Skip to main content
98

Dette jobopslag er udløbet

Kalaallit Nunaanni Namminersorlutik Oqartussani Pisiortortarnermut Allaffimmut fuldmægtigi

Pisiortortarnermi, matumani neqerooruteqartitsisarneq pisiortornissamullu isumaqatigiissusiornernik sulinissannut kajumissuseqaruit - tassaavutit ujartugarput.
Pisiortortarnermut, Sanaartornermut Ineqartitsigallartarnernullu allaffimmi neqerooruteqartitsisarnermut pilersuisunullu isumaqatigiissutinut tunngasut Namminersorlutillu Oqartussat sinnerlugit isumagisarpavut. Namminersorlutik Oqartussat sinnerlugit nioqqutissanik pisiortortarnerup kiffartuussisarnissanullu suli pitsaanerusunik atugassaqartitsinissaq anguniagaavoq - sulineq illit peqataaffigisassat.

Atorfik pillugu
Fuldmægtigitut suliassat makku pingaarnertut isumagisassarissavatit:

  • Neqerooruteqartitsinissamik isumassarsiamit piviusunngortitsinermut suliaqarneq naammassinninnerlu.
  • Pilersuisunut isumaqatiginninniarnerit
  • Isumaqatigiissusiorneq, isumaqatigiissuteqarneq isumaqatigiissutinillu piviusunngortitsineq aqutsinerlu
  • Pisiortortarnermut tunngatillugu susassaqarfinni tamani suleqatigiinneq ataqatigiissaarinerlu
  • Neqerooruteqartitsinermut aamma suliarinnittussanik isumaqatigiissusiornermut atatillugu Namminersorlutik Oqartussat immikkoortortaqarfiinik ilitsersuisarneq siunnersuisarnerlu               
  • Pisiniariaatsinik pitsanngorsaaneq
  • Suliffeqarfiup iluani avataanullu attaveqartarneq

Suliffik soqutiginartoq, unammilligassarpassualik, inussiarnersumik suleqatigiiffiusoq aammalu assigiinngitsunik suliassarpassualik neqeroorutigisinnaavarput. 
Suliassatigut suleqatigiilluartunut sisamaasunut, ilisimasanik avitseqatigiittarnermik, tunniusimanermik suliassanillu suliarinninnissamut kajumissuseqarluni pingaartitsiffiusumut ilaalissaatit. Suliffimmi ineriartortinneqartumi sunniuteqaqataanissannut periarfissaqarluarputit.
Pisiortortarnernut, Sanaartornernut Ineqartitsigallartarnernullu Allaffik Aningaasaqarnermut Sulisoqarnermullu Aqutsisoqarfimmi inissisimavoq sulisoralugillu allaffimmi pisortaq sulisullu qulingiluat.

Sapaatip akunneranut akunnerit 40-t suliffiusarput.
Atorfiniffissaq: 1. marts 2019 isumaqatigiissuteqarnikkulluunniit.

Ilinnut tunngasut
Misissuillaqqissuuvutit kisitsisinik paasisimasaqarluarlutit pisiortornerullu aningaasaqarnermut inatsisinullu tunngasortaanik suliaqarusussuseqarlutit. Inuttut annikitsualunnik takunnissinnaassuseqarputit, aaqqissuussillaqqillutit, ataqatigiissaarillaqqissuullutit akisussaassusermillu tiguserusuttarlutit.  Suliassanik nammineerlutit suliniuteqartartuuvutit nammineerlutillu suliarisinnaalluarlugit.
Suleqatigiuminartuussaatit suliffeqarfiup iluani avataanilu soqutiginnittunik kinguneqartussamik oqaloqatiginnissinnaallutit kiisalu inatsisitigut ajornartorsiutit pillugit inatsisilerituujunngitsunut siunnersuisinnaallutillu ilitsersuisinnaassallutit. Oqaluinnarlutit allattariarsornermilu paasiuminarsaallaqqissuuvutit.
Inatsisilerinermik ingerlaqqiffiusumik attuumassutilimmik, soorlu assersuutigalugu cand. jur. imaluunniit cand. merc. jur.-imik ilinniagaqarputit.
Pisortaqarfinni pisiortortarnermik misilittagaqarneq aamma neqerooruteqartitsinermi sanaartornermilu maleruagassanik ilisimasaqarneq iluaqutaassaaq.

Attaveqarfissaq qinnuteqarnerlu
Atorfik pillugu apeqqutissaqaruit, allaffiup pisortaa Anders Malinovski uani andm@nanoq.glimaluunniit uunga +299 34 58 39 saaffigissallugu tikilluaqquneqarputit.

Kalaallit Nunaanni Namminersorlutik Oqartussat pillugit paasissutissat nalinginnaasut nittartakkakkut www.naalakkersuisut.gl-ikkut pissarsiarineqarsinnaapput.

Ulloq qinnuteqarfissaq kingulleq, marlunngorneq ulloq 29. januar 2019. Sapaatip akunnerani 5-mi 6-milu oqaloqateqarnerit ingerlanneqassasut naatsorsuutigineqarpoq. Atorfik ugguuna qinnutigineqassaaq: http://www.naalakkersuisut.gl/da/Naalakkersuisut/Job/Ledige-stillinger
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

 

Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput. 

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat. 

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk