissiaq atorfimmit soraarnermi qimanneqassaaq kingusinnerpaamillu suliniut atorunnaarpat qimanneqassalluni.
 
Paasissutissat  sukumiinerusut
Atorfik pillugu sukumiinerusumik paasisaqarumaguit Paarisami immikkoortortami pisortaq Ditte Sølbeck ditt@nanoq.gl-kkut +299 346037-mut attavigisinnaavat imaluunniit suliassanik aqutsisoq Kirsten Fencker kfen@nanoq.gl-kkut/+299 346906-imut attavigisinnaavat.

Qinnuteqarnissamut killissarititaq: Ataasinngorneq ulloq 28. september 2020 nal. 12.00 (nunatsinni nalunaaqutaq malillugu)

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk