Skip to main content
91

Dette jobopslag er udløbet

Kalaallit Nunaanni Namminersorlutik Oqartussat Kalaallit Nunaanni Aalisarsinnaanermut Akuersissutinik Nakkutilliisoqarfimmut allaffissornikkut pisortassarsiorpoq

Kalaallit Nunaanni Aalisarsinnaanermut Akuersissutinik Nakkutilliisoqarfik allaffissornikkut pisortassarsiorpoq, sullissisinnaasoq, allanngortiterinermik aqutsinissamut piumassusilik, nutaaliornissamut sapinngitsoq iluarsiissutissanillu nassaassarsiorsinnaasoq.

Suliassat

  • Sulisoqarnermut akisussaasoq, tassani ilanngullugit atorfinitsitsineq, soraarsitsineq, tapit, atorfimmik qaffassarneq, suleqatit ineriartornissaat pillugit oqaloqatiginninnerit, pikkorissarnerit ilinniaqqinnerillu, sulinermi piffissamik nalunaarsuineq, ilitsersuutinik suliaqarneq, isumannaallisaanermut aqutsineq, sulinngiffeqarneq angalanerillu.
  • Aningaasaqarnermik aqutsinermi akisussaasoq, tassani ilanngullugit aningaasaqarnermut inatsisiliornermut peqataaneq missingersuutillu, akiligassat, qaammammut naatsorsuutit, kontunik naligiissaarineq, angalanermi naatsorsuutit.
  • Aalisarnermik piniarnermillu nakkutilliisutut ilinniartitaanermut akisussaasoq.
  • Illut, allaffiit, angallatit, qamutit motoorillit il.il. kiisalu atortussat sulinermilu atisat pillugit akisussaasoq.
  • Aalisarnermi nakkutilliineq inatsisillu pillugit malittarisassiornermi allannguutissatut siunnersuusiornermi peqataaneq, nunat tamat akornanni pisussaaffiit tulluarsarlugit ilanngunneqarneri aamma nunat allat aalisarneq pillugu killilersuinerannik ineriartornermut malitseqartitsineq.
  • Allaffissornermi pisortaq aqutsisunut ilaavoq immikkoortunilu marlunni pisortat peqatigalugit aalisarnermik nakkutilliisoqarnermi inspektørimut taartaasassalluni.


Piginnaasat
Inummik naleqquttumik ilinniagaqartumik sulisussarsiorpugut, ilaatigut

  • Aqutsinermik misilittakkat uppernarsaatillit.
  • Kalaallit Nunaanni Namminersorlutik Oqartussani aqutsinermik misilittagaqarneq iluaqutaassaaq.
  • Namminersorlutik Oqartussani aningaasaqarnikkut aaqqissuussaamut ilisimasaqarneq iluaqutaassaaq.
  • Aalisarnermik nakkutilliinermut ilisimasaqarneq iluaqutaassaaq.
  • Aalisarneq aalisarnermilu atortut il.il. pillugit ilisimasaqarneq iluaqutaassaaq.
  • Aaqqissuussaalluartumik, misissueqqissaarsinnaasumik pilersaarusiullaqqissumillu sulinissamut piginnaasalik.
  • Piumasaqaataavoq suleqatikkuminartuunissaq, aalisarneq pillugu suliassat amerlanertigut suliffiup iluani, avataani nunallu tamat akornanni sammiviit akimorlugit ingerlanneqartarmata.


Naatsorsuutigaarput, illit:

  • pasinnittuullutit tusarnaarsinnaallutillu aqutsisinnaasutit.
  • aaqqiagiinngissutinik paasiniaasinnaasutit iluarsiisinnaasutillu.
  • akisussaassuseqartutit, sulilluarsinnaasutit, ikiuisinnaasutit sullissisinnaasutillu.
  • tatiginartumik kinguneqarluartumillu sulianik ingerlatsisinnaasutit.
  • politikkikkut aqunneqartumi sulinissamut piareersimasutit.
  • kalaallisut, qallunaatut tuluttullu oqalussinnaasutit allassinnaasutillu.


Aamma kissaatigaarput illit:
Inuiaqatigiinnut kalaallinut ilisimasaqartutit inuiaqatigiinnilu pissutsinut paasisimasaqartutit
persuarsiorani tutsuiginartumili sulinissamik kissaateqartutit.

KANUAANA
Kalaallit Nunaanni Aalisarsinnaanermut Akuersissutinik Nakkutilliisoqarfik (KANUAANA) Kalaallit Nunaanni aalisarneq, piniarneq aallaaniarnerlu alapernaarsuinermik, nakkutilliinermik misissuinermillu isumaginnittuuvoq. KANUAANA-p pingaarnertut anguniagaraa Kalaallit Nunaanni Namminersorlutik Oqartussat aalisarneq piniarnerlu pillugit inatsisaat eqquutsinneqarnissaa qulakkiissallugu, tassani ilanngullugit illugiilluni aalisarneq pillugu isumaqatigiissutit naapertorlugit malittarisassat atulersinneqartut imaluunniit Kalaallit Nunaata nunat tamat akornanni kattuffinnut peqataanera naapertorlugu imaluunniit aalisarneq pillugu nunat tamat akornanni isumaqatigiissutit akuersissutigineqarnissaat. Aalisarnermut, Piniarnermut Nunalerinermullu Naalakkersuisoqarfik qanimut suleqatigalugu sulineq ingerlanneqarpoq.

KANUAANA Nuummi qitiusumik allaffeqarpoq kiisalu Sisimiuni, Ilulissani Nuummilu nunap immikkoortuini allaffeqarluni. Qitiusumik allaffik 15-inik sulisoqarpoq, allaffillu allaffissornermut, qarasaasialerinermut nunallu tamat akornanni suleqatigiinnermut kiisalu nakkutilliinermut immikkoortortaqarluni, nakkutilliisooqatigiit tassaapput aalisarnermik alapernaarsuisut 13-it kiisalu nunap immikkoortuini allaffinni pingasuni katillugit aalisarnermik piniarnermillu nakkutilliisut 13-it piniarnermillu nakkutilliisut tallimat.

Allaffissornikkut pisortaq allaffissornikkut immikkoortortami, maannakkut arfinilinnik sulisoqartumi aqutsisuussaaq.

Akissarsiat atorfeqartitaanermilu atugassarititaasut:
Atorfik akissaateqarfimmi LR 36-mi maanna inissisimavoq.

Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemandi-tut atorfeqareersimaguni Nunatsinni pisortani tjenestemandit pillugit inatsisit malillugit tjenestemandinut atugassariti-taasut naapertorlugit atorfinitsinneqarsinnaavoq.

Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat.

Piffissap suliffiusussap sivisussusissaa aallaavittut sapaatip akunneranut nalunaaquttap akunnerinik 40-nik sivisussuseqarpoq.

Akissarsianut atorfeqartitaanermullu tunngasutigut piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

Atorfimmut annertunerusumik paasisaqarusukkuit saaffigisinnaavat Aalisarnermik nakkutilliinermi inspektøri, Michael D. Pedersen, oqarasuaat 345000.

Qinnuteqarnissamut killigititaq:
Qinnuteqaatit KANUAANA-p tigoriissavai kingusinnerpaamik ataasinngorneq 15. marts 2021.

Atorfinitsitaaneq
Atorfik piaarnerpaamik isumaqatigiissuteqarnikkulluunniit inuttalerneqarnissaa kissaatigineqarpoq.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk