Skip to main content
153

Dette jobopslag er udløbet

Meeqqanut, Inuusuttunut Ilaqutariinnullu Naalakkersuisoqarfimmi pisortaq

Namminersorlutik Oqartussat Meeqqanut, Inuusuttunut Ilaqutariinnullu Naalakkersuisoqarfimmi Naalakkersuisoqarfiup pisortaatut atorfimmut aqutsinermik misilittagaqarluartumik pisortassarsiorpoq.

Aaqqissuussaanera
Meeqqanut, Inuusuttunut Ilaqutariinnullu Naalakkersuisoqarfik 22-nik sulisoqarpoq immikkoortortaqarfinnut pingasunut agguarsimasunik. Meeqqanut, Inuusuttunut Ilaqutariinnullu Naalakkersuisumik sullissinissaq siunnersuinissarlu, inatsisiliorneq, periusissat, iliuusissatut pilersaarutit, Naalakkersuisut isummernissaannut tunngavissiorneq, pinaveersaartitsinermik suliniutinik aaqqissuussaasunik aallartitsineq kiisalu inatsit naapertorlugu paasissutissiisarnerit Naalakkersuisoqarfiup pingaarnertut suliassarai.

Isumaginninnermut Aqutsisoqarfik Meeqqanut, Inuusuttunut Ilaqutariinnullu Naalakkersuisoqarfiup ataaniippoq. Isumaginninnermut Aqutsisoqarfik suliassaqarfinnut tullinnguuttunut ingerlatsinermik ataqatigiissaarinermillu akisussaaffeqarpoq: Meeqqanut innarluutilinnullu suliassaqarfimmi kommunini sullissisunik siunnersuisarneq - Innuttaasunut neqeroorutit, tassunga ilanngullugit meeqqat aamma inersimasut pillugit angalasartoqatigiit, Tusaannga, katsorsaanermik suliniutit aamma ikiuigasuarnissamut upalungaarsimaneq – Meeqqanut inuusuttunullu aamma inunnut innarluutilinnut ulloq unnuarlu paaqqinnittarfinnik innersuussisarneq ingerlatsinerlu – PAARISA, isumaginninnikkut peqqinnissatigullu pinaveersaartitsineq, tassunga ilanngullugit Inuuneritta, siusissukkut suliniuteqarneq aamma angajoqqaanngornissamut piareersaaneq – Pissassarfik, nuna tamakkerlugu innarluutilinnik sullissivik – Illernit, arnanut meeqqanullu persuttagaasimasunut nuna tamakkerlugu qimarnuik katsorsaaviutigisoq – il.il.

Naalakkersuisoqarfiup taakku saniatigut suliassaqarfiit uku qanimut suleqatigai:  MIO, Meeqqat Illersuisuat aamma TILIOQ, Innarluutillit Illersuisuat kiisalu Inuit Pisinnaatitaaffii pillugit Nunatsinni Siunnersuisoqatigiit.        

Akisussaaffeqarfik
Naalakkersuisoqarfimmi pisortap aqutsisut allat peqatigalugit naalakkersuisoqarfiup ulluinnarni aqunneqarnera kiisalu Meeqqanut, Inuusuttunut Ilaqutariinnullu Naalakkersuisup naalakkersuisoqarfiup akisussaaffiinut tunngatillugu ulluinnarni siunnersorneqarnera suliassarai.

Naalakkersuisoqarfiup pisortaata naalakkersuinikkut sulissutigineqartut piviusunngortinneqarnissaat qulakkeertassavaa taamatullu suliassaqarfimmut akisussaaffigisamut tunngassuteqartut ineriartortinneqartuarnissaannut suleqataassalluni. Naalakkersuisoqarfiup pisortaata sulissutigineqartut aallartinneqareersut naliliivigineqartuartarnissaat isumannaassavaattaaq aningaasaqarnikkut nukissat pitsaanerpaamik iluaqutigineqarnissaat siunertaralugu.

Suliassat pingaarnerpaatitat tassaapput Naalakkersuisut meeqqanut, inuusuttunut ilaqutariinnullu suliassanut pilersaarutaat kiisalu periusissianik, iliuusissatut pilersaarutinik suliassaqarfimmilu akisussaaffigisami inatsisinik suliaqaqqinneq. Naalakkersuisut aalajangernissaannut pitsaanerpaamik tunngavissiiniarluni tamanik suliamut tunngasut suliassaqarfiillu assigiinngitsut akornanni suleqatigisanik attuumassutilinnik sulinissaq pingaaruteqarluinnarpoq.

Meeqqanut, Inuusuttunut Ilaqutariinnullu suliassaqarfimmiipput atualertussat, meeqqat inuusuttullu atugarliortut, ilaqutariit meeqqallu, pinaveersaartitsineq, meeqqanut inuusuttunullu isumaginninnermut suliassaqarfik., meeqqat illersuisuat aamma meeqqat pillugit siunnersuisoqatigiit, innarluutillit, innarluutillit illersuisuat, inuit pisinnaatitaaffii kiisalu suliassaqarfiit nunatta tigunikuusai: ilaqutariit pillugit inatsit aamma kingornussisarneq pillugu inatsit.

Suliassaqarfimmi akisussaaffigisami unammilligassat annertuut – maannakkut ukiunilu tulliuttuni, tamanna ilaatigut Meeqqanut, Inuusuttunut Ilaqutariinnullu suliassaqarfimmi aningaasaqarnermut annertuumik tatisimaneqalersitsivoq.

Suliamut qaffasissumik ilisimasaqarnissaq, suliassanut atatillugu naliliisinnaassuseqarluarnissaq aamma inuiaqatigiit tamarmik pisariaqartitaannik paasisimasaqarluarnissaq naatsorsuutigineqarput.

Aammattaaq Naalakkersuisoqarfimmi pisortap makku akissussaaffigai:
Naalakkersuinikkut aqutsisut aalajangiinissaannut tunngavissiornissaq aamma anguniakkat naammassisassallu anguneqarnissaat qitiutillugu naalakkersuinikkut aalajangiinerit atulersinneqarnissaat.
Naalakkersuisoqarfinnut allanut, aqutsisoqarfinnut, immikkoortortaqarfinnut, suliffeqarfinnut suliaqartunullu allanut tunngatillugit naalakkersuisoqarfiup suliassaanik ataqatigiissaarineq, kiisalu taagorneqartut taakku pitsaasumik suleqatigiinnissaannut aqqutissiuussinissaq.
Nalinginnaasumik allaffissornikkut malittarisassanik, ingerlatseriaatsinik pitsaassutsimullu piumasaqaatinik piviusunngortitsinissaq

Naalakkersuisoqarfimmik aqutsineq, matumani ilanngullugit:

  • Aaqqissuussaassutsimik inerisaaneq aamma attaveqartarnernik atassuteqartarnernillu pitsaasunik erseqqissunillu qulakkeerinninneq
  • Naalakkersuisoqarfimmi suleqatigiinneq suleqatigisartakkanillu avataaneersunik suleqateqarneq pitsaasoq
  • Sulisunik aqutsineq inerisaanerlu
  • Suliassanik pilersaarusiortarneq isumalluutinillu atuineq
  • Suliassaqarfimmi suliniutit unammilligassallu pillugit innuttaasunut ilisimatitsilluartarnermik qulakkeerinninneq
  • Immikkoortortaqarfimmi suliatigut ingerlaavartumik ineriartorneq.

Piginnaasat
Atorfimmik inuttaliinermi makkua pingaartinneqassapput:

  • Qaffasinnerusumik ilinniagaqarsimasoq, kiisalu naalakkersuisoqarfiup akisussaaffianut tunngasut ilaasa tamarmiusulluunniit iluini suliamut tunngasutigut attuumassutilinnut ilisimasaqarluarneq.
  • Kalaallinik inuiaqatigiinnik kalaallillu oqaasiinik paasisimasaqarluarneq ilisimasaqarluarnerlu.
  • Naalakkersuisut, Inatsisartut kommunillu akornanni sunniiveqatigiittoqartarneranik ilisimasaqarluarneq tassungalu tunngatillugu politikikkut siunnersuisinnaaneq.
  • Pingaarnersiuinermut aaqqissuussaasumillu sulisinnaanermut kiisalu suliffeqarfiup iluani avataanilu suliat assigiinngitsut akornanni suleqatigisanut kiisalu sunniuteqarnissamut tunngatillugu piginnaasaqarluarneq
  • Aqutsisutut annertuumik angusaqarluarsimanermut uppernarsaateqarneq.
  • Suliffeqarfimmik naalakkersuinikkut aqunneqartumi sulianik aqutsinissamut misilittagaqarluartutit kiisalu aningaasanik aqutsinermi akisussaassuseqartutit.
  • Naalakkersuisoqarfiup qitiusutut suliassaasa sunniuteqarluartumik naammassineqarnissaannut tunngatillugu illup iluani avataanilu suliaqartartunik peqataatitsisinnaassuseqartoq.
  • Aqutsinermik, ataqatigiissaarinermik sulianillu annertunerusunik, tassunga ilanngullugit inatsisinik suliaqarnernik, periusissanik, nassuiaatinik il.il. naammassisaqarluarnissamik qulakkeerinnissinnaanermik piginnaasaqarneq.

Inuttut piginnaasat
Atorfimmut qinnuteqartut Nunami Namminermut nunanullu tamanut paasisimasaqarluarnissaat naatsorsuutigineqarpoq. Qinnuteqartoq attaveqallaqqissuussaaq suleqateqallaqqissuussallunilu tassungalu ilanngullugu aaqqissuussaanermi sunniuteqarluartumik, nutaaliorfiusumik ingerlatsinermillu qulakkeerinnittumik ineriartortitsinissamut attassinissamullu tulluartuunermigut erseqqissumik aqutsinissaq anguniarlugu inuttut tatitulluni sunniuteqarluarsinnaassaaq. Qinnuteqartup ulluinnarni aqutsinermini tamat soqutigisaanni tunngaviusumik naleqartitat, ammasuuneq, inatsisitigut illersugaaneq, naligiissitsineq, nalerisarsiunnginneq, kinaassusersiortuunnginneq, peqataasitsineq aammalu sinniisoqarnikkut oqartussaaqataaneq takutissinnaassavai.

Attaveqartarfissat
Naalakkersuisoqarfiup pisortaa naalakkersuisoqarfiup suliassaqarfiini taamatullu sulianut tunngatillugu ingerlatsinermi naalakkersuisoqarfimmillu ingerlatsinermi Naalakkersuisut naalakkersuinikkut anguniagaasa piviusunngortinneqartarnerat pillugu apeqqutini Aningaasaqarnermut aamma Meeqqanut, Inuusuttunut Ilaqutariinnullu Naalakkersuisumut attaveqartarpoq.
Naalakkersuisoqarfinnut allanut tunngatillugu Naalakkersuisoqarfiup suliassanik ataqatigiissaarisarneranut tunngatillugu, aamma nalinginnaasumik allaffissornikkut ingerlatsinermi anguniakkanik, malittarisassanik, periutsinik pitsaassutsinullu piumasaqaatinik il.il. malitseqartitsinissamut tunngatillugu Naalakkersuisoqarfimmi pisortaq Naalakkersuisut Siulittaasuata Naalakkersuisoqarfiani pisortamut attaveqartarpoq.
 

Atorfinitsitaanermi atugassarititaasut
Atorfik ukiuni sisamani atuuttussamik inuttalerneqassaaq piaarnerpaamik imaluunniit isumaqatigiissuteqarnikkut. Atorfik akissaateqarfimmi LR 39/40-mi maanna inissisimavoq. Akissarsiat (LR 39) aalajangersimasut ukiunut aalajangersimasunut isumaqatigiissuteqarnermut tapit ilanngullugit imatut isumaqatigiissutigineqarsimapput: 1. april 2021 qaammammut 85.016 kr. ukiumullu 1.020.200 kr. soraarnerussutissanullu tapiissutit.

Aallaaviatigut isumaqatigiissutini atugassarititaasut malillugit atorfinitsitsisoqassaaq: Qinnuteqartoq tjenestemanditut atorfeqareersimaguni Nunatsinni pisortani tjenestemandit pillugit inatsisit malillugit tjenestemandinut atugassarititaasut naapertorlugit atorfinitsinneqarsinnaavoq.

Naalagaaffimmi tjenestemandit aamma AC-mi isumaqatigiissutit arlallit, ilaatigut DJØF-ip Finansministeeriaqarfiullu akornanni isumaqatigiissutit malillugit sulisut Namminersorlutik Oqartussani atorfinitsinneqarnerminnut atatillugu aningaasarsiaqaratik sulinngiffeqarsinnaatitaapput.

Aammattaaq Nunamullu namminermut Ministeriaqarfiup Kalaallit Nunaanni Namminersorlutik Oqartussani atorfinitsitaanerminnut atatillugu akissarsiaqaratik sulinngiffeqarallarnissamik qinnuteqaateqartunut akuersaartumik pissusilersortoqassasoq kommuninut nunallu immikkoortortaanut inassutigisimavaa. Sulinngiffeqarallarnissaq pillugu aalajangersakkat Kalaallit Nunaanni Namminersorlutik Oqartussani inuit atorfinitsinneqartut uiinut nuliaanut/ aappaannut aamma atuupput.

Akissarsianut atorfeqartitaanermullu tunngasutigut piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinninniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.

Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat. Piffissap suliffiusussap sivisussusissaa aallaavittut sapaatip akunneranut nalunaaquttap akunnerinik 40-nik sivisussuseqarpoq.

Ineqarneq
Atorfimmut atatillugu sulisunut inissiamik innersuussisoqanngilaq. Qinnuteqartorli Namminersorlutik Oqartussani atorfeqarnini aqqutigalugu sulisutut ineqareersimaguni sulisunut inissiamik innersuussiffigineqarsinnaanini attatiinnassavaa. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Paasissutissat allat aamma qinnuteqarnissamut piffissaliussaq il. il.:
Naalakkersuisoqarfiup suliassai il.il. pillugit aaqqissuussaanikkut pilersaarut nassuiaallu uani takuneqarsinnaapput  https://naalakkersuisut.gl/da/Naalakkersuisut/Departementer/MIIN

Soqutiginnippit?
Atorfik pillugu apeqqutissaqaruit tikilluaqquneqarputit Flies HR-imi piginneqataasoq Dorthe Flies-ip attaviginissaanut mobil +299 583117, +45 60833117 imaluunniit dorthe@flieshr.dk atorlugit.
Qinnuteqartitsineq Flies HR-imit isumagineqarpoq, taamaattumillu attaviginninnerit tamarmik inussiarnersumik tassunga saaffiginnissutigeqquneqarput. Ataavartumik qinnuteqartut piukkunnaateqartut oqaloqatigineqartarnissaat pisassaaq.
Naalakkersuisut Siulittaasuata Naalakkersuisoqarfiani naalakkersuisut pisortaannut Hans-Peder Barlach Christensenimut apeqquteqarsinnaavutit – mail: hape@nanoq.gl.
 

 

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk