Skip to main content
117

Dette jobopslag er udløbet

Kisitsisinik oqaasertalersuisinnaavit oqaatsinillu kisitsisitalersuisinnaallutit?

Misissueqqissaarnermi piginnaasanik atorluarneqarsinnaasunik, aningaasaqarnikkut ilisimasanik kisitsisilerinermillu piginnaasaqarluarnermik tapeeqataasinnaavit? Avatangiisini suliat akimorlugit nammineerlutit sulisinnaassuseqarlutit suliamik ilisimasaqarluartuuit? Taamaassimappat Isumaqatigiissutinut isumalioqatigiissitap allattoqarfiata akademikeritut suleqatissatut illit ujartorpaatit.

Atorfik pillugu
Isumaqatigiissutinut isumalioqatigiissitaq 2020-mi pilersinneqarpoq. Isumaqatigiissitaliap siunertarisaa pingaarneq tassaavoq Kalaallit Nunaanni isumaqatigiissuteqariaatsip atuuttup nutarterneqarnissaa pisariillisarneqarnissaalu. Isumaqatigiissitaq allattoqarfeqarpoq isumalioqatigiissitap suliaanik ikiuuttartumik. Tassani sulianik ilisimasaqarfiusumik avatangiiseqarluni ulluinnarnilu tamatigoortunik suliaqarfiusumi atorfik pissanganartoq unammillernartorlu neqeroorutigineqarpoq, tamatumani suliap pitsaassusissaa assut pingaartinneqarluni. Suliatigut inuttullu misilittaanissamut periarfissaqarluartinneqassaatit aammalu isumalioqatigiissitami taassumalu avataani attaveqatigiinni tamatigoortuni peqataassallutit. Allattoqarfimmi suleqatitut pingaarnertut suliassatit tassaassapput aningaasaqarnikkut namminersortumik misissueqqissaarneq, soorlu assersuutigalugu kingunerisassanik assigiinngitsunik naatsorsuinerit, akissarsiat ineriartornerinik misissueqqissaarnerit, isumaqatigiissutit nunalu tamakkerlugu aningaasaqarnerup akornanni ataqatigiinnerit il.il.

Suliassatit
Suliassat isumalioqatigiissitap pisariaqartitai apeqqutaatillugit allanngorartuussapput nalinginnaasumillu makkununnga attuumassuteqassallutik:

  • Isumalioqatigiissitap aningaasaqarnikkut misissueqqissaarnernik pisariaqartitaanik suussusersisarneq
  • Paasissutissanik katersineq sulissutiginninnerlu
  • Kisitsinik oqaasinngortitsineq – akerlianullu
  • Isumaqatigiissutinut suliassaqarfimmi aningaasaqarnikkut misissueqqissaarinernik kingunerisassanillu naatsorsuinernik suliaqarneq
  • Allattoqarfimmi immikkullu ilisimasalinnik allattoqarfimmut atatinneqartunik suliatigut avitseqatigiinneq
  • Isumaqatigiissutinut isumalioqatigiissitap suliaanik ataqatigiissaarinermut ikiuunneq
  • Isumaqatigiissutinut isumalioqatigiissitap sullinneqarneranut ikiuunneq


Neriuppugut matuma kinguliani allassimasut amerlanerpaartaat piginnaasaqarfigissagitit:

  • Nammineersinnaassuseqarneq, nutaaliorsinnaaneq nipituumillu eqqarsarnissamut sapiissuseqarneq
  • Aningaasaqarneq pingaarnertut sammisaralugu inuiaqatigiilerinermik ilisimatusarnermik naleqquttumik naammassineqarsimasumillu ilinniagaqarneq
  • Isumaqatigiissutinut suliassaqarfimmik ilisimasaqarneq kissaatiginarlunilu tamatumani sulinermik misilittagaqarneq
  • Kalaallit Nunaanni inuiaqatigiinnik, oqaatsinik inuiaqatigiinnilu pissutsinnik ilisimasaqarneq
  • Allatanik oqalunnikkullu ingerlatitseqqissinnaassuseqarluarneq
  • Misissueqqissaarinermik ilisimasaqarluarneq kissaatiginarlunilu qarasaasiatigut misissueqqissaarinermi atortunik attuumassuteqartunik misilittagaqarnissaq
  • Paasisaqarususseqarneq, aaqqissuussisinnaaneq ilusilersuisinnaanerlu


Neqeroorutigaagut:

  • Atorfik pissanganartoq akisussaaffeqarfiulluartorlu
  • Isumaqatigiissutinut suliassaqarfimmi suliani allannguutaasussani peqataaneq
  • Isumalioqatigiissitap sulinerani akimut suliatigullu pingaarutilimmik inissisimaneq
  • Pingaarnertut anguniakkap iluani annertuumik sunniuteqarsinnaaneq
  • Isumalioqatigiissitami naalakkersuisoqarfimmilu persuarsiortuunnginneq


Uagut pilluta
Allattoqarfik aaqqissuussaanikkut Aningaasaqarnermut Naalakkersuisoqarfimmi inissisimavoq, tassani allattoqarfik inissisimalluni. Taamaattumillu suliffeqarfik tassaassaaq Nuuk. Allattoqarfiup suliat pillugit attaveqarfigisarpai suleqatigiissitap siulittaasua siulittaasuatalu tullia. Ulluinnarni allattoqarfimmi pisortamut attaveqassaatit. Isumalioqatigiissitamik sullissineq suliaanillu ataqatigiissaarineq pingaarnertut suliaraagut. Isumalioqatigiissitap suliassaqarfia nutaajuvoq, taamaattumillu allattoqarfimmi nutaanik aallartitsinissamut piginnaassuseqarlunilu piumassuseqarnissaq pisariaqarluni.

Paasissutissat annertunerusut
Atorfik pillugu paasissutissat erseqqinnerusut allattoqarfimmi pisortamut Rikke Frederiksen, tlf. +299 345119 imaluunniit e-mail rifr@nanoq.gl saaffiginninnikkut pissarsiarineqarsinnaapput.
Namminersorlutik Oqartussat Isumalioqatigiissitarlu pillugit paasissutissat erseqqinnerusut uani takuneqarsinnaapput www.naalakkersuisut.gl.

Qinnuteqaat
Qinnuteqarnissamut killissaritinneqarpoq ulloq 18. juni 2021 nal. 12:00.
Ulloq 1. august 2021-mi tamatumaluunniit kingorna sapinngisamik piaartumik sulilernissaq siunertaralugu atorfinitsitsinissaq pillugu oqaloqatigiinnerit sapaatip akunnerani 25-mi ingerlanneqassapput.
Inuunermit taasassat soraarummeernermillu uppernarsaatit, tassunga ilanngullugit ilinniarnermit tamarmiusumit angusat allattorsimaffiisa nuutinnerat kiisalu attaveqarfissat attuumassuteqartut qinnuteqaammut ilannguteqquneqarput.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput. 
Piffissaq suliffiusoq sapaatip akunneranut 40 tiimiuvoq. Piffissaq atorfeqarfissaq killiligaq qaammatinik arfinilinnik sivisussusilik sivitsorneqarnissamullu periarfissalik pineqarpoq.

Qinnuteqartunut naammaginartumik naapertuuttumillu misilittagalinnut atatillugu immikkut siunnersortitut siunnersortilluunniit pisortaattut atorfinitsinneqarnissamut periarfissaqassaaq.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk