Skip to main content
76

Katersugaasivilerisoq

Katersugaasivilerisoq, kulturikkut kingornussarsiat tigussaanngitsut

Nunatta Katersugaasiviani Allagaateqarfianilu (NKA) katersugaasivilerisutut atorfik 1. februar 2020-imi inuttalerneqartussanngorlugu matumuuna inuttassarsiorneqarpoq. Katersugaasivilerisup susassaqarfiini pingaarnersat ilagissavaat kulturikkut kingornussarsiat tigussaanngitsut suliaqarfigissallugit.

NKA-p kulturikkut eriagisassat tigussaanngitsut illersorneqarnissaat akisussaaffigaa. Katersugaasivilerisup immikkut suliassaqarfigaa NKA-p Nunattalu soqutigisaat UNESCO-mullu pisussaaffii suliarissallugit. Suliassat ilagaat ileqqut kulturikkullu eriagisassat Nunatsinni ingerlanneqartut malinnaaffigissallugit, taamatullu inuit ataasiakkaat, inuiaqatigiit soqutigisaqaqatigiillu allat peqatigalugit ileqqut, suliniutit allannguutillu ingerlaavartumik allattaavinnut nalunaarsortassallugit.

Tamatuma saniatigut katersugaasivilerisup NKA-mi katersugaasivilerisut allat suleqatigilluinnarlugit suliaqarfimmini siunniussat periusissallu allat pilersaarusiorneqarnissaat akisussaaffiinut ilaassapput. Katersugaasivilerisup suliaminik aaqqissuussinermigut NKA-milu inspektørinik allanik suleqateqarnermigut Inatsisartut katersugaasiveqarnermik peqqussutaanni siunertaasoq naammassiniassavaa.

Katersugaasivilerisutut atorfik piffissaq tamakkerlugu atorfiuvoq akissarsiaqartitaalluni atorfeqartitaallunilu  atorfiniffiup nalaani Namminersornerullutik Oqartussat Dansk Magisterforeningillu akornanni Kalaallit Nunanni ilinniagartuut pillugit isumaqatigiissutaat atuuttut naapertorlugit. Atorfinitsitaanermut atatillugu inissaqartitsisoqanngilaq.

Atorfik pillugu annertunerusumik paasisaqarusukkuit pisortaq Daniel Thorleifsen attaveqarfigisinnaavat oqarasuaat 342201 sianerfigalugu.

Qinnuteqaat ilinniagaqarsimanermik siusinnerusukkullu naleqquttunik suliaqarsimanermik paasissutissiisoq soraarummeeruteqarsimanermut uppernarsaatit kopiivinik allanillu ilaqartinneqartoq nassiunneqassaaq kingusinnerpaamik 7. januar 2020.

 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk