Skip to main content
110

Dette jobopslag er udløbet

Kalaallit Nunaanni Uumasut Nakorsaqarfik Inuussutissalerinermullu Oqartussaaffik Uumasut nakorsaattut atorfinittussamik pissarsiorput

Uumasut nakorsaattut piginnaasatit tamakkiisumik atortarusuppigit, suliassanillu assigiinngitsunik anguniagaqarfiusumik nammineerlutillu sulisarusuppit - taamaappat Nunatsinni pinngortitami kusanarluinnartumi atorfimmik pissanganartumik neqeroorfigisinnaavatsigit.
 
Atorfik pillugu:
Kalaallit Nunaanni Uumasut Nakorsaqarfik Inuussutissalerinermullu Oqartussaaffik (UNIO) Kalaallit Nunaat tamakkerlugu uumasunut nakorsaqarnermut inuussutissalerinermullu tunngasut tamaasa akisussaaffigai. Uumasunut nakorsaattut tamakkuninnga suliaqartartut ilagilissavatit ulluinnarni suliassavit saniatigut UNIO-p nutaamik ingerlanneqarsinnaaneranut siunissarlu ungasinnerusoq eqqarsaatigalugu ineriartortinneqarnissaanut peqataassaatit.
Atorfik Kalaallit Nunaanni qimuttut perlerornerata saniatigut qimuttut nappaataannut navianartunut parvovirusimullu akiuussutissanik kapuisarnissamut suliniummut annerpaamut annertuumik sammiveqassaaq. Qimuttunik qimmiiteqarnermut atatillugu uumasunik illersuinermut suliassat  aamma upalungaarneq nalinginnaasumik annerussapput.
Uumasut Nakorsaqarfia Inuussutissalerinermullu Oqartussaaffimmi uumasut Nakorsaanermut Nuummi inissisimasumi ulluinnarni attaveqartassaatit.
 
UNIO massakkut uumasut nakorsaannik 4-nik aalajangersimasunik, uumasut nakorsaannik pingaunik piffissap ilaani sulisartunik nakkutilliisartunillu inuussutissalerinermut sulianik misilittagaqartunik marlunnik sulisoqarpoq.
Aaqqissugaaneq eqqarsaatigalugu Kalaallit Nunaanni sumiiffinni assigiinngitsuni pingasuni agguarneqarluta inissisimavugut. Uumasut nakorsaat ataaseq Ilulissani atorfeqarpoq qimmit qimuttuunerusunut uumasunillu illersuinermut tunngasunik oqartussaaffimmilu suliassaanik allanik suliaqartarluni. Uumasut nakorsaat ataaseq marts 2018-imi Qaqortumi inissisimavoq tassanilu uumasuuteqarnermut tunngatillugu siunnersuisarneq pingaarnertut suliassaralugu, inuussutissaleriffinnik nakkutilliiartortarnerit siunnersuisarnerillu, toqoraavinni nakkutilliisarnerit oqartussaaffimmilu suliassaanik allanik suliaqartarluni. 
UNIO-mi sulisut allat Nuummi inissisimapput naalakkersuisumik innuttaasunillu sullissineq, nakkutilliiartortarnerit aammalu oqartussatut suliassanik allanik pingaarnertut suliaqartarlutik soorlu inuussutissaleriffinnik nakkutilliiartortarnerit siunnersuisarnerit killeqarfinnilu nakkutilliinerit.
 
Uumasut nakorsaattut atorfinittusatut ulluinnarni suliassavit pilersaarusiorsinnaanissaanut ingerlassinnaanissaanullu piginnaasaqassaatit.  UNIO suliffeqarfiuvoq anginngitsoq eqeersimaarfiusorlu suliassallu soorunalumi sulisut akornanni suleqatigiissutigalugit naammassineqartariaqartartut ingerlaavartumik takkussuuttarput. Tamakkulu periarfissarititaasut naalakkersuinikkullu pingaarnersiuisimanerit aallaavigalugit suliarineqartarput.
 
Aallaqqaasiutigalugu Nuummi inissisimalissaatit ulluinnarnilu suliassat UNIO-mi ingerlanneqartartunut peqataassallutit.
 
Akisussaaffiit:

  • Qimmit nappaataannut parvovirusimullu aamma perlerornermut akiuussutissanik kapuisarnissamut pilersaarutit ingerlannissaat, kommuniniit akuerisatut akiuussutissanik kapuuisinnaanissaannik pikkorissaanerit taakkununnga ilaallutik.
  • Inuussutissalerinermut tunngatillugu nakkutilliiartortarneq siunnersuisarneq suliassanillu isumaginnittarneq.
  • Uumasut illersorneqarnissaat aammalu uumasut nappaataanut inunnut tunillaassorsinnaasunut tunngatillugu nakkutilliiartortarnerit siunnersuisarneri suliassanillu isumaginnittarnerit.
  • Danmark-mi Fødevarestyrelsen-imik isumaqatigiissuteqarnermut atatillugu suliassat, taakkununnga ilaallutik:
    • EU Border Inspection Post-imi suliniutini uumasunut nakorsaqarneq, tassunga atatillugu killeqarfinni nakkutilliineq.
    • Peqqissutsimut uppernarsaatinik tunniussisarnerit il.il..
  • Innutaasunik sullissineq tassunga ilanngullugit uumasunik, inuussutissanik uumasunillu tammajuitsussanik nunatsinnut eqqussisarnermut nunatsinnillu annissisarnermullu tunngatillugu siunnersuisarneq.
  • Toqoraavinni nakkutilliineq, tassunga ilanngullugu toqoraavinni nakkutilliinernit aaqqiinernik pitsaassusaannik misissuisoqartarneq.
  • Kalaallit Nunaanni uumasunut nakorsaqarnermut tunngatillugu suliassat eqqarsaatigalugit tamakku inatsisiliuunneqarlutillu maleruagassiuunneqarnissaanut suleqataaneq.
  • Naalakkersuisunik sullissineq.


Ilinnut tunngasut:
Uumasut nakorsaatut (Cand.med.vet) ilinniagaqarsimassaatit Danmark-imiit allagartaqarlutit.
 
Suliffik nuannaralugu suliffigisinnaassagukku makku pingaaruteqarput:

  • Suliassavit annertuumik UNIO-p digitali-mik inernerinik imaqassagami (soorlu qimminik piginnittut, qimmit qimmillu akiuussusersoneqarneri database-mut allattuiffik) IT-mut tunngasunut paasinnillaqqissuseqarnissat.
  • tamakkiisumik isiginnissinnaassuseqarnissat, aaqqissuusamik sulisinnaassuseqarnissat suliassannillu pilersaarusiorluarsinnaassuseqarnissat.
  • suleqatinik, innuttaasunik oqartussanillu allanik suleqateqarluarsinnaassuseqarnissat.
  • najukkami inuussutissarsiutitik aqqutigalugu soqutigisaqartut inuttut attavigilluarsinnaanissaasa pingaaruteqassusaa paasillugulu pingaartissavat.
  • nammineerluni sulisinnaassuseqarnermik nuannarisaqassaatit pisuni ilungersunartorsiorfiusuni eqqarsarluarsinnaassuseqassallutillu.
  • Oqartussat aqutsiveqarfiani ajornanngippallu uumasut nakorsaqarfimmi inuussutissalerinermilluunniiit suliaqarnermik misilittagaqassaatit. 
  • Kalaallit Nunaanni Uumasunut Nakorsaqarfik Inuussutissalerinermullu Oqartussaqarfimmi ineriartortitseqqinnermi toqqaanartumik isumassarsiortartullu peqataatinneqassaatit.
  • Allattariarsornikkut oqaatsitigullu paasiuminarsaallaqqissuussaatit.
  • Arlalinnik oqaaseqartuusaatit. Allaffimmi ulluinnarni sulinermi danskisut oqaluttoqartarpoq annikitsumillu tuluit oqaasii atorneqartarlutik.  Kalaallisut oqalussinnaallutillu allassinnaaguit iluaqutaalluassaaq.

Neriuppugut nuannaartuussasutit immikkoortortaqarfimmilu immitsinnut ungasilluta suliffigisatsinni taamaattorli immitsinnut pisariaqartitsiffiusumi suliassallu naammassineqarnissaat anguniarlugu suleqatigiiffiusartumi persuarsiorfiunngitsumik nuannersumillu oqaluffiusartumi sulisinnaassuseqassasutit.
 
Kalaallit Nunaanni pinngortitarsuaq alutornarluinnartuuvoq silamilu nammineerluni sammisassarsiornissamut periarfissaqarluarluni. Kalaallit Nunaata avataaniit qinnuteqartunut tunngatillugu sungiusimasamit allaasumit kulturikkut piumasaqaateqarfiusumi sulinissamut piginnaaneqarneq, piumassuseqarneq kajumissuseqarnerlu pingaaruteqarpoq. Malugiuk Kalaallit Nunaanni nammineerluni angalaqattaartarnissaq atorfimmut ilaammat taamaattumillu kulturimi atuuttumi naleqqussarnissannut sapiissuseqarnissat pisariaqarpoq.
 
Nuuk 18.000-nik innuttaqartoq Kalaallit Nunaanni Kommuneqarfik Sermersuumilu illoqarfiit annersaraat nunatsinnilu illoqarfinni pingaarnersaalluni.
 


Paasissutissat allat
Atorfik pillugu sukumiinerusumik paasisaqarusukkuit uumasut nakorssaanermut Egill Steingrimsson oqarasuaat +299 345323 / +299 550686 imaluunniit allagaqarlutit uunga uumasut@nanoq.gl attaviginissaanut tikilluaqqusaavutit.
Eqqaamajuk Nunatta Danmarkillu akornanni akunnernik sisamanik nikingassuteqarmat.
Kalaallit Nunaat Namminersorlutillu Oqartussat annerusumik paasisassarsiorfiginiarukkit uani takukkit www.sullissivik.gl aamma www.naalakkersuisut.gl
Kalaallit Nunaanni kalaallit oqaasii pingaarnersaapput. Kissaatigineqarpat piffissap suliffiusussatut aalajangigaareersup isumaqatigiissutaasimasup iluani kalaallisut ilinniartitsinissaq neqeroorutigineqarsinnaavoq.

Qinnuteqaat
Qinnuteqaat naalakkersuisoqarfiup tigoreersimassavaa kingusinnerpaamik ulloq 26. juli 2019.
Atorfinitsitsinissamut oqaloqatiginnissat attaveqaatit atorlugit ingerlaartumik sapaatit akunnerani 33-mi 2019 ilanngullugu tungaanut pissapput.
Atorfinittoqassaaq 1. september 2019 piaartumilluunniit kingorna.
Qinnuteqaammut ilinniakkanut uppernarsaatit attuumassuteqartut nuutinneri ilanngullugit kiisalu siusinnerusukkut suliffigisimasanit oqaaseqaatit qinnutigineqassapput ataani ataani iserfigisassakkut nassiunneqassapput.
"Atorfik maanna qinnuteqarfigiuk"
 
Kalaallit Nunaanni Namminersorlutik Oqartussat pillugit nalinginnaasumik paasissutissat.
Kalaallit Nunaanni Namminersorneq ulloq 21. juni 2009-mi atuutilerpoq. Namminersorlutik Oqartussat tassaapput Qitiusumik Allattoqarfik (QA), 650-it missaanik sulisulik naalakkersuisoqarfinnut qulingiluanut aqutsisoqarfinnullu arlalinnut agguataarsimasoq. Katilluta inuit 2500-t sinnerlugit Namminersorlutik Oqartussanut atassuteqarpugut.
Qitiusumik Allattoqarfimmi suliassarput pingaarnerpaaq tassaavoq, Naalakkersuisut (Naalakkersuisoqarfiit) aalajangernissaannut tutsuiginartumik tunngavissinnissaat aalajangikkallu piviusunngortinnissaat. Suliniuteqarfinnut tunngasutigut pingaartigaarlugu salliutitaq tassa, pisortat sullissineranni innuttaasunik qanimut suleqateqarnissap sanarfinerani, innuttatsinnut 56.000-iusunut tamanut annguttussamik siuttuunissarput.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk