Skip to main content
122

Dette jobopslag er udløbet

Meeqqanut, Inuusuttunut, Ilaqutariinnit Inatsisillu Atuutsinneqarnerannut Naalakkersuisoqarfik AC-fuldmægtigissarsiorpoq / Immikkut siunnersortissarsiorpoq

Kalaallit Nunaanni meeqqat, inuusuttut ilaqutariillu atugarisaasa pitsanngorsaavigineqarnissaannut peqataarusuppit?

Meeqqanut, Inuusuttunut, Ilaqutariinnut Inatsisillu Atuutsinneqarnerannut naalakkersuisoqarfiup nutaap meeqqanut, inuusuttunut ilaqutariinnullu atugassarititaasut pitsanngorsaavigineqarnissaat ukkataraa, matumani suliassaqarfimmut periusissianik suliaqarneq inatsisiliornerlu ilanngullugit. Suliassaqarfimmut politikkikkut anguniakkat ilaatigut makkuupput:

  • Angajoqqaat ilanngunneqartarnerisa annertusineqarnera, matumani ilaqutariit tamarmiusut siusissukkut suliniuteqarfigineqarnerat ilanngullugu.
  • Meeqqanut suli atualersimanngitsunut suliassaqarfiup ineriartortinneqarnera, taamaalilluni meeqqat tamarmik atualernissaminnut piareersimaniassammata.
  • Inuusuttut suliffeqalernissaannut ilinniagaqalernissaannulluunniit tapersersorneqarnissaat pillugu suleqatigiinneq.
  • Pitsaaliuineq pillugu kiisalu pitsaaliuinermi suliniutinut killissarititaasut nutaat pillugit kommunit qanimut suleqatigineqarnissaannik qulakkeerinninneq

Naalakkersuisoqarfiup nutaap ilaatigut meeqqat, inuusuttut ilaqutariillu pillugit ilisimasat ataqatigiissassavai, aamma meeqqat pisinnaatitaaffiisa naammassineqarnissaat sulissutigissallugu, tassani aaqqiivigineqartariaqartunik suliassaqarpugut pingaarutilinnik.  Tamanna meeqqanut suli atualersimanngitsunut, siusissukkut suliniuteqarnernut aamma suliniutit kommuninut ataqatigiissaarneqarnerannut naleqqiullugu ilaatigut atuuppoq.  Suliassaqarfik kivitseqataaffigerusukkukku, taava immaqa Meeqqanut, Inuusuttunut, Ilaqutariinnut Inatsisillu Atuutsinneqarnerannut Naalakkersuisoqarfimmi AC-fuldmægtigitut /immikkut siunnersortitut atorfik atorfigerusussinnaavat.

Atorfik pillugu
Suliassat ilaatigut makkuninnga imaqarput:

  • Pingaarnertut meeqqanut politikkimut tunngasut suliniutit, periusissiat, suliniutit allat misissueqqissaarnerillu ineriartortinnissaat
  • Naalakkersuisut isummernissaannut tunngavissanik, allakkianik tunuliaqutaasunik, § 37 naapertorlugu apeqqutinik akissuteqarnernik il.il. suliaqarneq
  • Suliniuteqarnermi suleqatigiinni peqataaneq naalakkersuisoqarfiullu suliassaqarfiani suliniuteqarnermi suleqatigiinni suliassanut atatillugu ataqatigiissaarinermik suliaqarneq
  • Oqalugiaatissanik suliaqarneq tusagassiortunullu nalunaarutiliorneq kiisalu suliffimmi namminermi avammullu attaveqaqateqartarnerni periutsit allat atorlugit attaveqaqateqarneq
  • Naalakkersuisoqarfimmi immikkoortut akornanni sulisaatsinik suleriaatsinillu suliaqarneq ataqatigiissaarinerlu
  • Inatsisissat piareersarneqarneranni peqataaneq, immaqalu aningaasanut inatsisissamik, missingersuutit malitseqartinneqarnerannik il.il. suliaqarnermi peqataaneq


Suliassat tamatigoortuupput oqaatsinut- suliannullu tunngasunut killissat akornanni suleqatiginnissiinnaanermik piumasaqarfiusut, kiisalu nammineq suliassanut namminerlu suliniutigisanut nammineerluni akisussaaffimmik tigusisinnaanermut piumasaqarfiullutik.  Suliassanut nutaanut sukkasuumik paasisimasaqalernissamik allanngorarsinnaassuseqarnissamillu, kiisalu ilaatigut suliassat annikikkaluartut annertugaluartulluunniit aporaaffigisaanni piffissallu ilaanni ulluinnarni ulapiffiusartumi suliffeqarfimmi sulinermi nuannarinnissinnaanermik atorfik piumasaqarfiuvoq. 
 
Taamaammat suleqatikkuminartuunissat iluaqutaassaaq.  Suliffeqarfimmi politikkikkut aqunneqartumi sulinissat soqutigisarissavat, tassani sulinerup sukkassusia amerlanertigut sukkasoorujussuusinnaasarpoq tunniussinissamullu piffissat sivikitsuinnaasinnaasarlutik.  Apuukkusutanik allakkatigut oqaatsitigullu siammarterisinnaaneq pikkoriffigigukku iluaqutaassaaq, ataqatigiinnerillu paasiuminaassinnaasut paasisinnaanissaannut piginnaaneqarnerit iluaqutaassalluni.
  

Illit pillutit

  • Kandidatitut naleqquttumik ilinniagaqassaatit
  • Isumaginninnermi suliassaqarfik pillugu atuagarsornikkut sulianullu atasumik ilisimasaqarnerit kissaatiginarpoq, kisianni piumasaqaataanngilaq
  • Suliniutit- allanngoriartornerillu pillugit suliaqarnermik misilittagaqarputit, aamma suliniutinik aqutsinermik misilittagaqarsinnaavutit
  • Nammineerlutit namminersortumik, aaqqissugaasumik ineriartortitsinermik sammivilimmik sulisinnaavutit
  • Allakkatigut oqaatsitigullu attaveqaqateqarsinnaaneq pikkoriffigivat
  • Paasissutissat amerlasuut paasiuminaassinnaasullu pillugit ataatsimut isiginnissinnaaneq pilersissinnaavat
  • Suleqatinik avataaniillu soqutiginnitsinik suleqatiginnilluarsinnaavutit
  • Kalaallit Nunaanni inuiaqatigiit pillugit pissutsit kulturilu pillugu ilisimasaqarneq iluaqutaavoq
  • Marluinnik oqaaseqartuusinnaavutit, piumasaqaataanngilarli

Meeqqanut, Inuusuttunut, Ilaqutariinnut Inatsisinillu Atuutsitsinermut Naalakkersuisoqarfik pillugu
Meeqqanut, Inuusuttunut, Ilaqutariinnut Inatsisillu Atuutsinneqarnerannut Naalakkersuisoqarfimmi sulisut 18 missaaniippugut, taakkulu Aqutsisut allattoqarfiannut, Periusissanut ineriartortitsinermullu immikkoortortaqarfimmut Inatsisillu Atuutsinneqarnerannut immikkoortortaqarfimmut agguarneqarsimapput, atorfillu una Periusissanut ineriartortitsinermullu immikkoortortaqarfimmi tunngavissinneqarpoq.   Taakkua saniatigut Isumaginninnermut Aqutsisoqarfik naalakkersuisoqarfiup ataaniippoq.

Qinnuteqarneq
Ulloq 28. juni 2021 Kalaallit Nunaanni nalunaaqutaq malillugu nalunaaqutaq 12.00 kingusinnerpaamik qinnuteqartoqassaaq.
Aallartiffissaq tassaavoq 1. august 2021 imaluunniit isumaqatigiissuteqarneq malillugu pisinnaalluni.

Paasissutissat amerlanerusut
Atorfik pillugu imaluunniit naalakkersuisoqarfik pillugu paasisaqarnerorusukkuit, immikkoortumi pisortaq Ditte Enemark Sølbeck e-mailikkut ditt@nanoq.gl imaluunniit oqarasuaatikkut +299 26 49 95-ikkut attaviginissaanut tikilluaqqusaavutit.
 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput. Qinnuteqartoq eqqortunik uppernarsarneqarsinnaasunik piginnaasaqarpat immikkut ittumik siunnersortitut atorfik neqeroorutigineqarsinnaavoq.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk