Peqqinnissaqarfimmi, innuttaaqatitsinnik napparsimasunik misissuillutalu nakorsaallutalu piginnaanngorsaaqqiillutalu paaqqutarinnittarpugut. Nunatsinni innuttaasunik kiffartuussinissaq neqeroorutitsinnillu qulakkeerinissaq inerisaanissarlu qitiutippagut.
Attaveqatigiinnermi siunnersortimik pikkorissumik, suliami tamatumani Peqqinnissaqarfimmik ikorfartuisinnaasumik pissarsiorpugut. Qullersanut Sulisoqarnermullu Allatseqarfimmi, suleqatit pimoorussisut peqatigalugit, Peqqinnissaqarfimmi qulleranik Peqqinnissaqarfimmilu pisortanik allanik sulisunillu suleqateqassaatit.

Ulluinnaat eqeersimaarfiusut, unammilligassallit tamatigoortunillu suliassallit 
Peqqinnissaqarfimmi attaveqatigiinnermut siunnersortaaneq tamatigoortuuvoq. Ilaanni Peqqinnissaqarfimmi qullersat qanimut suleqatigalugit tusagassiorfinnut ersarissunik nalunaarusiussaatit, aqagukkut oqariartuutinik pingaarutilinnik, isikkumikkut oqaatsitigullu eqqarsaatigilluakkanik siammarterinissamut, sumiiffinni aqutsisunik tapersersuissaasit.

Pingaarnertut akisussaaffigisassatit tassaapput:

• Peqqinnissaqarfiup ilumini tusagassiivia D4 Infonet aqqutigalugu, Peqqinnissaqarfimmi sulisunut attaveqarneq
• Peqqik.gl imik ingerlatsineq inerisaanerlu
• Facebookimi quppernermik”Kalaallit Nunaanni Peqqinnissaqarfik - Det Grønlandske Sundhedsvæsen” nutarterineq attassiinnarnerlu, kiisalu inuit akunnerminni attaveqatigiittarfiini Peqqinnissaqarfiup ilisarnaataanut allanut tunngatillugu siunnersuineq ilitsersuinerlu
• Peqqinnissaqarfimmi qullersat pingaarutilimmillu inissisimasut suleqatigalugit, tusagassiorfinnit oqaluttuanik malitseqartitsineq tusagassiorfinnullu nalunaarusiorneq
• Unnuk kulturisiorfimmik- ilutsinni avataanilu pisussanillu allanik ataqatigiissaarineq

Tamakku saniatigut immikkoortumi suliassat allat ingerlanneqarneranni, pisariarqartitsineq naapertorlugu, peqataassaatittaaq.

Ilisarnaatitit

• Attaveqatigiinnermut qaffasissumik ilinniagaqarputit imal. tusagassiortutut ilinniarsimallutit. Naammasserlaajusinnaavutit, ilinniakkannut naapertuuttumik attaveqatigiinnermut tunngasumik suliffeqarsimanikkut misilittagalik.
• Allakkatigut oqaatsitigullu oqaasiliullaqqissuussaatit attaveqatigiinnermilu iliuusissatut siunniussap eqqarsaatiginissaanik ilisimaarinnillutit.
• Attaveqatigiinnermi periarfissat assigiinngitsut eqqumaffigilluarpatit nangaassuteqarnallu oqariartuutinnik saaffiginiakkanut assigiinngitsunut ingerlatitseqqiisinnaallutit.
• Suliffeqarfimmi politikkikkut aqutami sulisinnaavutit attaveqatigiinnerlu, soqutigisat assigiinngitsorpassuit akornanni, oqimaaqatigiissaarsinnaallugu
• Alapernaatsuuvutit assigiinngitsullu ilisimasaqarfigalugit. Suliassat nalinginnaat suliassallu itisilerlugit paasiniagassat nunannarisaraatit.
• Namminersorfiusumik paasiniaaviusumillu suliffeqarneq nalerisimaarnaraat. Suliat paasilertoquminaatsunut oqaluuserisanullu ilanngullugit eqqarsaatiginissaat, taamaakkaluarlu kinguneqarluartumik aalajangiisinnaaneq piginnaaneqarfigaat.

Piginnaasat allat
Office-pakkip saniatigut qarasaasiakkut sullissisutinik allanik soorlu Sitecore, Photoshop, InDesign aamma Adobe Illustrator ilisimasaqarfiginerat iluaqutaassaaq.

Kikkuuvugut?
Peqqinnissaqarfik aaqqissuussaanikkut Peqqissutsimut Pitsaaliuinermullu Aqutsisoqarfiup ataani inissisimasoq, arfinilinnik makkuusunik qullersanut siunnersuisarfeqarpoq; Qarasaasiarsorneq Digitalinngorsaanerlu, Kiffartuussineq Ilutsinni, Illuutit Sanaartukkallu, Aningaasaqarneq, Napparsimasut Aqqusaartugassaannik Ataqatigiissaarineq kiisalu Qullersanut Allatseqarfik Sulisoqarnerlu. Kingullermi illit suleqataalissaatit.
Qullersanut allatseqarfik Sulisoqarnerlu Kalaallit Nunaanni Peqqinnissaqarfimmi qullersanut, kiisalu Napparsimmavissuarmi sinerissamilu qitiusumik immikkoortuni pisortanut siunnersuisarfiuvoq. Tamatuma saniatigut attaveqatigiinnermut, napparsimasut maalaarutaannut- napparsimasunik siunnersuinermut, sullivimmi avatangiisinut, piginnaasatigut inerisaanermut kiisalu sulisussarsiniarnermut sulilerlaanillu tikilluaqqusinermut tunngasut immikkoortortami isumagineqarput. Illit aqutsisunik kiffartuussinermut attaveqatigiinnermullu tunngatillugu suleqatigiinnut ilaalissaatit.

Immikkoortortami ilinniagaqassutsikkut inuttullu ataatsimoorneq nukittooq pingaartitaraagut, taamaammallu ilinniagaqassuseq, akisussaassuseq, ilisimasanik avitseqatigiinnik qiimanerlu pingaartitaralugit. Suliffeqarfimmi –oqaatsitigut ilinniakkatigullu assigiinngitsunik kulturilimmi sulilissaatit.

Paasissutissat sukumiinerusut:
Taartaaffissaq suliassartaalu pillugit paasissutissat itisiliivigitinniarlugit qullersanut siunnersuisarfimmi pisortamut Lene Marie Halgreenimut oqarasuaatikkut: +299 23 08 46 imal. mailikkut: lemh@peqqik.glattaveqarsinnaavutit.

Qaammatit pingasut siulliit misilitsiffiussapput.
Sulilerfissaq: Piaarnerpaamik
Sivisussusaa: Ukiup ataatsip missaa 
 
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

Qinnuteqaat nassiuguk